Eiporu peteĩ introduksión iñinteresánteva

IÑIMPORTANTETEREI rejapo porã ne introduksión, upéicha opavave ohendusevéta la nde diskúrso. Añetehápe ningo umi ermáno nosẽmoʼãi ohopa hese ikaiguéramo la ne introduksión, péro oñatende rangue nderehe oñepyrũta opensa ótra kosaitére. Predikasiónpe avei ndaigústoiramo la eréva ne introduksiónpe, umi hénte noñatendesemoʼãi nderehe.

Repreparávo umi fráse reiporútava ne introduksiónpe, rereko vaʼerã enkuénta koʼã mbaʼe: 1) ere peteĩ mbaʼe ointeresáva umi nerendúvape, 2) erresalta pe téma, ha 3) ehechauka mbaʼérepa iñimportánte pe téma chupekuéra g̃uarã. Sapyʼánte ikatu voi rejapo koʼã tres kósa unavetépe, péro ndaikatúiramo, rejapokuaa peteĩteĩnte.

Ere vaʼerã umi mbaʼe ointeresátava umi nerendúvape. Umi ermáno ohóramo jepe rreunionhápe ohendu hag̃ua umi diskúrso, upéva ndeʼiséi katuete oñatende porãtaha nderehe. ¿Mbaʼérepa? Pórke káda uno oreko heta mbaʼe oipyʼapýva chupekuéra. Ikatu oĩ orekóva provléma hogapýpe térã ótra kósa okevrantáva chupe. Upévare reikekuaa vaʼerã chupekuéra ikatu hag̃uáicha oñatende nderehe ha osegi oñekonsentra pe diskúrsore. ¿Mbaʼéichapa ikatu rejapo upéva?

Epensamína mbaʼéichapa Jesús omoñepyrũ vaʼekue pe diskúrso iporãitéva hérava Sermón del Mónte. Haʼe heʼi vaʼekue: “Pevyʼa peẽ imboriahúva [...]. Pevyʼa peẽ peneñembyahýiva hína koʼág̃a [...]. Pevyʼa peẽ penerasẽva koʼág̃a [...]. Pevyʼa umi hénte ndaijaʼéiramo penderehe” (Luc. 6:20-22). ¿Mbaʼérepa Jesús oñeʼẽ vaʼekue koʼã mbaʼére? Pórke haʼe oikuaa mbaʼépa ointeresa umi héntepe. Péro ndoikói oñeʼẽ pukueterei koʼã provlémare, síno ohechauka chupekuéra ohasa asýramo jepe lomímonte ikatuha ovyʼa.

Rejapóramo hendaitépe umi porandu, umi hénte oñeinteresavéta upe erévare. Péro reporandúramo peteĩ mbaʼe haʼekuéra oikuaámava voi, pyaʼeterei ojedistraéta hikuái. Ndovaléi avei reporandu umi mbaʼe ikatúva oofende térã omoñeñandu vai chupekuéra. Upéva rangue eñehaʼã emopensa umi nerendúvape. Iñimportánte avei remeʼẽʼimi tiémpo chupekuéra opensa hag̃ua mbaʼéichapa ikatu ombohovái pe porandu. Haʼekuéra oñatende porãramo nderehe, upéva heʼise ointeresaha chupekuéra la nde diskúrso.

Ikatu avei ne introduksiónpe remombeʼu peteĩ experiénsia, péro upéva ndaideprovechomoʼãi omoñeñandu vaíramo umi nerendúvape, térã noñentendéiramo mbaʼépa la remboʼeséva. Remombeʼúramo peteĩ experiénsia ne introduksiónpe, upéva ombohape vaʼerã umi idéa prinsipál remyesakãtava nde diskúrsope. Péro ani nderesarái ndovaleiha rembopuku rei remeʼẽgui hetaiterei detálle.

Oĩ diskursánte omombeʼúva iñintroduksiónpe peteĩ notísia osẽ ramoitéva, térã peteĩ mbaʼe heʼi vaʼekue peteĩ doktór térã sientífiko. Reiporukuaa umíva ohóramo ne témare ha ointeresátaramo umi nerendúvape.

