Mbaʼépa ohaʼarõ umi jahayhúva omanovaʼekuépe?

“Oime ramo omanóva, oikove jevýnepa?”, oporanduvaʼekue Job yma. (Job 14:14.) Ikatu nde avei reñeporandúma upéva. Mbaʼéichapa reñeñandúta reikuaáramo ikatutaha reime jevy, ko yvy apeʼári ha opa mbaʼe porã apytépe, umi rehayhúva omanovaʼekue ndive?

Ha néi, Ñandejára Ñeʼẽ oikuaauka ñandéve: “Omano vaʼekue oikove jevýta. [...] Opáy jevýta”. Heʼi avei: “Heko potĩvape opytapáne ko yvy, ha upépe haʼe kuéra oikóne opa árape”. (Isaías 26:19; Salmo 37:29.)

Ikatu hag̃uáicha jaguerovia porã ã promesa, ñaikotevẽ jaikuaa raẽ: Mbaʼérepa ñamano? Moõpa oho umi omanovaʼekue? Ha mbaʼéichapa ikatu jaikuaa porã añetehápe oikove jevytaha hikuái?

Pe ñemano ha ojehúva ñamano vove

Ñandejára Ñeʼẽ omohesakã ñandéve ndahaʼeiha ñemano Ñandejára oipota ypyvaʼekue yvypórape g̃uarã. Haʼe ojapo ñande ypykuéra, Adán ha Eva, ha omoĩ chupekuéra peteĩ tenda iporãvape, hérava Edén. Heʼi chupekuéra itaʼýra heta hag̃ua ha ombotuicha hag̃ua pe paraíso ko yvy tuichakuére. Ndojapóirõ Ñandejára Ñeʼẽ añoiténte omanótakuri hikuái. (Génesis 1:28; 2:15-17.)

Adán ha Eva nomombaʼéi Ñandejára pyʼa porã, ha upévare naiñeʼẽrendúi, ha oiko hesekuéra mbaʼe vai ojeʼevaʼekue chupekuéra. “Oiko jevy peve nde hegui yvy” heʼi Ñandejára Adán-pe; “Ndéko hína yvýgui guarénte ha yvýpe jevy repa vaerã.” (Génesis 3:19.) Ojejapo mboyve, Adán ndahaʼéivaʼekue mbaʼeve; yvýntekuri. Ha naiñeʼẽrendúigui, oñemondo jevy chupe yvýpe; oiko jevy chugui yvy, ha opa.

Upévare, pe ñemano heʼise jeikoveʼỹ. Ñandejára Ñeʼẽ heʼi kóicha: “Mbaʼe vai apo oporogueraha ñemanóme, Tupã jopói katu jeikove opa ára g̃uarãme”. (Romanos 6:23.) Avei ohechauka pe ñemanóme ogueha opaichagua ñeñandu. Heʼi péicha: “oikovéva oikuaa omano vaerãha, omanóva katu ndoikuaái mbaʼeve”. (Eclesiastés 9:5.) Avei, omombeʼu mbaʼépa ojehu pe tapicha omano vove; “osẽ ipytu, haʼe ojevy pe yvýpe; upe árape añetete opa ipyʼa mongeta”. (Salmo 146: 3, 4. NM)

Ha Adán ha Éva-nteramo omboykékuri upe Ñandejára heʼivaʼekue Edén-pe, mbaʼégui piko ñande avei ñamanovaʼerã? Upéicha ojehu jaikove haguére Adán hoʼa riréma, ha upévare jahupytypa pecado ha ñemano. Biblia heʼi upéicha: “Pe pecado oike haguéicha yvy ári peteĩ kuimbaʼe rupi [Adán], ha pecado rupi oike pe ñemano, upéicha avei pe ñemano ohasa opavavépe opavave opecágui”. (Romanos 5:12 VP; Job 14:4.)

Ikatu oĩ oporandúva: Ndorekói piko yvypóra peteĩ ánga oikovéva ñemano rire? Heta oĩ omboʼéva upéicha, ha ojeʼe avei upe ñemano haʼeha peteĩ okẽ jahasa hag̃ua ambue jeikovépe. Ko idea ndoúi Ñandejára Ñeʼẽgui. Ñandejára Ñeʼẽ omboʼe uvei ñane ánga ñandeha voi, nde haʼe peteĩ ánga, nde rete ha ne apytuʼũme oĩva rehe (Génesis 2:7; Jeremías 2:34; Proverbios 2:10. NM) Biblia heʼi avei: “Pe ánga hembiapo vaíva... haʼe omanóta” (Ezequiel 18:4 NM) Ñandejára Ñeʼẽ mamovete nomboʼéi jaguerekoha peteĩ ánga omanoʼỹva ñande rete omano rire.

Mbaʼéichapa ikatu oikove jevy yvyporakuéra

Oike rire pecado ha ñemano ko mundo-pe, Ñandejára oikuaauka ñandéve haʼe omoingove jevytaha omano- vaʼekuépe. Upévare Ñandejára Ñeʼẽ heʼi: “Abrahám oikuaágui Tupã Ñandeyára ikatuha omoingove yevy omanóvape yepe” (Hebreos 11:17-19. VP) Abrahán ndojavýi. Biblia heʼi Ñandejárare: “Haʼe niko ndahaʼéi omanóva Tupã. Oikovéva Tupã katu. Chupe guarã niko maymáva oikove” (Lucas 20:37, 38.)

