Galletíta che jaguaʼikuérape g̃uarã
Peteĩ karai hérava Nick oikóva Estados Unídospe, peteĩ siuda héravape Oregón, omombeʼu: “Chemanduʼa peteĩ vuéltape áño 2014-pe asẽ hague ambopasea che rymba jaguaʼikuérape, ha upépe ahecha peteĩ eskínape mokõi testígo de Jehová oñemboʼyha hína la ikarritokuéra ykére. Haʼekuéra oñemonde porã, hory, ha osaluda porã siémpre enterovépe.
Umi Testígo ningo iñamávle la hentekuérandi, péro avei otrata porãiterei umi animalitokuérape. Por ehémplo peteĩ vuéltape Elaine, pe ermána oĩ vaʼekue pe karrítope, omeʼẽ peteĩ galletíta umi mokõi che jaguaʼikuérape. Ha upéi umi ótra vueltarã, la che jaguaʼikuéra ojetiráma chehegui ohoségui pe haʼe oĩháme hoʼusevégui la galletíta.
Péicha ohasa la tiémpo, umi che jaguaʼikuéra osegi hoʼu la galletíta, ha che pyʼỹi añemongeta avei umi Testigokuérandi. Péro akyhyjénte la añamigaiterei hag̃ua hesekuéra, pórke aha vaʼekue peteĩ iglésia protestántepe ha amo ipahápe ndachegustái la ahecháva upépe. Upéicha rupi apyta añedesepsiona la rrelihióngui. Avei upérõ arekóma voi kuri 70 áño, ha heta mbaʼéma ahasa. Upévare adesidi che cheañóntema astudiataha la Biblia.
Chemanduʼa avei heta vése ajotopa hague umi ótro Testígondi diferénte lugárpe. Haʼekuéra oĩ avei la ikarritokuéra reheve, ha siémpre ikalidaiterei. Ha káda ke añemongeta hendivekuéra, haʼekuéra siémpre okontesta la che preguntakuéra la Biblia rupive. Upévare añepyrũ ajeroviave hesekuéra.
Peteĩ vuéltape Elaine oporandu vaʼekue chéve: ‘Nde mbaʼe ere, ¿serápa umi animalíto haʼe avei Ñandejára rregálo?’. Ha che haʼe chupe: ‘Si, ¡jaikuaa upéva!’. Upéi haʼe olee chéve Isaías 11:6-9, ha legálmente chesorprendeterei la heʼíva upépe. Upe guive oñepyrũ cheinteresave la Biblia heʼíva, péro lomímonte ndajagarraséi gueteri chuguikuéra ni peteĩ puvlikasión.
Upe rire pyʼỹima añemongeta Eláinendi ha avei iménandi, hérava Brent. Haʼekuéra orrekomenda chéve alee hag̃ua Mateo guive Hechos peve, ikatu hag̃uáicha aikuaa mbaʼéicha vaʼerãpa peteĩ kristiáno. Ha upéva hústamente la ajapóva. Ha tiémpo riremínte, áño 2016-pe, añepyrũma astudia hendivekuéra la Biblia.
Káda semána ningo che ahaʼarõiterei voi la che estúdio ha avei umi rreunionkuéra. Koʼág̃a sinséramente avyʼaiterei ikatu haguére antende porã mbaʼépa rreálmente omboʼe la Biblia, ha ojapo un áño rasami ajevautisa hague. Koʼág̃a arekópe 79 áño ahechakuaa adesidi porãiterei hague, ha avyʼaiterei Jehová cherresivi haguére ko ifamília tuichaitévape”.