Ikuentavéta isensíllo ha mbykymínte la ne introduksión otoka jave ndéve diskúrso peteĩ simpósiope, térã rerekótaramo párte pe Aty Ñanemboʼéva Japredika Hag̃uáme. Ha rejapóta jave diskúrso púvliko rerrespeta vaʼerã pe tiémpo oñemoĩva pe introduksiónpe g̃uarã, pórke pe informasión iñimportantevéva oñehesaʼỹijóta upe rireve.

Esteban rehe oiko haguéicha ikatu mbaʼe otoka ndéve reñeʼẽ heta hénte arhél ha ndojeroviáiva renondépe. Chupe ojegueraha vaʼekue pe Sanedrín renondépe ha pyʼaguasúpe odefende umi mbaʼe ogueroviáva. Péro oñeʼẽrõ guare haʼe ohechauka orrespetaha chupekuéra ha omombeʼu umi mbaʼe haʼekuéra ogueroviáva avei. Haʼe heʼi: “Che ru ha che ermanokuéra, cherendumína. Ñandejára hekomimbipáva ojechauka vaʼekue ñande ru ypykue Abrahánpe” (Hech. 6:3; 7:2). Ha Pablo oñeʼẽtarõ guare umi Atenasguápe, oiporavo porã umi mbaʼe heʼítava: “Kuimbaʼekuéra Atenasgua, opa mbaʼépe ahecha peẽ pekyhyjeveha ñandejarakuéragui ótro héntegui” (Hech. 17:22). Mokõivéva ojapo porã rupi iñintroduksión umi hénte oñatende porã hesekuéra oñeʼẽrõ guare.

Japredika jave tekotevẽ avei ñañeʼẽ umi mbaʼe ointeresávare umi héntepe, upéicharõmante ñanerenduséta hikuái. Ñanemanduʼa vaʼerã umi hénte ndoikuaaiha jahataha hogapekuéra ha katuete hembiapóne hikuái. Upévare ndovaléi jajereterei japredika hag̃ua chupekuéra. Péro oĩ avei lugár umi hénte ojepokuaaha oñemongetaʼimi raẽ pe visítandi, ha upe rire ae pe og̃uahẽva ikatu omombeʼu mbaʼérepa ovisita hína chupe (Luc. 10:5).

Péro siémpre iñimportánte ñanderory ñag̃uahẽvo japredika. Ha jaikuaa hag̃ua mbaʼérehepa ikatu ñañemongeta, ñañehaʼã vaʼerã japilla mbaʼépa ojapo térã opensa hína pe persóna. Epensamína, ¿mbaʼépa ojapo hína raʼe pe ogajára reg̃uahẽrõ guare? Ikatu oime ombaʼapo ikokuépe, ihardínpe, oarregla hiʼáuto térã imóto, okosina, ojohéi ijao térã oñatende mitãre. ¿Oleépa diário, ohendu rrádio térã omaña mbaʼépa oiko kállere? ¿Ojekuaápa umi mbaʼe oĩvare hógape ogustaha chupe peteĩ depórte, músika, umi komputadóra, ohoha jepi de viáhe térã peskádape? Avei umi hénte opyta jepi opensa umi mbaʼe ohendu vaʼekuére rrádiope térã télepe. Ñaporandúramo chupe koʼã mbaʼére ikatu pe persóna oñemongetaseve ñanendive.

Jesús avei ohechauka ñandéve mbaʼéicha ikatu ñañepyrũ ñañemongeta peteĩ persónandi. Haʼe oñeʼẽtarõ guare pe samaritánandi pe póso mátape, oreko enkuénta pe kuñakarai ojapóva hína (Juan 4:5-26).

Oĩ território ojepredikahápe manterei ha umichahápe koʼýte reprepara porã vaʼerã umi mbaʼe erétava ne introduksiónpe, osino ijetuʼúta ndéve repredika hag̃ua umi héntepe.

Erresalta porã pe téma. Otoka jave ndéve peteĩ párte térã diskúrso kongregasiónpe, pe presidénte térã ótro ermáno heʼíta mbaʼe títulopa oreko nde diskúrso. Upéicharõ jepe, reñepyrũvo iporãta nemanduʼa jeýramo nde diskúrso témare. Upearã ikatu rerrepeti jey pe título oĩhaichaite, térã reiporu ótra palávra remyesakãʼimi hag̃ua nde título. La iñimportánteva hína rerresalta jey pe téma ne introduksiónpe.

