Konsuélo umi ikangy ha ndovyʼaietereívape g̃uarã
“Jaikuaániko koʼág̃a peve [...] ohasa asyha” opavave yvypóra (Romanos 8:22). Upéva ojehaihague ojapóma 1.900 áño rupi. Upérõ ojeiko asyeterei vaʼekue. Upévare ojeʼe kristianokuérape: ‘Peipytyvõ umi ikangývape’ (1 Tesalonicenses 5:14).
Koʼág̃a rupi hetaitereive oĩ ymaguarégui umi ojepyʼapýva ha oñembyasýva. Ñamombaʼevaʼerãpa upéva? Nahániri, la Biblia heʼi ñaimeha ‘pe ára pahápe’, ha heʼi ko ‘árape heta ojehasa asytaha’ (2 Timoteo 3:1-5). Jesucristo oñeʼẽvo ko ára paháre heʼi ‘tetãnguéra ipyʼatarovapataha’ ha ‘yvyporakuéra [odesmajataha, NM.] kyhyjégui, ojepyʼamongetávo opa ojehútavare’ (Lucas 21:7-11, 25-27; Mateo 24:3-14).
Oĩ ikangýva aretereíma ojepyʼapýgui, okyhyjégui, ndovyʼáigui térã oĩgui ambue mbaʼe oipyʼapy vaíva chupe. Ikatu oĩ ikangy térã ojahoʼíva chupe vyʼaʼỹ omanógui peteĩ ohayhúva, opoi rupi chugui iména térã hembireko, oñemosẽ rupi imbaʼapohágui térã hasy tuicha rupi. Oĩ avei ndovyʼáiva oimoʼãgui ndovaleiha mbaʼeverã, ndaikatuiha ojapo porã mbaʼeve térã ofallaha opavavéndi. Oimeraẽva jahasa asy jave ikatu ndajavyʼaieterei. Upéicha jave jajepyʼapyeterei ha ndajaikuaáiramo mbaʼéichapa ñasẽta chugui ikatu ñanemokangyeterei.
Heta tapicha ymaguare oñeñanduvaʼekue avei upéicha. Job hasyete vaʼekue ha ohasa heta mbaʼe vaíre. Oimoʼãgui Ñandejára oheja rei hague chupe, heʼi ikueraimaha hekovégui (Job 10:1; 29:2, 4, 5). Jacob, oimoʼãgui itaʼýra omanohague, ndovyʼaieterei, ndoipotái avave okonsola chupe ha omanose (Génesis 37:33-35). Pe rréi David tuicha ojavyhaguére oñeñandu vaieterei ha ojaheʼo: “Opa árape aikoʼi, tĩndyhápe añembyasy” (Salmo 38:7; 2 Corintios 7:5, 6).
Koʼág̃a rupi heta tapicha ndovyʼaieterei ohaʼarõgui ijehegui heta mbaʼe ha oñehaʼã rupi ojapo umi mbaʼe ndogueropuʼakamoʼãiva. Ojeʼe ñanekaneʼõ ha ñapensáramo mbaʼe vai ikatuha ombaʼapo ñande retére ha omombaʼapo vai ñane apytuʼũ, ha upévare ñanekangy (Embojoja Proverbios 14:30 rehe).
Mbaʼépa oikotevẽ pe ikangy ha ndovyʼaietereíva?
Epafrodito, peteĩ kristiáno primer síglope guare ha oikovaʼekue Filípospe, ‘ojepyʼapyeterei iñamigokuéra oikuaahaguére hasyha’. Epafrodito hasyete iñamigokuéra omondo rire chupe Rómape ogueraha hag̃ua heta mbaʼe apóstol Páblope. Haʼe oimoʼãneraʼe ndojapoihague iñamigokuéra ohaʼarõva chugui ha ndovaleiha mbaʼeverã (Filipenses 2:25-27; 4:18). Mbaʼéichapa oipytyvõ chupe pe apóstol Pablo?
Pablo omondo jey Epafrodítope Filípospe iñamigokuéra rendápe peteĩ kárta reheve, heʼíva: “Peguerohorýkena ichupe [Epafrodítope] Ñandejára rérape vyʼapópe”. Heʼi avei chupekuéra omombaʼe meme hag̃ua umi kuimbaʼe haʼeichaguávape (Filipenses 2:28-30, Versión Popular). Péicha oñeʼẽ porã haguére hese Pablo ha ojerresivihaguére chupe torýpe ha mborayhúpe Filípospe, katuete oipytyvõneraʼe Epafrodítope ohasa hag̃ua chugui vyʼaʼỹ.
