Ojerovia hikuái Ñandejára oĩpytyvõtaha chupekuéra

MILES de persóna ojapo pe viáhe puku Babilóniagui Jerusalénpe. Péro og̃uahẽvo hikuái, Jerusalén haʼe peteĩ taperénte. Avave ndoikói upépe. Umi isrraelitakuéra omopuʼã jey vaʼerã opa mbaʼe.

Peteĩ mbaʼe ojapo raẽvéva hikuái haʼe peteĩ altár. Kóva haʼe peteĩ lugár ojejapo hag̃ua ofrénda, térã rregálo, animalkuéragui Jehovápe g̃uarã. Upe riremi, isrraelitakuéra oñepyrũ omopuʼã pe témplo. Péro iñenemigokuéra ótro tetã hiʼag̃uivapegua, oñehaʼã omongyhyje chupekuéra oheja hag̃ua hembiapo. Ipahápe, iñenemigokuéra ojapouka pe rréi pyahúpe, oĩva Pérsiape, peteĩ léi ojoko hag̃ua pe konstruksión.

Ohasáma 17 áño isrraelitakuéra osẽhague Babilóniagui. Ñandejára omondo iproféta Ageo ha Zacarías heʼi hag̃ua pe puévlope oñepyrũ jey hag̃ua pe konstruksión. Umi hénte ojerovia Ñandejárare ha ojapo umi proféta heʼíva. Oñepyrũ jey pe konstruksión, oĩramo jepe peteĩ léi heʼíva ndaikatuiha.

Upévare, peteĩ ofisiál pérsa hérava Tatenai ou ha oporandu chupekuéra mbaʼe deréchopa oguereko omopuʼã hag̃ua pe témplo. Umi isrraelíta heʼi Babilóniape Ciro heʼihague chupekuéra: ‘Tapeho Jerusalénpe ha pemopuʼã pende Dios Jehová témplo’.

Tatenai omondo peteĩ kárta Babilóniape ha oporandu añetépa Ciro, omanómava koʼág̃a g̃uarã, heʼirakaʼe upéicha. Pyaʼe pe rréi pyahu Persiaygua ombou peteĩ kárta ha heʼi upeichaha. Upévare pe rréi oskrivi: ‘Peheja umi isrraelítape tomopuʼã pe témplo pe Dios oguerekóvape g̃uarã. Ha aipota peipytyvõ chupekuéra’. Ohasa rire cuatro áño rupi ojejapopa pe témplo, ha umi isrraelitakuéra ovyʼaiterei.

Ohasa jey heta áño. Koʼág̃a ojapóma haimete 48 áño pe témplo opahague. Umi hénte oĩva Jerusalénpe imboriahu, ha pe siuda ha Ñandejára témplo naiporãiete. Amo Babilóniape, pe isrraelíta Esdras oikuaa tekotevẽha oñemyatyrõ Ñandejára témplo. Upévare, ndépa reikuaa mbaʼépa ojapo?

Esdras oho Artajerjes rendápe, Persiaygua rréi, ha upe rréi ivuénova omeʼẽ chupe heta rregálo ogueraha hag̃ua Jerusalénpe. Esdras ojerure umi isrralítape oĩva Babilóniape oipytyvõ hag̃ua chupe, ha 6.000 rupi heʼi ohotaha hendive. Ogueraha hikuái heta pláta, óro ha hetave mbaʼe porã.

Esdras ojepyʼapy, oĩgui heta kuimbaʼe iñañáva tapére. Koʼã kuimbaʼe ikatu omonda pe pláta ha óro, ha ojuka chupekuéra. Upévare Esdras ombyaty umi héntepe, rehechaháicha ko taʼangápe. Upémaramo oñemboʼe Jehovápe oñangareko hag̃ua hesekuéra pe viáhe pukúpe Jerusalén peve.

Jehová oñangareko hesekuéra. Ha cuatro mése osẽhaguépe hikuái, og̃uahẽ porã Jerusalénpe. Ajépa kóva ohechauka ñandéve Jehová oñangarekoha umi ojeroviávare hese?