Saúl, primer rréi oguerekóva Israel

EMAÑAMI, Samuel oñohẽhína aséite pe kuimbaʼe akã ári. Kóicha ojejapovaʼekue ojehechauka hag̃ua mávapepa ojeporavo oiko hag̃ua chugui rréi. Jehová heʼi Samuélpe oñohẽ hag̃ua aséite Saúl akã ári. Kóva peteĩ aséite espesiál hyakuã asýva.

Saúl nopensaivaʼekue ikatuha oiko chugui rréi. ‘Che haʼe Benjamín trivupegua, pe michĩvéva Israélpe’, heʼi Samuélpe. ‘Mbaʼérepa ere oikotaha chehegui rréi?’. Jehová ohayhu Saúlpe pórke haʼe noñemombaʼeguasúi ha ndoikoséi iñimportántevaramo. Upévare oiporavo Saúlpe oiko hag̃ua chugui rréi.

Saúl naimboriahúi ha namichĩri. Saúl família ipláta heta, ha haʼe ipuku ha iporãiterei. Ipukuve treinta sentímetro rupi enterovégui Israélpe! Saúl iñakuã ha imbarete avei. Umi hénte ovyʼa Jehová oiporavohaguére Saúlpe oiko hag̃ua chugui rréi. Enterove oñepyrũ osapukái: ‘Toiko are pe rréi!’.

Umi isrraelíta enemígo imbarete gueteri. Saúlgui oiko riremi rréi, umi amoníta ou oñorairõ hendivekuéra. Péro Saúl ombyaty peteĩ ehérsito tuicháva, ha ogana umi amonítape. Upévare umi hénte ovyʼa oikohaguére Saúlgui rréi.

Ohasa heta áño, ha Saúl omogana isrraelitakuérape heta ñorãirõ. Saúl oguereko avei peteĩ itaʼýra ivaléva, hérava Jonatán. Haʼe oipytyvõ Israélpe ogana hag̃ua heta ñorairõ. Umi filistéo haʼe gueteri Israel enemígo imbaretevéva. Peteĩ díape, hetaiterei miles umi filisteokuéra ou oñorairõ hag̃ua Israel kóntrape.

Samuel heʼi Saúlpe ohaʼarõ hag̃ua chupe ou peve ojapo hag̃ua peteĩ sakrifísio Jehovápe. Péro Samuel nog̃uahẽvoíri. Saúl okyhyje umi filistéo omoñepyrũrõ g̃uarã pe ñorairõ, ha upévare oñemotenonde Samuel rehe ha ojapo haʼete voi pe sakrifísio. Og̃uahẽ rire, Samuel heʼi Saúlpe naiñeʼẽrenduihague. ‘Jehová oiporavóta ótrope oiko hag̃ua chugui rréi Israélpe’, heʼi Samuel.

Upe rire, Saúl naiñeʼẽrendúi jey. Samuel heʼi chupe: ‘Iporãve neñeʼẽrendu Jehovápe rerregalarangue chupe peteĩ ovecha iporãvéva. Nderejapóigui Jehová heʼíva, haʼe nandeguerekomoʼãvéima rréiramo Israélpe’.

Upévagui ikatu ñaaprende peteĩ mbaʼe. Ohechauka ñandéve tekotevẽha ñaneñeʼẽrendu siémpre Jehovápe. Ohechauka avei ñandéve peteĩ tapicha ivuénovagui ikatuha oiko peteĩ iñañáva, oikohaguéicha Saúl rehe. Aníkena oiko ñanderehe upéva! Ajépa?