Eiko vyʼápe ne familia ndive
Ikatúpa añete familia-kuéra oiko vyʼápe?
Mbaʼeichaitépa ikatu upéva?
Reikuaápa peteĩ familia oikóva vyʼa ha joajúpe rehechaháicha ko kuatiápe? Opárupi jahecha mbaʼéichapa heta familia isarambipa ohóvo. Oĩ ména ha tembireko ojuejáva, heta oĩ okyhyjéva oñemosẽrõ g̃uarã imbaʼapohágui, oĩ avei túva térã sy oiko asýva opyta haguére haʼeño; umíva oĩ umi mbaʼe ijetuʼúva apytépe. Peteĩ iñarandúva familia reheguápe oñembyasývo heʼi: “Koʼág̃a opárupi ojehecháma pe yma guive ojeʼevaʼekue: familia-kuéra isarambipáta ohóvo”. Mbaʼérepa familia-kuéra koʼag̃agua ojejopy heta mbaʼe vaíre? Mbaʼéichapa ikatu jareko vyʼa ñane familia apytépe?
Mbaʼéichapa oñepyrũ pe familia
Ikatu hag̃ua ñambohovái ã porandu, tekotevẽ jaikuaa mbaʼéichapa oñepyrũrakaʼe pe ñemenda ha upe jeiko peteĩ familia-pe. Oĩramo peteĩ omoñepyrũvaʼekue pe familia - peteĩ Ijapohare - opa familia ohekavaʼerã chupe oikuaa hag̃ua mbaʼéichapa oikovaʼerã hikuái oñondivepa. Katuete haʼe oikuaavéta opavavégui mbaʼéicha ikatu jareko vyʼa ñane familia apytépe.
Heta oĩ oimoʼãva pe familia ndoguerekoiha ijapohare. Peteĩ kuatiañeʼẽ hérava The Enciclopedia Americana heʼi: “Oĩ iñarandúva oimoʼãva ñemenda oñepyrũ hague ojehecha rire mbaʼéichapa oiko mymbakuéra; mymbakuéra oikomavaʼekue oñondive oĩ mboyve kuimbaʼe ha kuña”. Jesucristo katu heʼi kuimbaʼe ha kuña oguereko hague ijapohare. Oiporu mburuvicháicha ojehaivaʼekue Biblia-pe ha heʼi: “Yvypóra ndoipeʼái vaerã ojuehegui umi Tupã ombojoaju vaekue”. (Mateo 19:4-6.)
Jesucristo oñeʼẽ hendaitépe. Peteĩ Apohare iñarandúva ojapoʼakue peteĩ kuimbaʼe ha peteĩ kuña ha omeʼẽ chupekuéra oikotevẽva oguereko hag̃ua vyʼa hogapýpe. Ñandejára omomenda chupekuéra ha heʼi: ‘kuimbaʼe ojoajuvaʼerã hembireko ndive ha oikovaʼerã mokõivégui peteĩ tekovénte’. (Génesis 2: 22-24.) Upévare, ikatúnepa umi problema ohasáva koʼág̃a heta familia oĩ ndojapói haguére hikuái Ñandejára heʼíva Iñeʼẽme?
Mbaʼéichapa ikatu ñane familia osẽ porã?
Oiméne reikuaa, ko mundo ag̃agua omotenonde iporãrõguáicha pe egoísmo térã takateʼỹ ha ombotuicha avei arandu ha katupyry jehupyty. “Pe taryrýi virúre ojapo porã ñande rehe - heʼi karai pirapire omombaʼapóva oñeʼẽrõ guare peteĩ atyhápe oĩháme norteamericano-kuéra omohuʼãva universidad -. Ikatu ñande taryrýi ha upevére ñañeñandu porã.” Vaichárõ jepe upéicha, viru rapykuérinte jaikórõ nañasẽporãi. Añetehápe, pe materialismo oĩ umi mbaʼe ivaivéva familia-kuérape g̃uarã. Omokangy pe jeiko porã oñondive, oipeʼa tiempo ñandehegui ha ndohejái hetave mbaʼe jajapo. Ehechamína koʼág̃a mokõi ñeʼẽ arandu oĩva Biblia-pe ohechaukáva mbaʼépa ñaikotevẽ jaguereko hag̃ua vyʼa.
“Iporãve jaʼu kumanda ñande rayhúva ndive jaʼu rangue soʼo kyra ñande rayhuʼỹva ndive”.
“Iporãve mandiʼo nandi jeiko porã reheve tembiʼu hetágui, ñañorairõ reheve”.
Imbarete koʼã ñeʼẽ, ajépa? Epensamína mbaʼéichapa ikatúta iporãve ko mundo opavave familia omombaʼeguasúrõ ã ñemoñeʼẽ. Biblia avei ohekomboʼe porã familia-kuérape mbaʼéichapa ojoguerahavaʼerã oñondive! Ehechamína koʼã ñemoñeʼẽ mbovymi omeʼẽva:
Menakuéra: “Ohayhu vaerã hembireko kuérape, haʼe kuéra ojehayhuháicha ijupe voi”. (Efesios 5:28-30.)
