Peteĩ óga oñemeʼẽ hag̃ua adorasión

REIKUAÁPA nde mbaʼépa ko óga? Kóva haʼe peteĩ óga espesiál ojeadora hag̃ua Jehovápe. Oñehenói chupe tavernákulo. Pe puévlo ojapopa un áñope, osẽ rire Egíptogui. Ndépa reikuaa mávapa ojapoukavaʼekue?

Jehová ojapoukavaʼekue. Moisés oĩ aja pe mónte Sinaípe, Jehová heʼi chupe mbaʼéichapa ojapovaʼerã. Heʼi chupe ojapovaʼerãha ikatu hag̃uáicha oñedesarma pyaʼe. Upéicha ikatúta ojegueraha ótro hendápe, ha upépe oñearma jey. Upévare, ova jave umi isrraelíta pe desiértore, ogueraha hikuái pe óga.

Remañáramo pe kotyʼi oĩvare amo huguápe, rehecháta peteĩ mbaʼyru. Ko mbaʼyru héra árka pákto rehegua. Oguereko hiʼári mokõi ánhel térã keruvín ojejapovaʼekue órogui, ha oñemoĩ peteĩ káda eskínape. Ñandejára oskrivi jey vaʼekue umi Diez Mandamientos mokõi ita ipévare, pórke Moisés ojokapa umi omeʼẽvaʼekue chupe tenonderã. Ha koʼã ita oñeñongatu pe árka pákto reheguápe. Oñeñongatu avei upépe peteĩ hárra oguerekóva maná. Nemanduʼápa nde mbaʼépa pe maná?

Jehová oiporavo Aarónpe, Moisés ermáno, oiko hag̃ua chugui saserdóte guasu. Haʼe odirihi pe puévlope Jehová adorasiónpe. Ha itaʼyrakuéra saserdóte avei.

Koʼág̃a emañami pe óga koty tuichavévare. Dóvle tuichave pe kotyʼígui. Rehechápa pe mbaʼyruʼi osẽhágui pe tatatĩ? Upevahína pe altár umi saserdóte ohapyha insiénso, peteĩ mbaʼe hyakuã porãva. Emañami avei pe kandelávrore, oguerekóva siete lámpara. Ha pe mbohapyha jahecháva pe kotýpe haʼe peteĩ mesa, oguerekóva 12 pán.

Pe tavernákulo korapýpe oĩ peteĩ fuénte guasu, térã palangána, henyhẽva ýgui. Umi saserdóte oiporu oñemopotĩ hag̃ua. Upépe oĩ avei pe altár guasu. Upépe ojehapy umi animál ojejukáva ofrendarã Jehovápe. Pe óga oĩ pe kampaménto mbytépe, ha umi isrraelíta oiko hóga kárpape ijerére.