Ajépa iporãite pe Ñandejára Ñeʼẽ heʼíva: “Peipytyvõ umi ikangývape”. Peteĩ kuñakarai ikangy ha ndovyʼaietereivaʼekue heʼi: “Oréningo roikotevẽ roikuaa oĩha ojepyʼapýva orerehe. Roikotevẽ ojeʼe oréve: ‘Aikuaa mbaʼéichapa reñeñandu; rekuera jeýta’”.
Pe ikangýva ohekavaʼerã peteĩ ijeroviaha ontendétava chupe. Upe tapicha ohendukuaavaʼerã ha ndojaheirivaʼerã hese. Ha ndahaʼeivaʼerã oñemoĩva oñemoñeʼẽ ha heʼi chupe: “Ndovaléi reñeñandu péicha”, térã “Nde voi ningo nereñehaʼãi”. Pe ikangýva noñeñanduporãi, ha oñeñeʼẽ pohýiramo chupe koʼýte oñeñandu vaivéta.
Pe ikangy ha ndovyʼaietereíva ikatu oimoʼã ndovaleiha mbaʼeverã (Jonás 4:3). Upéicharamo jepe, imanduʼavaʼerã mbaʼeichaitépa Ñandejára omombaʼe chupe. Oĩramo jepe heta heʼivaʼekue Jesús rehe ‘ndovaleiha mbaʼeverã’, upéva nokambiái pe haʼe ovaléva Ñandejárape g̃uarã (Isaías 53:3). Ñandejára ohayhuháicha Itaʼýrape, haʼe katuete ndéve avei nderayhu (Juan 3:16).
Jesús oiporiahuverekovaʼekue umi ohasa asývape ha oñehaʼã ohechauka chupekuéra mbaʼépa pe ovaléva hikuái (Mateo 9:36; 11:28-30; 14:14). Heʼi chupekuéra Ñandejára omombaʼeha umi gorrión michĩʼíva jepe. Jesús heʼi ‘Ñandejára ndahesarairiha chuguikuéra’. Ha mbaʼeichaitépa upéicharõ omombaʼéta yvypóra oñehaʼãvape ojapo Haʼe oipotáva! Jesús heʼi: “Mbovýpa pene akãrague jepe haʼe oikuaa” (Lucas 12:6, 7).
Pe ikangýva ha ojejopy asýva hembiapo vaikuére ikatu ndogueroviaséi Ñandejára omombaʼeha chupe. Ikatu añetehápe oimoʼã nomereseiha Ñandejára ohayhu chupe ni ojepyʼapy hese. Ñandejára Ñeʼẽ heʼi sapyʼánte ikatuha ‘ñane korasõ ñanekondena’. Upéicharõ, heʼisépa upéva ndaikatuveimaha jajapo mbaʼeve? Nahániri. Ñandejára oikuaa peteĩ yvypóra pekadór ikatuha oĩmoʼã ndovaleiha mbaʼeverã ha oñekondena ijupe voi. Upévare Ñandejára Ñeʼẽ ñanekonsola péicha heʼívo Ñandejára ‘tuichaveha ñande pyʼapýgui, ha oikuaaha opa mbaʼe’ (1 Juan 3:19, 20).
Ñande Ru yvagapegua ñanderayhuetéva nomañái ñane rembiapo vai ha ñande pekádore añónte. Haʼéningo ohechakuaa ikatuha oĩ umi mbaʼe ñandegueraháva jajapo hag̃ua ivaíva, oikuaa mbaʼéichapa jaiko, mbaʼérepa ha maʼerãpa jajapo peteĩ mbaʼe. Oikuaa avei ñandéve oñembohasahague pekádo, mbaʼasy ha ñemano, ha upévare ndaikatuiha jajapo porã heta mbaʼe. Ñanekangy ha ndajavyʼáiramo jajavyhaguére, jahechaukañaína ndajajaposeiha ivaíva ha ndahaʼeiha ñaime vaietereíva. La Biblia heʼi ndahaʼeiha ñande jaipotágui ‘japytáva pekádo poguýpe’. Upévare Ñandejára ñanembyasy ohechávo jahasa asy ha oikuaávo ñanekangyha ñandeporiahuvereko (Romanos 5:12; 8:20).
La Biblia heʼi Jehová ‘imbaʼeporã ha oporoporiahuverekoha’. “Kuarahyresẽ mombyryháicha kuarahyreikégui, upéicha omomombyry ñandehegui ñane rembiapo vaikue. [...] Haʼe oikuaa mbaʼéguipa ñandeaporakaʼe, oikuaa porã yvynteha voi ñande.” (Salmo 103:8, 12, 14.) Añetehápe Jehová haʼe pe ‘Ñandejára tapia oporokonsoláva, ñanekonsola opa ñande jepyʼapýpe’ (2 Corintios 1:3, 4, VP).
