Umi suéño oguerekovaʼekue Faraón

OHASÁMA dos áño ha José oĩ gueteri kárselpe. Pe kopéro naimanduʼái hese. Upérõ, peteĩ pyharépe Faraón oguereko mokõi suéño ijespesiálva, ha oikuaase mbaʼépa heʼise. Rehechápa koʼápe okerõhína? Upe koʼẽme Faraón ohenói umi kuimbaʼe arandu oguerekóvape ha omombeʼu chupekuéra pe ohechavaʼekue iképe. Péro haʼekuéra ndaikatúi heʼi chupe mbaʼépa heʼise umi suéño oguerekovaʼekue.

Koʼág̃a hasýpe imanduʼa José rehe pe kopéro. Heʼi Faraónpe: ‘Aimérõ guare kárselpe oĩvaʼekue upépe peteĩ kuimbaʼe oikuaáva mbaʼépa heʼise umi suéño’. Pyaʼe porã Faraón oguenohẽuka kárselgui Josépe.

Faraón omombeʼu Josépe umi suéño oguerekovaʼekue: ‘Ahecha siete vaka ikyráva ha iporãva. Upéi ahecha avei siete vaka ipiruetereíva ha ikangue sẽmbáva. Ha umi vaka piru omokõ umi vaka kyrápe’.

‘Upe rire ahecha che képe siete espíga haʼỹi porãva ha hiʼajupáva okakuaáva peteĩ hakãguinte. Upe rire ahecha avei siete espíga ichavi ha ipirúva. Ha umi espíga ichavíva omokõ umi siete espíga iporãvape’.

José heʼi Faraónpe: ‘Umi mokõi suéño reguerekovaʼekue heʼise peteĩ mbaʼénte. Umi siete vaka kyra ha umi siete espíga haʼỹi porãva heʼise siete áño, ha umi siete vaka piru ha umi siete espíga ichavíva heʼise ótro siete áño. Siete áño aja opuʼãta heta hiʼupyrã Egíptope. Upe rire oúta siete áño oĩtahápe saʼieterei hiʼupyrã’.

Upévare, José heʼi Faraónpe: ‘Eiporavo peteĩ kuimbaʼe iñarandúva ha tombyaty hiʼupyrã umi siete áño iporãva aja. Upéicharõ la hénte nomanomoʼãi ñembyahýigui ou vove umi siete áño ivaíva oĩtahápe saʼieterei hiʼupyrã’.

Faraónpe ogusta pe heʼíva. Ha oiporavo Josépe ombyaty ha oñongatu hag̃ua hiʼupyrã. Faraón rire, Joségui oiko pe kuimbaʼe iñimportantevéva Egíptope.

Ohasa rire ocho áño, pe ñembyahýi aja, José ohecha heta kuimbaʼe ouvahína. Ndépa reikuaa mávapa umíva? Umi 10 iñermanokuéra tuichavéva! Ituvakuéra Jacob omondo chupekuéra Egíptope, ohekávo hiʼupyrã saʼímagui chuguikuéra Canaánpe. José oikuaa iñermanokuérape, péro haʼekuéra ndoikuaái chupe. Reikuaápa nde mbaʼérepa? Pórke José itujavéma, ha noñemondéi haʼekuéraicha.

José imanduʼa imitãrõ guare ohechahague iképe iñermanokuéra oúrõ ojayvy henondépe. Nemanduʼápa jaleehague upévagui? Upéicha José ohechakuaa Ñandejára omondohague chupe Egíptope, ha peteĩ mbaʼe porã rehehápe. Mbaʼépa nde ere José ojapoha koʼág̃a? Jahechami.