Josuégui oiko líder

MOISÉS oikese isrraelitakuéra ndive Canaánpe. Upévare heʼi: ‘Jehová, cherejána tahasa rrío Jordán, ahecha hag̃ua pe yvy porã’. Péro Jehová heʼi: ‘Iporãma! Aníke reñeʼẽve chéve upévagui!’. Ndépa reikuaa mbaʼérepa Jehová heʼi chupe upéicha?

Upe oikovaʼekuére Moisés oinupárõ guare pe ita. Nemanduʼáne Moisés ha Aarón nomombaʼeihague Jehovápe. Haʼekuéra ndeʼíri pe puévlope Jehová oguenohẽhague y pe itágui. Upévare Jehová heʼi ndohejamoʼãiha chupekuéra oike Canaánpe.

Upéi, Aarón omano rire, Jehová heʼi Moiséspe: ‘Egueraha Josuépe, ha emoĩ pe saserdóte Eleazar ha pe puévlo renondépe. Ha upépe, enterove renondépe, emombeʼu Josué haʼeha pe líder pyahu’. Moisés ojapo Jehová heʼihaguéicha chupe, rehechaháicha ko taʼangápe.

Upémaramo Jehová heʼi Josuépe: ‘Nembaretevaʼerã, ha aníke rekyhyje. Regueraháta isrraelitakuérape Canaánpe, aprometehaguéicha chupekuéra, ha che aĩta nendive’.

Upéi Jehová heʼi Moiséspe ojupi hag̃ua mónte Nébope, oĩva Moábpe. Upégui Moisés ikatu omaña rrío Jordán mboypýri ha ohecha pe yvy porã oĩva Canaánpe. Jehová heʼi: ‘Kóva haʼe pe yvy haʼevaʼekue ameʼẽtaha Abrahán, Isaac ha Jacob raʼykuérape. Aheja rehecha, péro ndahejamoʼãi reike’.

Upépe, mónte Nébope, omano Moisés. Oguerekovaʼekue 120 áño. Imbarete ha ohecha porã gueteri. Pe puévlo ombyasyeterei ha enterove hasẽ Moisés rehe. Péro ovyʼa hikuái Josué haʼehaguére ilíder pyahu.