Job ifiél Ñandejárape

NEREMBYASÝIPA ko karai hasývape? Héra Job, ha pe kuñakarai katu hembireko. Ndépa reikuaa mbaʼépa heʼihína chupe? ‘Emaldesi Ñandejárape ha emano’. Jahechami mbaʼérepa heʼinerakaʼe upéicha, ha mbaʼérepa Job ohasa asyete vaʼekue.

Job haʼevaʼekue peteĩ kuimbaʼe ifiélva ha iñeʼẽrendúva Jehovápe. Oikovaʼekue Úzpe, namombyrýiva Canaángui. Jehová ohayhueterei Jóbpe, péro oĩ peteĩ ndaijaʼéiva hese. Reikuaápa nde mávapa upéva?

Upéva haʼe Satanás el Diablo. Nemanduʼáne Satanás haʼeha pe ánhel aña ndaijaʼéiva Jehováre. Haʼe ombotavyvaʼekue Adán ha Évape odesovedese hag̃ua Jehovápe, ha opensavaʼekue ikatuha ojapo enterove rehe upéva. Péro, ikatuparakaʼe ojapo upéva? Nahániri. Nemanduʼáne umi kuña ha kuimbaʼe ifiélvare, ñande ñaaprendémakuri chuguikuéra. Mboýrepa ikatu nemanduʼa?

Jacob ha José omano rire Egíptope, Job haʼevaʼekue pe ifielvéva Jehovápe ko Yvy ape ári. Jehová oipotavaʼekue Satanás oikuaa ndaikatumoʼãiha omoñaña enterovépe, ha heʼi chupe: ‘Emañami Job rehe. Ehechami mbaʼeichaitépa ifiél chéve’.

‘Job ifiél’, heʼi Satanás, ‘pórke nde revendesi chupe ha oguereko heta mbaʼe porã. Péro reipeʼapáramo chugui, nemaldesíta’.

Upévare Jehová heʼi chupe: ‘Tereho. Eipeʼapa chugui. Ejapo opa mbaʼe vai rejaposéva hese. Jahecháta chemaldesípa. Péro eñatendéke ani rejuka’.

Iñepyrũrã, Satanás omondauka Jóbgui hymbakuéra ha ikamellokuéra, ha umi ijovecha katu ojejukapa. Upe rire ojuka peteĩ torméntape umi 10 itaʼýra ha itajyrakuéra. Upéi, omeʼẽ Jóbpe ko mbaʼasy vai. Job heta ohasa asy. Upévare hembireko heʼi chupe: ‘Emaldesi Ñandejárape ha emano’. Péro Job ndojaposéi upéva. Avei, ou hendápe mbohapy iñamígo guaʼu ha heʼi chupe hembiapo vai hague. Péro Job osegi ifiél.

Upéva ombovyʼaiterei Jehovápe, ha upéi ovendesi Jóbpe, rehechaháicha ko taʼangápe. Omonguera chupe imbaʼasýgui. Job oguereko jey 10 taʼýra ha tajýra iporã porãva, ha omeʼẽ jey chupe dóvle umi mymba, ovecha ha kamellokuéra oguerekovaʼekue.

Ndépa resegíta siémpre ndefiél Jehovápe Job ojapohaguéicha? Rejapóramo upéicha, Ñandejára nevendesíta avei. Ikatúta reiko opa ára g̃uarã oiko vove ko Yvýgui peteĩ lugár iporãitereíva, ojoguátava pe hardín de Edénpe.