Ñandejára Ipuʼakapáva ndahaʼéi ikatúnteva omoingove jevy umi oiporavóva. Haʼe ojapose voi upéva. Jesucristo heʼíkuri: “Ani peñemondýi koʼã mbaʼére, og̃uahéta hina ára opa omanóva ohendu hag̃ua che ñeʼẽ ha osẽmbáta ityvy kuéragui hikuái” (Juan 5:28, 29; Hechos 24:15.)

Uperiremínte Jesús ohecha oñerenohẽ táva israelita Naín-gui peteĩ omanovaʼekue. Peteĩ viuda membykariaʼy peteĩete omano. Ohecha vove pe sy ombyasyetereiha imembykariaʼýpe, Jesús oiporiahuvereko chupe; ha heʼi upe omanovaʼekuépe; “Nde mitarusu, ndéve haʼe: ¡Epuʼã!”. Ha upe mitarusu opuʼã, ha Jesús omeʼẽ chupe isýpe (Lucas 7:11-17.)

Ko viuda-pe ojehu haguéicha, tuicha vyʼa oiko avei Jesús ohórõ guare Jairo rógape. Jairo haʼe peteĩ omotenondéva Sinagoga judía. Omanókuri itajýra oguerekóva 12 años. Og̃uahẽvo Jesús Jairo rógape oja upe mitãkuña omanovaʼekue oiháme ha heʼi: “Nde, mitakuña, epuʼã!” ¡Ha opuʼã! (Lucas 8:40-56.)

Upe rire omano Lázaro, Jesús angirũ. Jesús og̃uahẽrõ hógape ojapómakuri irundy ára omano hague. Jepénte tuicha iñembyasy, heindy Marta omombeʼu pe ohaʼarõva ha heʼi: “Che niko aikuaa ág̃a ára pahápe, haʼe oikove jevytaha”. Jesús katu oho Lázaro oñemoĩ haguépe, ojerure ojepeʼa hag̃ua pe ita ha hatã heʼi: “Lázaro, esẽ upégui” ¡Ha Lázaro osẽ! (Juan 11:11-44.)

Epensamína upévare: mbaʼéichapa oĩraʼe Lázaro upe irundy ára omano aja? Lázaro ndeʼíri oĩ hague yvágape vyʼa pópe, térã peteĩ infierno tata rendýpe. Oime rire ohasa umi tenda rupi katuete omombeʼusétakuri umi mbaʼe. Nahániri, Lázaro noñandúi mbaʼevete omano aja ha opyta vaʼerãmoʼã upéicha og̃uahẽ peve pe jeikove jevy “ára pahápe” Jesús nomoingovéi rire chupe.

Umi milagro Jesús ojapovaʼekue ndopyta aréi. Umi haʼe omoingovevaʼekue upéi omano jevy. Upéicharõ jepe, ojapóma 1.900 años haʼe ohechauka hague ikatuha añetehápe, Ñandejára poder rupi, ¡oikove jevy umi omanovaʼekue! Ha upéicha umi milagro rupi Jesús ohechauka saʼimi mbaʼépa oikóta ko yvy apeʼári Ñandejára Gobierno guýpe.

Omano vove peteĩ jahayhúva

Upe ñemano og̃uahẽ vove, regueroviárõ jepe omanóva oikove jevytaha, ikatu reñandu tuicha mbaʼembyasy. Abrahán ogueroviákuri pe hembireko oikove jevytaha. Upéicharõ jepe Ñandejára Ñeʼẽ heʼi: “Abraham ombyasy ha ojaheʼo hese”. (Génesis 23:2.) Ha mbaʼéichapa oñeñanduraʼe Jesús? Lázaro omanórõ guare “tuicha oguapy hese” ha upéi “Jesús hasẽ”. (Juan 11:33, 35.) Upévare pe tasẽ omano vove peteĩ jahayhúva ndahaʼéi pyʼa kangýgui.

Peteĩ mitã omanorõ tuichaiterei ñembyasy ogueru, koʼýte sýpe g̃uarã. Upévare Ñandejãra Ñeʼẽ ohechakuaa pe ñembyasy guasu ikatúva oñandu peteĩ sy. (2 Reyes 4:27.) Ha upéicha avei tuvakuéra oñandu. “Hangaʼu che amano raʼe ne rendaguépe” heʼi jaheʼópe rey David omanorõ guare taʼýra Absalón. (2 Samuel 19:1.)

Upéicharõ jepe, regueroviárõ ikatuha omanóva oikove jevy rembohasavéta pe vyʼaʼỹ. Ñandejãra Ñeʼẽ heʼi nerembyasymoʼãiha “imbaʼembyasy háicha umi ambue kuéra ogue-rekoʼỹva esperanza” (1 Tesalonisenses 4:13 VP) Upévarangue nde reñemoaguĩvéta Ñandejárare ne ñemboʼe rupi, ha iñeʼẽ heʼi ndéve: “Haʼe oñangarekóta nde rehe” (Salmo 55:22.)

Ñandejára Ñeʼẽ ojeporúva oñerenohẽ Sociedad Bíblica Paraguaya traducción-gui. Upeichaʼỹramo oñemombeʼu texto biblico ykére mbaʼe traducción-pa ojeporu.