Jacob oho Haránpe

NDÉPA reikuaa mávapa koʼã kuimbaʼe oñeʼẽva Jacob ndive? Heta ára oviaha rire, Jacob otopa hesekuéra peteĩ ykua ypýpe. Upépe oñangareko hikuái ijovechakuéra rehe. Jacob oporandu: ‘Moõguápa peẽ?’.

‘Ore roiko Haránpe’, heʼi hikuái.

‘Peikuaa piko Labánpe?’, oporandu Jacob.

‘Roikuaa’, okontesta hikuái. ‘Emañami, peamo ou itajýra Raquel ijovechakuéra reheve.’ Ndépa rehecha Raquélpe og̃uahẽrõ oúvo?

Jacob ohechávo Raquélpe itio Labán ovechakuéra reheve, oho oipeʼa pe ita oĩva ykua rembe ári ikatu hag̃uáicha hoyʼu umi ovechakuéra. Upe rire Jacob ohetũ Raquélpe ha heʼi chupe mávapa haʼe. Raquel ovyʼaiterei, ha oho hógape omombeʼu itúva Labánpe upe oikovaʼekue.

Labán ovyʼaiterei Jacob opytahaguére hógape. Ha Jacob heʼírõ guare chupe omendaseha Raquel rehe, Labán ovyʼa. Péro ojerure Jacóbpe ombaʼapo hag̃ua hendive Raquel rehehápe siete áño. Jacob ojapo upéva ohayhuetereígui Raquélpe. Péro og̃uahẽvo pe ára omenda hag̃ua hikuái, reikuaa piko nde mbaʼépa oiko?

Labán omeʼẽ Jacóbpe, Raquel rekovia, itajýra ypykue hérava Lea. Heʼírõ guare Jacob ombaʼapovetaha hendive siete áño, Labán omeʼẽ avei chupe Raquel hembirekorã. Umi tiémpope Ñandejára ohejavaʼekue kuimbaʼekuéra heta hembireko. Péro koʼág̃a, heʼiháicha la Biblia, peteĩnte oguerekovaʼerã.