Peteĩ mondaha Israélpe

EMAÑAMI mbaʼépa oñotỹhína hógape ko kuimbaʼe! Peteĩ ao iporãva, óro ha monéda plataguigua. Koʼã mbaʼe ogueru Jericógui. Péro mbaʼépa ojejapovaʼerã koʼã mbaʼe Jericópe oĩvaʼekuégui? Ndépa nemanduʼa?

Oñehundivaʼerã, ha umi óro ha pláta oñemeʼẽvaʼerã Jehová tavernákulope g̃uarã. Upéicharamo koʼã hénte naiñeʼẽrendúi Ñandejárape. Omonda hikuái pe Ñandejára mbaʼéva. Pe kuimbaʼe héra Acán, ha umi oĩva hendive ifamiliakuéra. Jahechami mbaʼépa oikóraʼe.

Omonda rire Acán koʼã mbaʼe, Josué omondo kuimbaʼekuéra oñorairõ hag̃ua pe táva Hai ndive. Péro operde hikuái. Oĩ omanóva, ha umi hembýva osẽ odisparapa. Josué ombyasyeterei. Ojeity yvýpe ha oñemboʼe Jehovápe: ‘Mbaʼére piko reheja ojehu ko mbaʼe?’.

Jehová okontesta chupe: ‘Epuʼã! Israel opekákuri. Ojagarra hikuái umi mbaʼe ojeʼevaʼekue oñehundivaʼerãha térã oñemeʼẽvaʼerãha Ñandejára tavernákulope. Omonda hikuái peteĩ ao iporãva ha nomombeʼúi. Naporovendesimoʼãi pehundi mboyve pe ao ha pe omondavaʼekuépe koʼã mbaʼe’. Jehová heʼi ohechaukataha Josuépe mávapa pe kuimbaʼe aña.

Upévare Josué ombyatypaite pe puévlope, ha Jehová ohechauka mávapa pe kuimbaʼe aña, Acán. Acán heʼi: ‘Che apeka. Ahecha peteĩ ao iporãva, ha pe óro ha umi monéda plataguigua. Aipotaiterei koʼã mbaʼe ha agueru. Oime añotỹkuri che róga kárpa guýpe’.

Ojetopa ha ojegueru rire koʼã mbaʼe Josuépe, haʼe heʼi Acánpe: ‘Mbaʼére piko regueru oréve koʼã provléma? Koʼág̃a Jehová oguerúta ndéve provléma!’. Upémaramo umi hénte ojapi itápe Acán ha ifamíliape omano peve. Ndohechaukáipa ñandéve upéva núnka ndajaguerahaivaʼerãha mbaʼeve ndahaʼéiva ñanembaʼe?

Upe rire Israel oho jey oñorairõ Hai ndive. Koʼág̃a Jehová oipytyvõ ipuévlope, ha haʼekuéra ogana pe ñorairõ.