Mávapa añetehápe oisãmbyhy ko múndo?
Heta ñande rapicha ombohováita ko porandu heʼívo: Ñandejára. Upéicharamo jepe, la Biblia ndeʼíri ni peteĩ hendápe Jesucristo térã Itúva oisãmbyhyha ko múndo. Upéva rangue, Jesús heʼivaʼekue: “Ko múndo ruvicha oñemosẽta”. Heʼi avei: “Ou ko múndo ruvicha. Haʼe ndaipuʼakái mbaʼevetépe cherehe” (Juan 12:31; 14:30; 16:11).
Upéicharõ pe oisãmbyhýva ko múndo oñemoĩhína Jesucrístore. Ha máva piko ko múndo ruvicha?
Ko múndope oikóva ohechauka mávapa pe oisãmbyhýva
Oĩrõ jepe tapichakuéra oñehaʼãva ojapo pe iporãva, ko múndope hetaitereíma ojehasa asy. Heta oĩ ojepyʼamongetáva upévare ojapohaguéicha pe periodísta David Lawrence: “‘Pyʼaguapy ko Yvy ape ári’: Opavave nunga oipota upéva. ‘Mbaʼeporã ñande rapichakuéra ndive’: Haimete opavave oĩva ko múndope imbaʼeporã oñondive. Ha upéicharõ, mbaʼe piko pe oikóva? Oikosérõ jepe pyʼaguapýpe umi tetãnguéra, mbaʼére piko oĩ umi oñorairõséva?”.
Haʼete ku noĩporãiva pe ojapóva hikuái, ajépa? Oikosérõ jepe pyʼaguapýpe, yvyporakuéra ndaijaʼéi jepi ojuehe ha ojojuka hikuái pyʼahatãme. Epensamíntena mbaʼeichaitépa ojojuka hikuái mbaʼeveʼỹrõguáicha. Yvypóra ipyʼahatãgui oporojuka hag̃ua oiporu gás, umi lugár oporombohasa asy hag̃ua (campos de concentración), árma ha vómba oporohapýva ha hetave mbaʼe ivaietereíva.
Ndépa reimoʼã yvyporakuéra, oikoséva pyʼaguapy ha vyʼápe, ojapoha ijehegui reínte koʼã mbaʼe vaieta hapicháre? Mávapa ojapouka yvypórape koʼãichagua mbaʼe vai, térã mbaʼépa omomỹi chupekuéra ojapo hag̃ua? Nde oiméne reñeporandúmava: Oĩnepa umi tekove aña imbarete ha ndajahecháiva omomỹiva yvypórape ojapo hag̃ua koʼã mbaʼe vai?
Mávapa hína umi oisãmbyhýva ko múndo
Ñandejára Ñeʼẽ omyesakã porã ñandéve yvyporakuéra ha tetãnguéra oĩha peteĩ iñarandu ha jahechaʼỹva poguýpe. Heʼi “ko múndo oĩmbaha aña poguýpe”. Ha ohechauka mávapa heʼívo hese heraha Diablo ha “Satanás, pe ombotavýva opa yvyporakuérape” (1 Juan 5:19; Revelación 12:9).
Jesúspe otentárõ guare Satanás ndeʼirivaʼekue Satanás ndahaʼeiha ko múndo ruvicha. La Biblia omombeʼu pe oikovaʼekue: “Pe aña ogueraha jevy ichupe peteĩ sérro ijyvatetereíva ári, ha ohechauka ichupe opa tetãnguéra yvy arigua, ha umi mbaʼe porãita ipypegua, ha heʼi chupe: ‘Che ameʼẽmbáta ndéve koʼã mbaʼe, reñesũramo cherenondépe ha chemombaʼeguasu’. Jesús katu heʼi chupe: ‘Ejei koʼágui, Satanás’” (Mateo 4:1, 8-10).
Epensamína upévare. Satanás otenta Jesúspe oikuaveʼẽvo chupe “opa tetãnguéra yvy arigua”. Ha ndahaʼéiramo Satanás pe oisãmbyhýva koʼã rréino, otentánepa Jesúspe pe oikuaveʼẽva reheve? Nahániri. Jesús ndeʼíri umi goviérno ndahaʼeiha Satanás mbaʼe. Heʼivaʼerãmoʼã upéva Satanás ndoguerekóirire chupekuéra ipoguýpe. Upéicharõ, Satanás el Diablo oisãmbyhyhína ko múndo ojehechaʼỹre chupe. La Biblia ohenói avei chupe “ko múndo ruvicha” (2 Corintios 4:4). Péro, mbaʼéicha rupípa ipoderosoite peteĩ iñañaitereíva?
Satanás haʼevaʼekue yma peteĩ ánhel Ñandejára ojapovaʼekue, ha upéi oñepyrũ oikose Ñandejáraicha. Opuʼã pe Ñandejára sãmbyhýre. Upearã, oñeʼẽ peteĩ mbói rupive ombotavy hag̃ua Évape, ha upéicha ojapouka chupe ha iména Adánpe haʼe oipotáva, ojaporangue hikuái Ñandejára heʼíva (Génesis 3:1-6; 2 Corintios 11:3). Satanás heʼivaʼekue avei ikatutaha oipeʼa Ñandejáragui opa Adán ha Eva ñemoñare. Upévare, Ñandejára oheja Satanáspe ohechauka hag̃ua añetépa pe heʼíva, péro Satanás ndaikatúi ohechauka upéva (Job 1:6-12; 2:1-10).
