Erresalta hendaitépe releévo umi téxto

REMOMBEʼU jave umi mbaʼe porã Ñandejára ojapótava ko yvýpe g̃uarã, tahaʼe repredika jave térã kongregasiónpe, umi mbaʼe eréva oñemopyenda vaʼerã la Bíbliape. Upévare pyʼỹi tekotevẽta relee la Biblia ha rejapo vaʼerã upéva hekoitépe.

Relee vaʼerã con sentimiénto. Ñamoĩ chupe releetaha Salmo 37:11, upéicharõ nde vos rehe ojekuaa vaʼerã revyʼaha, iporãitereígui pe esperánsa oĩva upépe. Ha releétaramo Apocalipsis 21:4, nde vos rehe ojekuaa vaʼerã mbaʼeichaitépa reagradese Ñandejárape oipeʼáta haguére opaichagua jehasa asy ha ñemano. Péro releétaramo Apocalipsis 18:2, 4, 5 heʼihápe ñasẽ vaʼerãha ‘Babilonia Guasúgui’, nde vos rehe ojekuaa vaʼerã pyaʼe jajapo vaʼerãha upéva. Upéicharamo jepe, nemanduʼa vaʼerã umi sentimiénto rehechaukáva relee jave umi téxto osẽ vaʼerãha nde pyʼaite guive ha ani rexahera. Reikuaa hag̃ua mbaʼe tónopepa releéta, odepende hína mbaʼépa heʼi pe téxto ha mbaʼépa rehupytyse upéva rupive.

Rerresalta vaʼerã umi palávra iñimportánteva. Remyesakãtaramo peteĩ pártente pe téxtogui, upéicharõ rerresalta vaʼerã upe palávra relee jave. Por ehémplo, releétaramo Mateo 6:33 remyesakã hag̃ua mbaʼépa heʼise ‘ñamotenonde meme Ñandejára Rréino’, ani rerresalta ‘Ñandejára hustísia’, ni ‘oñemeʼẽtaha ñandéve opa mbaʼe’.

Ñamoĩ chupe rejapotaha peteĩ diskúrso ha remokyreʼỹta umi nerendúvape ojapo hag̃ua estúdio vívliko. Upearã releéta Mateo 28:19, ¿mbaʼe pártepa rerresalta vaʼerã? Pe párte heʼihápe “tapeho pemboʼe umi hénte”. Péro rehechaukaséramo iñimportanteha japredika umi extranhérope térã tekotevẽha java japredika hag̃ua ótro lugárpe, upéicharõ rerresalta vaʼerã pe párte heʼíva ‘pemboʼe opa tetãyguápe’.

Heta vése jaiporu la Biblia ñambohovái hag̃ua peteĩ porandu térã jahechauka hag̃ua japuha peteĩ enseñánsa ojegueroviáva. Péicha jave ani rerresalta pe versíkulo kompletoite, síno pe palávra iñimportantevévante. Nderejapóiramo péicha umi nerendúva ndopillamoʼãi mbaʼéichapa pe téxto omopyenda pe eréva hína.

Ñamoĩ chupe releetaha Juan 3:16 rehechauka hag̃ua mbaʼépa tekotevẽ jajapo jaikove hag̃ua opa árare, upéicharõ rerresalta vaʼerã pe párte heʼihápe “umi hese ojeroviáva”. Péro releéramo upe téxto remyesakã hag̃ua ikatuha jaikove opa árare, upéicharõ rerresalta vaʼerã “jeikove opaveʼỹva”. Upéicha avei, releétaramo Santiago 2:24 remyesakã hag̃ua mbaʼéichapa jahechauka vaʼerã jajeroviaha, ¿mbaʼe pártepa rerresaltáta? Pe párte heʼihápe “hembiapo rupive”. Pórke rerresaltáramo ‘ojeʼéta hekojojaha’, umi nerendúva nontendemoʼãi la ereséva.

Ótro ehémplo jareko Romanos 15:7-13-pe. Jaikuaaháicha apóstol Pablo oskrivi ko kárta peteĩ kongregasión oĩháme hudío ha umi hénte ótro tetãygua. Upépe apóstol Pablo omyesakã Cristo ojapo vaʼekue ndahaʼéi ideprovéchova umi hudíopente, síno avei ‘umi tetã ambueguápe’. Apóstol Pablo cuatro vése imanduʼa Ñandejára heʼi vaʼekuére orresalta hag̃ua pe oportunida oñemeʼẽva umi tetãnguérape. ¿Mbaʼéicha ikatu nde relee umi versíkulo remyesakã porã hag̃ua upe idéa? Ikatu remarka umi palávra tekotevẽva rerresalta, versíkulo 9-pe “umi tetã ambuegua”; versíkulo 10-pe “tetãnguéra”; versíkulo 11-pe “opa tetãnguéra” ha “entéro puévlo”, ha versíkulo 12-pe emarka jey “tetãnguérape”. Releekuévo erresalta umi palávra remarka vaʼekue, ha rehecháta mbaʼéichapa ndahasýi oñentende hag̃ua pe púnto omyesakã vaʼekue apóstol Pablo.

Mbaʼéichapa ikatu rerresalta. Oĩ heta mbaʼe ikatúva rejapo rerresalta hag̃ua peteĩ palávra térã fráse. Odepende pe téxto vívlikore ha ne témare reikuaa hag̃ua mbaʼéichapa rerresaltáta. Jahechami mbaʼéichapa ikatu rejapo upéva.

Ekambia mimi nde vos reñeʼẽ jave. Eiporavo umi palávra rerresaltaséva ha epronunsia hatãve térã mbegueve releekuévo.

Epausa tekotevẽhápe. Ikatu repausaʼimi relee mboyve, térã relee rire umi palávra iñimportánteva rerresaltaséva hína. Pe páusa rejapóva relee mboyve, ombokuriósota umi nerendúvape ha oikuaaséta hikuái mbaʼépa eréta upe rire. Pe páusa rejapóva relee rire katu oipytyvõ og̃uahẽve hag̃ua ikorasõmekuéra pe relee vaʼekue. Eñatendénte ani manterei rejapo koʼã páusa, pórke upéicha rejapóramo ndererresaltamoʼãi mbaʼeve.

Errepeti umi palávra. Ikatu rerrepeti umi palávra ha fráse reipotáva umi nerendúva imanduʼa, péro iporãvéta releepa raẽ pe versíkulo ha upéi errepeti umi palávra reiporavo vaʼekue.

Hésto ha séña. Umi hésto ha séña rejapóva relee aja ikatu omeʼẽve sentimiénto umi téxto releévape.

Ekambia ne tóno. Repronunsia jave umi palávra ha fráse, nde vos rehe ojekuaa vaʼerã oimépa rejerure asy peteĩ mbaʼe, haʼépa peteĩ porandu, peteĩ mandáto térã jejaʼo. Péro reñatende vaʼerã ani rehasa la rrája ha remoñeñandu vai umi nerendúvape.

Pe ogajára oleéramo pe téxto. Péicha jave ikatu haʼe oleévo ndorresaltái umi palávra iñimportánteva. ¿Mbaʼépa ikatu rejapo upéicharõ? Ikuentave remyesakã raẽ mbaʼépa heʼise pe téxto ha upéi ehechauka chupe umi palávra omopyendáva pe ere vaʼekue.