“Eju chemoirũ”
1. Mbaʼe iporãvapa jastudiáta marzo guive?
1 La Bíbliape oĩ irundy kuatiañeʼẽ omombeʼúva hetaiterei mbaʼe Ñandejára Raʼy ojapovaʼekue oĩrõ guare ko yvy ape ári. Ha ág̃a semána 1 de marzo guive jajapóvo Ñandejára Ñeʼẽ Ñehesaʼỹijo, jastudiáta lívro “Eju chemoirũ”. Entéro kristiáno ningo ‘jaguatavaʼerã hekoitépe Jesús pyporére’; upévare hiʼãite ñañembosakoʼi porã ha ñañatende jastudia vove ko lívro (1 Ped. 2:21; Mar. 10:21). Iporãta jajesareko porãramo umi párte ñanemokyreʼỹvare japredika hag̃ua.
2. Mbaʼéichapa Jesús ehémplo ñanepytyvõ jagueropuʼaka hag̃ua predikasiónpe?
2 Jesús omoĩ ñandéve ehémplo. Japredika jave pyʼỹinte jatopa nañanerenduséiva, mbaʼéichapa ñañeñandu upéicha jave? Jahasávo koʼã mbaʼére jahecha porãve añeteha Jesús heʼivaʼekue: ‘Cherehe oñemoĩrõ hikuái, penderehe avei oñemoĩta’ (Juan 15:20). Upéva ndeʼiséi entéro umi nañanerenduséiva oñemoĩtaha ñanderehe. Péro ñanemanduʼákena Jesús ogueropuʼaka hague opa mbaʼe ojesareko rupi umi mbaʼe porã ohupytýtavare upe rire. Ñande avei ñapensa meme vaʼerã Jehová oguerohoryha jajapóva ha tuicha omyengoviataha ñandéve. Péva ñanepytyvõta ani hag̃ua ‘ñanekaneʼõ ni ñanekangy’ (Heb. 12:2, 3; Pro. 27:11). Japredika memevaʼerã oĩramo jepe oñemoĩva ñanderehe, péicha Jesús katuete ñanepytyvõta (Mat. 28:20).
3. Mbaʼéichapa ikatu ñahaʼanga Jesúspe japredika jave?
3 “Upearã ningo añembouvaʼekue.” Jesús omoherakuã meme vaʼekue pe marandu porã ha upéva omombaʼeve opa mbaʼégui (Luc. 4:43). Haʼe oñemeʼẽmbaite ko tembiapo rehehápe ha oheka voi oportunida opredikave hag̃ua, oikuaágui iñimportantetereiha ko tembiapo. Ha ñande, ñahaʼangápa chupe ko mbaʼépe? Jajapo jave ñane rembiapokuéra káda día, jaaprovechápa japredika hag̃ua? Cristo mborayhu ñanemokyreʼỹ ñamoherakuã hag̃ua pe marandu porã opa ikatuha peve! (2 Cor. 5:14.)
4. Mbaʼéichapa ñandekatupyryvéta predikasiónpe?
4 ‘Norohendúiva peichaite peve iñeʼẽkuaáva.’ Umi hénte ningo ijurujaipa ohendúvo Jesús oporomboʼe lája (Juan 7:46; Mat. 7:28, 29). Mbaʼérepa haʼe idiferénte ambue mboʼeharakuéragui? Haʼe ohayhu Ñandejára Ñeʼẽ, ohayhu umi héntepe ha katupyrýpe oheka ládo ikatu hag̃uáicha umi ohendúva ontende upe heʼíva. Ñahaʼangáramo Mboʼehára Guasúpe, ñandekatupyryvéta predikasiónpe (Luc. 6:40).
5. Mbaʼépa ñañehaʼãvaʼerã jajapo jastudiávo “Eju chemoirũ”?
5 Koʼág̃a ñahesaʼỹijo mbykymínte mbaʼépa ñanemboʼe Jesús rembiasakue. Mbaʼe mbaʼépa ikatu ñaaprendeve? Oĩ gueteri hetaiterei mbaʼe porã. Upévare ág̃a jastudia vove Jesús rekovekue rreunionhápe, ñañehaʼãvaʼerã ‘jaikuaa Cristo mborayhu’. Péicha ñahaʼangáta chupe opa mbaʼe jaʼéva ha jajapóvape (Efe. 3:19).