Pe rréi Salomón iñaranduetéva

SALOMÓN imitã gueteri oikórõ guare chugui rréi. Ohayhu Jehovápe, ha ojapo itúva David heʼivaʼekue chupe. Jehová oguerohory Salomónpe, ha upévare peteĩ pyhare heʼi chupe iképe: ‘Salomón, mbaʼépa reipota ameʼẽ ndéve?’.

Ha Salomón okontesta: ‘Ñandejára Jehová, chéningo chemitãiterei ha ndaikuaái mbaʼéichapa agovernáta. Upévare, emeʼẽna chéve arandu agoverna porã hag̃ua nde puévlope’.

Jehová oguerohory pe Salomón ojeruréva. Upévare heʼi chupe: ‘Rejerurégui arandu ha nderejeruréi reikove are hag̃ua térã nde pláta heta hag̃ua, romoaranduvéta enterove oikovevaʼekuégui. Ha ameʼẽta avei ndéve umi mbaʼe nderejeruréiva, pláta heta ha glória’.

Upe riremínte mokõi kuña ou Salomón rendápe peteĩ provléma tuicháva reheve. ‘Ko kuña ha che roiko peteĩ ógape’, heʼi peteĩ. ‘Che chememby peteĩ mitãkuimbaʼe, ha dos día rire haʼe avei imemby peteĩ mitãkuimbaʼe. Peteĩ pyharépe, imemby omano. Péro che ake aja, haʼe omoĩ imemby reʼõngue che ykére ha ogueraha che memby. Apáyvo ahecha pe mitã reʼõngue ha ahechakuaa ndahaʼeiha pe chembaʼéva.’

Ohendúvo upéva, pe ótro kuña heʼi: ‘Nahániri! Pe mitã oikovéva chembaʼe ha pe omanovaʼekue imbaʼe!’. Pe kuña oñeʼẽ raẽ vaʼekue okontesta: ‘Nahániri! Pe omanovaʼekue nembaʼe ha pe oikovéva chembaʼe!’. Péicha oñombohovái umi kuña. Mbaʼépa ojapóta Salomón?

Ojerure peteĩ espáda, ha ojeguerúvo chupe, heʼi: ‘Pembojaʼo mbytépe pe mitã oikovéva, ha pemeʼẽ káda kuñáme peteĩ ipehẽngue’.

‘Ani!’, osapukái pe mitã sy teéva. ‘Anína pejuka pe mitã. Pemeʼẽnte chupe!’. Péro pe ótro kuña heʼi: ‘Anínte pemeʼẽ oréve, pembojaʼo katu mbytépe’.

Koʼág̃a Salomón heʼi: ‘Ani pejuka pe mitã! Pemeʼẽ pe kuña oñeʼẽ raẽ vaʼekuépe. Péva haʼe isy tee’. Kóva Salomón oikuaa pórke pe sy tee ohayhueterei imembýpe ha upévare omeʼẽtante pe ótro kuñáme ani hag̃ua ojejuka pe mitã. Ohendúvo umi hénte mbaʼéichapa Salomón osolusiona pe provléma, ovyʼa oguerekohaguére peteĩ rréi iñaranduetéva.

Salomón ogoverna aja, Ñandejára ovendesi pe puévlope omoheñóivo heta trígo ha seváda, parrál ha ígo ha hetave hiʼupyrã. Umi hénte oñemonde porã ha oiko óga porãme. Oĩ hetaiterei mbaʼe iporãva enterovépe g̃uarã.