Ndahasýi vaicha ko ñemoñeʼẽ. Upeichavére, jajapórõ upe heʼíva, ñasẽ porã katuete. Biblia avei heʼi ménape omombaʼeguasuvaʼerãha hembirekópe. (1 Pedro 3:7.) Upearã, ombojeroviavaʼerã chupe, oñangareko asy vaʼerã, ha oiporuvaʼerã hendive techakuaa, ikatu hag̃uáicha hembireko ovyʼa. Avei ohendu ha omombaʼe kuaavaʼerã hembireko heʼíva. (Embojoja Génesis 21:12-re.) Vaichápa ndéve avei umi familia-kuéra ikatutaha oiko porãve menakuéra oñangareko porãrõ hembirekóre, oipotaháicha avei oñeñangareko porã hesekuéra? (Mateo 7:12.)
Tembirekokuéra: “Tembireko kuéra tomombaʼe iménape”. (Efesios 5:33.)
Tembireko ombovyʼavéta ifamilia-pe oipytyvõrõ iménape hembiapokuérape. Péicha oipota Ñandejára, omeʼẽvaʼekue kuñáme “oipytyvõ hag̃ua kuimbaʼépe”. (Génesis 2:18.) Rehechakuaápa nde mbaʼéicha ikatu tembirekokuéra omoporãve ifamilia omombaʼérõ iménape, oñemoĩrõ ijykére ha oipytyvõrõ chupe ohupyty hag̃ua umi mbaʼe oipotáva ifamilia-pe g̃uarã?
Peẽ pemendáva: “Opavave tomombaʼe ñemenda, ha ani omyakãratĩ hembirekópe”. (Hebreos 13:4.)
Familia-kuéra katuetei imbaretevéta oĩháme jeroviapy. Pyʼỹinte ñemoakãratĩ ohundi heta familia-kuéra. (Proverbios 6:27-29, 32.) Upévare, Biblia omeʼẽ ko ñemoñeʼẽ arandu: “Evyʼa ne rembireko ndive pe kuña remenda hague, ne mitãme gueteri[...], mbaʼérepa nde akã rakúta nde rapicha rembireko rehe”. (Proverbios 5:18-20.)
Tuvakuéra: “Mitãme ehechauka michĩreve haperã”. (Proverbios 22:6.)
Familia-kuéra katuete oĩ porãvéta tuvakuéra oikovérõ itaʼyrakuérandive ha ojesarekórõ hesekuéra. Upévare, Biblia omokyreʼỹ tuvakuérape omboʼe hag̃ua chupekuéra ñemoñeʼẽ porã ‘oĩ jave hógape, oĩ vove tapére, oñeno ha opuʼã jave’ (Deuteronomio 11:19.) Biblia heʼi avei tuvakuéra omboheko porã vaʼerãha taʼyrakuérape ohayhúgui chupekuéra. (Efesios 6:4.)
Taʼyrakuéra: “Peẽ taʼýra ha tajýra kuéra, pemombaʼéke pende ru ha pende sýpe pejeroviáre Crístore”. ( Efesios 6:1.)
Añetéko, nde mitãrusu; ko mundo ikatuʼỹvape oñegoberna, sapyʼánte ikatu hasy rejapo ojeruréva ndehegui nde ru ha nde sy. Upéicharõ jepe, naiporãvéipa jajapo pe familia Apohare oipotaháicha? Haʼe oikuaa mbaʼépa iporãve jareko hag̃ua vyʼa ñane familia apytépe. Upévare, eñehaʼã ejapo nde sy ha nde ru heʼíva. Ejepytaso ha ejere umi heta mbaʼe vaígui, ko mundo ohechaukáva. (Proverbios 1:10-19.)
Opavave ñande rogapýpe ojapórõ koʼã ñemoñeʼẽ oĩva Biblia-pe, ñane familia-kuéra oho porãvéta. Ha ndahaʼéi koʼãgante reiko porãtava ne familia ndive; avei reguerekóta peteĩ tenonderã iporãitereíva upe mundo pyahu Ñandejára oprometévape. (2 Pedro 3:13; Revelación 21:3, 4.) Upévare jajepokuaa vaʼerã ñañemoarandu Biblia-re ñande rogapýpe. Hetaiterei familia ko yvy ape ári ohecha iporãiterei tekomboʼe omeʼẽva peteĩ kuatiañeʼẽ hérava El secreto de la felicidad familiar.
Ñandejára Ñeʼẽ ojeporúva oñerenohẽ Sociedad Bíblica Paraguaya traducción-gui. Upeichaʼỹramo, oñemombeʼu texto bíblico ykére mbaʼe traducción-pa ojeporu.