Las maravillas de la creación revelan la gloria de Dios

Heta tapicha ovyʼaiterei omañávo umi mbaʼe porã oĩvare ko yvy ape ári. Upéicharamo jepe, oĩ ndohechakuaáiva Ñandejára ojapo hague koʼã mbaʼe iñarandu ha ñanderayhu rupi (Rom. 1:20). Rréi David ningo oikuaavaʼekue Jehovápe olee rupi Iñeʼẽ. Avei ‘ohecha’ chupe ha oñemoag̃ui hese ojesarekóvo hembiapokuére (Sal. 8:3, 4). Pe vidéo hérava Las maravillas de la creación revelan la gloria de Dios ñanepytyvõkuaa ñandéve, ñane familiakuérape ha ñane estudiántepe jaikuaa porã hag̃ua Jehová rembiapokue, mbaʼeichaguápa haʼe ha ñañemoag̃uive hag̃ua hese. Rehecha rire pe vidéo embohovái koʼã porandu.

1) ¿Mbaʼéichapa ñanepytyvõ jahayhuve hag̃ua Jehovápe jaikuaa rire mbaʼeichaitépa tuicha ko univérso ha oĩha opa mbaʼe hendaitépe? (Isa. 40:26.) 2) ¿Mbaʼépa ñanemboʼe Ñandejáragui ñamañávo pe ýre? (Rev. 14:7.) 3) ¿Mbaʼéichapa jahechakuaa Jehová iñaranduha jahechávo ojapoha hendaitépe ko yvy ha pe kuarahy? 4) ¿Maʼerãpa ideprovécho pe jasy? (Sal. 89:37.) 5) ¿Mbaʼe mbaʼépa omeʼẽ ñandéve Jehová javyʼa hag̃ua ñande rekovépe? 6) ¿Mbaʼépa pe ADN? (Sal. 139:16.) 7) ¿Mbaʼépepa idiferénte yvyporakuéra ambue Jehová rembiapokuégui? (Gén. 1:26.) 8) ¿Mbaʼe mbaʼépa rejapose múndo pyahúpe?

Extras: 9) ¿Mbaʼéicha rupípa jahecha umi kolór? 10) Pe graveda ningo oitira opa mbaʼe yvy gotyo, ¿mbaʼéichapa upéicharõ pe y ojupi yvyramáta ruʼãme? 11) ¿Mbaʼéichapa ideprovécho pe y ñande retépe g̃uarã? 12) Emombeʼu ehémplo ohechaukáva mbaʼéichapa oñopytyvõ entéro mbaʼe oikovéva. 13) ¿Mbaʼéichapa opa mbaʼe oikovéva oikuaa oñopytyvõvaʼerãha? 14) ¿Mbaʼépa pe ángulo áureo, ha mbaʼéichapa ojekuaa upéva Ñandejára rembiapokuére?

Jajesareko porãkena Jehová rembiapokuére. Jesús omokyreʼỹvaʼekue hemimboʼekuérape ‘omaʼẽ hag̃ua umi guyra ovevéva rehe’ ha ‘umi yvoty ñumegua rehe’ (Mat. 6:26, 28). Ñande avei, jajesarekóramo Jehová rembiapokuére jajeroviavéta hese ha jahechakuaáta mbaʼeichaitépa ipoderóso, iñarandu ha ñanderayhu. Upévare, jaiko rangue jaiporupa ñane tiémpo umi mbaʼe ojejapóvare ko múndope, iporãvéta jajesareko ha jajepyʼamongeta Ñandejára rembiapokuére ha mbaʼépa ñanemboʼe koʼã mbaʼe chugui (Sal. 19:1).