Avei jaikuaavaʼerã Satanás ndahaʼeiha haʼeñónte oisãmbyhýva ko múndo. Haʼe oguerahavaʼekue hapykuéri heta ánhelpe oñemoĩ hag̃ua hendive Ñandejárare. Koʼãvagui oiko demónio, ha omoirũ hikuái Satanáspe. Oñeʼẽvo la Biblia hesekuéra heʼi kristianokuérape: ‘Peime hatã ani hag̃ua penembotavy aña. Ndahaʼéigui ñañorairõva yvyporakuéra ndive, ñañorairõ katu umi mburuvicha ndive, umi oisãmbyhýva ko múndo oĩva pytũmbýpe ndive, umi espíritu aña yvagapegua ndive’ (Efesios 6:11, 12).
Eñemoĩke umi espíritu añáre
Koʼã espíritu aña oisãmbyhýva ko múndo oñehaʼãmbaite ombotavy opa yvypórape ha omomombyry hag̃ua chupekuéra Ñandejáragui. Haʼekuéra ogueroviaukase ñandéve ñande rekove ndopaiha ñamano rire, ohechauka porãramo jepe ñandéve Ñandejára Ñeʼẽ noñeñanduiha mbaʼeve oñemano rire (Génesis 2:17; 3:19; Ezequiel 18:4; Salmo 146:3, 4; Eclesiastés 9:5, 10). Ojejeruréramo peteĩ espiritístape oñeñeʼẽ hag̃ua peteĩ omanovaʼekue ndive, peteĩ espíritu aña ikatu ohaʼanga pe omanovaʼekue ñeʼẽ ha oñemongeta umi hogaygua térã iñamigokuéra oikovéva ndive. Upe “ñeʼẽ” ojoguárõ jepe pe omanovaʼekue ñeʼẽme, añetehápe peteĩ demónio oñeʼẽhína!
Upévare, rehendúrõ sapyʼánte upeichagua “ñeʼẽ”, aníke reheja nembotavy. Ani rehendu heʼíva, ha ere Jesús heʼihaguéicha: “Ejei koʼágui, Satanás!” (Mateo 4:10; Santiago 4:7). Ani reikuaaségui rei umi espíritu ojapóva rejeheʼa umi espíritu añáre. Upéva héra espiritísmo, ha Ñandejára heʼi hembiguaikuérape ojei hag̃ua opaichagua espiritísmogui. La Biblia heʼi Ñandejárape g̃uarã ivaiha ojeporu adivinasión, ojeho umi espiritísta térã paje apohápe, térã umi oikuaáva pe oikótava rendápe, térã umi oporandúva omanovaʼekuépe rendápe (Deuteronomio 18:10-12; Gálatas 5:19-21; Revelación 21:8).
Pe espiritísmo omoĩ rupi tapichakuérape aña poguýpe, reñemoĩ mbarete vaʼerã hese ani hag̃ua reiporu, haʼetéramo jepe iporã ha oporombovyʼáva. Koʼã mbaʼe apytépe oĩ adivinasión, umi omoñeʼẽva varáha (pruevéra), omañáva ñande póre (quiromancia), horóscopo jelee ha astrolohía. Umi óga demoniokuéra oĩháme oñehendu jepi tyapu, ha ojehecha ha oñeñandu avei heta mbaʼe haʼekuéra ojapóva.
Avei, umi espirítu aña oiporu umi mbaʼe vai yvypóra ojaposéva omosarambi hag̃ua kuatiañeʼẽ, cine ha televisión rupive heta mbaʼe tieʼỹ ha teko vai rehegua. Umi demónio oikuaa yvyporakuéra ndoipeʼáirõ iñakãgui umi mbaʼe vai hoʼataha teko vaípe haʼekuéraicha avei (Génesis 6:1, 2; 1 Tesalonicenses 4:3-8; Judas 6).
Ikatu oĩ heta opukáva ojeʼérõ umi espíritu aña oisãmbyhyha ko múndo. Upéva katu ñande ndajahecharamói la Biblia heʼi rupi: ‘Satanás voi oiko ánhel omimbipávaramo’ (2 Corintios 11:14). Ha tuichave oporombotavy hag̃ua ogueroviauka hetápe haʼe ha idemoniokuéra ndaiporiha. Upévare ani reheja nembotavy hikuái. Satanás ha idemoniokuéra añetehápe oĩ ha reñemoĩ meme vaʼerã hesekuéra (1 Pedro 5:8, 9).
Javyʼaveha katu, hiʼag̃uíma pe ára Satanás ha hembiguaikuéra oñehundipa hag̃ua! La Biblia heʼi: “Ko múndo niko opavaʼerã [upévape oike Satanás ha idemoniokuéra avei], opa koʼã mbaʼe ojehayhúva ipype oĩva reheve, pe ojapóva [...] Ñandejára rembipota katu opytavaʼerã,” opa ára g̃uarã (1 Juan 2:17). Mbaʼeichaite piko ñandepiroʼýta ndaiporivéi vove pe aña! Upévare, ñañehaʼãkena ñaĩme umi Ñandejára rembipota ojapóva apytépe jahupyty hag̃ua jeikove opaʼỹva pe múndo pyahúpe (Salmo 37:9-11, 29; 2 Pedro 3:13; Revelación 21:3, 4).
Ñandejára Ñeʼẽ ojeporúva oñeguenohẽ Versión Populárgui, ortografía actualizada, upeichaʼỹramo oñemombeʼu mbaʼe traduksiónpa ojeporu.
[Nóta oĩva taʼanga ndive páhina 4]
Ikatuvaʼerãmoʼãpa Satanás oikuaveʼẽ Jesúspe koʼã goviérno ndahaʼéirire imbaʼe?