Jesús omondórõ guare idisipulokuérape opredika hag̃ua omyesakã porã chupekuéra mbaʼe mensáhepa oikuaauka vaʼerã: “Pe Rréino yvagapegua hiʼag̃uimbaitéma” (Mat. 10:7). Ha upéi omombeʼu avei mbaʼérehepa ñande ñañeʼẽ vaʼerã heʼívo: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári” (Mat. 24:14). Ojeʼe avei ñandéve ‘japredika vaʼerãha kyreʼỹme Ñandejára Ñeʼẽ’ (2 Tim. 4:2). Péro relee mboyve peteĩ téxto térã reñeʼẽ mboyve Ñandejára Rréinore, iporãta reñeʼẽramo peteĩ téma ointeresátavare umi héntepe. Por ehémplo, ikatu ere oĩha hetaiterei hénte ndaitraváhoiva, mondaha, inhustísia, gérra, mbaʼasy, térã jejuka. Péro nemanduʼa vaʼerã nde rehoha reikuaauka notísia porã, upévare ani reñeʼẽterei umi provlémarente, síno reñehaʼã vaʼerã rehechauka mbaʼe esperánsapa omeʼẽ la Biblia.

Ehechauka mbaʼérepa ideprovéchota la nde diskúrso. Jepe umi ermáno oho rreunionhápe oaprende hag̃ua, ndohechakuaáiramo mbaʼépepa ideprovéchota chupekuéra upe eréva, pyaʼeterei ojedistraéta. Upévare iporã reñeporandu: “¿Oipytyvõtapa chupekuéra pe informasión ameʼẽtava? ¿Omomýitapa chupekuéra okambia hag̃ua?”. Ideprovécho hag̃ua la nde diskúrso, repreparávo rereko vaʼerã enkuénta mbaʼe provlémapa ombohovái hikuái, mbaʼépa oipyʼapy chupekuéra ha mbaʼéichapa ikatu reipytyvõ porãve chupekuéra. Ha eñehaʼã ehechauka ne introduksiónpema voi pe informasión ideprovechotaha káda únope.

¿Mbaʼépa ikatu rejapo umi nerendúva oñeinteresave hag̃ua pe erévare? Tahaʼe rejapo jave diskúrso térã repredikáta jave, rehechauka vaʼerã umi konsého remeʼẽtava ikatuha oipytyvõ chupekuéra. Ehechauka umi nerendúvape mbaʼéichapa ikatu oiporu pe informasión ombohovái hag̃ua peteĩ provléma, peteĩ situasión ohasáva hikuái hogapýpe térã itravahohápe. Ne introduksiónpe haʼekuéra opilláma vaʼerã reñeʼẽtaha peteĩ témarente ha ndahaʼéi ku remyesakãtava hetaiterei mbaʼe. Upearã tekotevẽ rejeprepara porã.

Eñatendéke pe ere lája. Ne introduksiónpe ndahaʼéi umi mbaʼe erévante la iñimportánteva, síno avei mbaʼéichapa ere.

Reiporavo porã vaʼerã umi palávra reiporútava ne introduksiónpe, koʼýte umi fráse erétava reñepyrũ hag̃ua. Okonvenivéta ndéve mbyky ha isensílloramo umíva. Ha rejapótaramo diskúrso, ikatu voi reskrivi térã eñehaʼã ememorisa umi mbaʼe erétava. Péicha ikatúta reñeʼẽ kyreʼỹme ha con sentimiénto. Upéva iñimportanteterei, pórke reñepyrũ porãramo, reimétama trankilove nde diskúrso pukukue.

Mbaʼe moméntopepa reprepara vaʼerã ne introduksión. Oĩ heʼíva upéva raẽvete ojeprepara vaʼerãha. Péro ótro heʼi pe introduksión ojejapo vaʼerãha repreparapa rire nde voského ae.

Péro tuichaiterei nepytyvõta restudia raẽramo ne téma ha umi púnto prinsipál remyesakãtava reprepara mboyve ne introduksión. Ha oñemeʼẽramo ndéve peteĩ voského ha releepa rire oúramo ne akãme peteĩ idéa ne introduksiónpe g̃uarã, ikatúntema reanota. Nemanduʼákena repreparáta jave ne introduksión repensa vaʼerãha umi nerendútavare ha upe eréva oho vaʼerãha ne témare.