Rut ha Noemí

LA BÍBLIAPE retopáta peteĩ lívro hérava Rut. Kóva haʼe peteĩ família istória oikovaʼekue Israel oguerekórõ guare umi hués. Rut haʼe peteĩ kuñataĩ Moabpegua, ndahaʼéiva isrraelíta, pe Ñandejára puévlo. Péro Rut oikuaávo Jehovápe, pe Ñandejára añetegua, ohayhueterei chupe. Noemí haʼe peteĩ kuñakarai ityarõmava oipytyvõvaʼekue Rútpe oikuaa hag̃ua Jehovápe.

Noemí haʼe isrraelíta. Haʼe, iména ha umi mokõi imemby kuimbaʼe ova Moábpe saʼírõ guare tembiʼu Israélpe. Peteĩ árape Noemí ména omano. Upe rire, Noemí membykuéra omenda mokõi moavítare, hérava Rut ha Orpá. Ohasa rire 10 áño rupi, omano umi mokõi Noemí membykuéra. Ombyasyetépa hikuái! Mbaʼépa ojapóta koʼág̃a Noemí?

Peteĩ árape, Noemí odesidi oho jey ihentekuéra rendápe. Upe viáhe ipuku. Rut ha Orpá oĩse Noemí ndive, ha upévare oho avei hendive. Péro oho rire hikuái mombyrymi, Noemí heʼi chupekuéra: ‘Peho jey pende rógape ha pepyta pende sy ndive’.

Noemí ohetũ chupekuéra ha ojedespedi. Haʼekuéra oñepyrũ hasẽ, ohayhuetereígui Noemíme. Heʼi hikuái: ‘Nahániri! Ore rohóta nendive ne hentekuéra oĩhápe’. Péro Noemí okontesta chupekuéra: ‘Peẽ che memby peho jey vaʼerã. Peime porãvéta pene hentekuéra ndive’. Upémaramo Orpá oho jey pe ouhaguégui. Péro Rut ndohói hendive.

Noemí ojere ha heʼi chupe: ‘Orpá ohóma. Tereho nde avei hendive’. Péro Rut okontesta: ‘Anína chemondose jey! Ehejána taha nendive. Nde rehohápe, che aháta, ha nde reikohápe, che aikóta. Nde puévlo haʼéta che puévlo ha nde Dios haʼéta che Dios. Nde remanohápe, che amanóta, ha upépe añeñotỹta’. Rut heʼívo koʼã mbaʼe, Noemí noñehaʼãvéima omondo jey chupe.

Upe rire umi mokõi kuña og̃uahẽ Israélpe. Ha opyta oiko upépe. Rut pyaʼe oñepyrũ ombaʼapo umi kokue rupi, pórke upe jave oñemonoʼõ seváda. Peteĩ kuimbaʼe hérava Boaz oheja chupe omonoʼõ seváda ikokuépe. Ndépa reikuaa máva membýpa Boaz? Rahab memby, pe oikovaʼekue Jericópe.

Peteĩ árape, Boaz heʼi Rútpe: ‘Hetáma ahendu ndehegui, ha mbaʼeichaitépa ndepyʼaporã Noemí ndive. Aikuaa rehejahague nde sy ha nde ru ha ne retã, ha reju reiko peteĩ puévlo reikuaaʼỹvape. Aipota Jehová ivuéno nendive!’.

Rut okontesta: ‘Ndepyʼaporãiterei chendive, karai. Añeñandu porãve koʼág̃a erehaguére chéve umi mbaʼe porã’. Boaz ohayhu Rútpe, ha upe riremínte omenda hikuái. Noemí ovyʼa upévare! Péro Noemí ovyʼavéntema Rut ha Boaz oguerekóvo peteĩ mitã hérava Obed. Upe rire Obédgui oiko David avuélo. Davídgui ñaaprendevéta upéi heta mbaʼe.