Jesús ou rréiramo

OMONGUERA riremi umi siégo ombaʼejerurévape, Jesús ou peteĩ puevloʼípe hiʼag̃uíva Jerusaléngui. Mokõi idisípulope heʼi: ‘Peike ko puévlope ha petopáta peteĩ vúrro raʼy. Pejora ha pegueru chéve’.

Oguerúvo hikuái pe vúrro, Jesús ojupi hiʼári. Upémaramo oho hiʼári Jerusalénpe, hiʼag̃uíva upégui. Og̃uahẽmbotávo pe siudápe, peteĩ aty guasu osẽ ohug̃uaitĩ chupe. Heta hénte oipeʼa imánto ha oipyso pe tapépe. Oĩ avei omoĩva palméra rogue, ha osapukái: ‘Ñandejára tovendesi pe rréi oúva Jehová rérape!’.

Ymavémi Israélpe, umi rréi ojupiramóva oike Jerusalénpe peteĩ vúrro ári ojehechauka hag̃ua pe puévlope. Upéicha avei ojapo Jesús. Ha koʼã hénte ohechauka péicha oipotaha Jesúspe irreirã. Péro naentéroi oipota chupe. Upéva jahechakuaa upe oikovaʼekuére Jesús ohórõ guare pe témplope.

Pe témplope, Jesús omonguera heta hénte ndohecháiva ha iparalítikovape. Ohechávo koʼã mbaʼe umi mitã, osapukaijoa omombaʼeguasúvo Jesúspe. Péro upéva ombopochy umi saserdótepe, ha heʼi Jesúspe: ‘Rehendu piko umi mitã heʼivahína?’.

‘Ahendu’, heʼi Jesús. ‘Ndapeleéiva piko la Bíbliape: “Mitãnguéra jurúgui Ñandejára oguenohẽta alavánsa?”.’ Upévare umi mitã osegínte omombaʼeguasu pe rréi Ñandejára omoĩvaʼekuépe.

Ñande avei jajapose umi mitã ojapohaguéicha, ajépa? Ikatu oĩ ndoipotáiva ñañeʼẽ Ñandejára rréino rehe. Péro ñande jasegíta ñañeʼẽ ñande rapichakuérape umi mbaʼe porãita ojapótavagui Jesús enterovépe g̃uarã.

Oĩrõ guare Jesús ko Yvy ape ári ndahaʼeivaʼekue pe tiémpo oñepyrũ hag̃ua ogoverna. Arakaʼépa og̃uahẽta upe tiémpo? Jesús disipulokuéra oikuaasevaʼekue upéva. Koʼág̃a ikatu jalee upévagui.