Peteĩ taʼýra ivuéno ha ótro iñaña

EMAÑAMI koʼág̃a Caín ha Abel rehe. Mokõive okakuaapáma. Caín ombaʼapo kokuépe. Oñotỹ verdúra ha opa mbaʼe hiʼáva.

Abel katu omongakuaa ovecha. Oñangareko umi ovecha raʼýre; upéva ogusta chupe. Koʼãva okakuaa ha oiko chuguikuéra ovecha guasu, ha pyaʼe Abel oguerekóma heta ovecha oñangareko hag̃ua.

Peteĩ díape Caín ha Abel ogueru peteĩ rregálo Ñandejárape. Caín ogueru hiʼupy haʼe oñemitỹvaʼekue. Ha Abel ogueru pe ovecha iporãvéva. Jehová oguerohory Abel ha irregálope. Péro ndoguerohorýi Caín ha irregálope. Nde piko reikuaa mbaʼérepa?

Ndahaʼéiko iporãvehaguére Abel rregálo Caín mbaʼégui. Abel ningo ivuéno. Ohayhu Jehovápe ha iñermánope avei. Péro Caín iñaña; ndohayhúi iñermánope.

Upévare Ñandejára heʼi Caínpe okambiavaʼerãha. Péro Caín nopenái hese. Ipochyeterei pórke Ñandejára ohayhuve Abélpe. Caín heʼi Abélpe: ‘Jahána amo ñúme’. Haʼeño jave hikuái, Caín oinupã iñermánope. Oinupã hatãiterei ha ojuka chupe. Ajépa ivaiete pe Caín ojapovaʼekue?

Omanómaramo jepe Abel, Ñandejára imanduʼa gueteri hese. Abel ivuenovaʼekue, ha Jehová núnka ndahesaráiri umichagua persónagui. Upévare peteĩ árape Ñandejára Jehová omoingove jeýta Abélpe. Ha upépe Abel nomanomoʼãvéima. Ikatúta oikove opa ára g̃uarã ko Yvy ape ári. Ajépa iporãitéta jaikuaa umichagua tapichápe?

Péro Ñandejára ndoguerohorýi umi persóna Caínpe ojoguáva. Upévare, ojuka rire Caín iñermánope, Ñandejára okastiga ha omondo chupe mombyry ifamíliagui. Ohóvo Caín oiko hag̃ua mombyry, ogueraha hendive peteĩ iñermána hembirekorã.

Upe rire, Caín ha hembireko oñepyrũ ifamília. Umi ótro Adán ha Eva familiakuéra, kuñáva ha kuimbaʼéva, omenda ha oguereko avei ifamília. Pyaʼe oĩ heta hénte ko Yvy ape ári. Jaikuaamíta umívape.