Umi ikangýva ha ndovyʼaietereíva ohupytýta pe oikotevẽva oñemoag̃uírõ Ñandejára ñandeporiahuverekóvare. Avei ojapóramo pe heʼíva chupe ha ‘omoĩramo Ñandejára pópe umi mbaʼe oipyʼapýva chupe’. Katuete Ñandejára ikatu ‘omokyreʼỹ ha ombovyʼa jey umi ojejopývape’ (Salmo 55:23; Isaías 57:15). Upévare Ñandejára Ñeʼẽ ñanemokyreʼỹ ñañemboʼe hag̃ua heʼívo: ‘Opa pejepyʼapyha peheja Ñandejárape. Haʼe omaʼẽ penderehe’ (1 Pedro 5:7). Ñañemboʼe rupi ikatu ñañemoag̃ui Ñandejárare, ha ‘omeʼẽne ñandéve ipyʼaguapy tuichavéva opa ikatuvaʼerãgui yvypóra ohaʼarõ’ (Filipenses 4:6, 7; Salmo 16:8, 9).
Avei jajapóramo umi mbaʼe ñaikotevẽva ñande rekovépe, ikatu ñanepytyvõ ñaime porã jey hag̃ua ñanekangy jave. Iporã jajapo ehersísio, jaʼu tembiʼu iporãva, jarrespira yvytu potĩ, japytuʼu porã ha ani jahechaiterei televisión. Peteĩ kuñakarai oipytyvõ hag̃ua umi ndovyʼaietereívape ogueraha omboguata chupekuéra. Peteĩ ikangýva heʼírõ guare chupe: “Ndahaséiniko aguata”, haʼe ombohovái vevuimi chupe, ha ohendu porã hag̃uáicha heʼi: “Jaháta”. Ha upéi omombeʼu: ‘Roguata seis kilómetro. Ha rojukuévo, haʼe ikaneʼõ, péro oñeñandu porãve. Jajapo rire peteĩ ehersísio mbarete porã mante ikatúta jaikuaa mbaʼeichaitépa ñanepytyvõ’.
Upéicharamo jepe, sapyʼánte hasy jakueraite hag̃ua ko mbaʼasýgui, jajapórõ jepe opa mbaʼe ojeʼéva ñandéve, ha jasegi umi tratamiénto médiko. Peteĩ kuñakarai heʼi: “Ajapóma opa mbaʼe, ha ndakuerái gueteri”. Upéicha avei, sapyʼánte ndaikatúi oñemonguera umi ndohecháiva, nohendúiva térã ikarẽvape. Péro pe ikangýva olee pyʼỹirõ Ñandejára Ñeʼẽ oñekonsoláta ha omeʼẽta chupe esperánsa, ojepeʼapataha opa ára g̃uarã opaichagua mbaʼasy (Romanos 12:12; 15:4).
Ndaiporivéi vove ikangýva ha ndovyʼaietereíva
Omombeʼúrõ guare Jesús umi mbaʼe vaiete oikótava ko Yvy ape ári pe ára pahápe, heʼi: “Oñepyrũvo oiko koʼã mbaʼe, pejeroviánteke ha pemopuʼã pene akã. Pyaʼetéma pejepeʼatahína jejopy vaígui” (Lucas 21:28). Koʼápe Jesús heʼi jajepeʼataha pe jejopýgui ha upéicha jaike Ñandejára múndo pyahúpe, oĩtahápe tekojoja. Upépe opa yvyporakuéra ojeíta pe ñembyai poguýgui ohupyty hag̃ua Ñandejára raʼykuéra liverta iporãmba jepéva (Romanos 8:21).
Tuichaitépa ñandepiroʼýta jahecha vove ojei ñandehegui umi mbaʼe pohýi jahasavaʼekue, ha koʼẽ koʼẽre japáy pyʼaguapy reheve ha ñanderetiaʼe jajapo hag̃ua ñane rembiapo! Avavéma naikangymoʼãvéi. Ñandejára opromete yvypórape ‘omokãtaha hesaykuéra, ndaiporiveitamaha mano, térã tasẽ, térã jaheʼo, térã mbaʼasy, opa umi mbaʼe yma oĩvaʼekue ohasapátama’ (Revelación 21:3, 4).
Ñandejára Ñeʼẽ ojeporúva oñeguenohẽ Sociedad Bíblica Paraguaya-gui, ortografía actualizada, upeichaʼỹramo oñemombeʼu mbaʼe traduksiónpa ojeporu.