Ejasegura siertoha pe erétava

¿MBAʼÉREPA sapyʼánte ndaikatúi jajerovia guasu peteĩ persónare? Oiméne haʼe ojepokuaa orrepetínte umi mbaʼe ohendúva ha ndojasegurái siértopa hína la heʼíva. Térã oexahera peteĩ informasión nontendeporãigui mbaʼépa heʼise. Ani hag̃ua oiko nderehe upéva, rejapo jave diskúrso reñehaʼã vaʼerã remombeʼu opa mbaʼe oiko hagueichaite. Rejepokuaáramo rejasegura siertoha opa mbaʼe eréva, umi nerendúva ojeroviavéta katuete ne mensáhere.

Repredika jave. Heta estudiánte noñanimái jepi opredika opensa rupi ndoikuaaiha gueteri heta mbaʼe. Péro upéi ohechakuaa natekotevẽiha ivaleterei opredika porã hag̃ua. ¿Mbaʼépa oipytyvõ chupekuéra? Ojeprepara porã osẽ mboyve opredika.

Resẽ mboyve repredika repensáma vaʼerã mbaʼe témarepa reñeʼẽta ha ekalkula mbaʼépa ikatu oporandu ndéve umi hénte. Eprepara avei umi téxto reiporútava remyesakã hag̃ua haʼekuéra oikuaaséva, péicha reñeʼẽta trankílo porã ha rembohováita hesakuaitépe. Rejapóta jave estúdio katu, rerrepasa vaʼerã pe informasión pehesaʼỹijótava ha epensa mbaʼéichapa umi téxto omopyenda umi rrespuésta káda párrafope.

Nde travahohápe térã predikasiónpe oñeporandúramo ndéve peteĩ mbaʼe ndereikuaáiva, ¿mbaʼépa ikatu rejapo? Ani erénte oimeraẽ mbaʼe oúva ne akãme nderepytavaiséiguinte hendive. La Biblia omeʼẽ ko konsého: “Hekojojáva ojepyʼamongeta raẽ oñeʼẽ hag̃ua” (Prov. 15:28). Ikatu rehecha pepete mbaʼépa heʼi upe témare lívro Razonamiento, térã la Bíbliape pe párte héravape “Ñahesaʼỹijo hag̃ua”. Ndereguerekóiramo nendive koʼã puvlikasión, erekuaa chupe rehekavetaha informasión remyesakã hag̃ua la oikuaaséva. Pe persóna isinséra ha añetehápe oikuaaséramo mbaʼépa heʼi la Biblia, naiprovlemamoʼãi ohaʼarõ hag̃ua. Ha ikatu voi omombaʼeve pe mensáhe ohechakuaávo neumildeha.

Tuicha avei nepytyvõta resẽramo repredika umi ermáno ikatupyrývandi ha oiporukuaáva la Biblia. Ejesareko umi téxto oiporúvare hikuái ha mbaʼéichapa omyesakã umíva. Ejagarra porãnte omeʼẽramo ndéve peteĩ suherénsia térã heʼíramo ndéve mbaʼépepa ikatu remehora. Epensamína Apolos ehémplore, haʼe opredika vaʼekue kyreʼỹme ha oheja umi ótro ermáno ombokatupyry chupe. Lucas heʼi vaʼekue hese: “Apolos iñeʼẽkuaa [...] ha oikuaa porã Ñandejára Ñeʼẽ. Ha espíritu rupive kyreʼỹme oporomboʼe ha oñeʼẽ hekoitépe Jesús rehe”. Péro oĩ vaʼekue peteĩ mbaʼe haʼe nontendeporãiva gueteri, upémarõ ‘Priscila ha Áquila ogueraha Apólospe hendivekuéra ha omyesakã porãve chupe Ñandejára rape’ (Hech. 18:24-28).

Jaʼe vaʼerã pe añeteguánte. La Biblia heʼi: “Pe kongregasión ningo omopyenda ha ojoko pe añetegua”, upévare siertoguánte jaʼe vaʼerã jajapo jave ñane asignasión (1 Tim. 3:15). Ñamyesakã hag̃ua hekoitépe pe añetegua, tekotevẽ ñantende porã umi téxto jaleétava ñande diskúrsope. Ha jareko vaʼerã avei enkuénta umi versíkulo oĩva pe téxto mboyve ha upe rire, mbaʼe situasiónpepa ojeskrivi upe párte ha maʼerãpa.

Umi hénte ikatu orrepeti jey umi mbaʼe eréva nde diskúrsope, upévare rejasegura vaʼerã oĩ porãpa hína pe erétava. La Biblia heʼi: “Enterovéva ningo jajavy heta vése” (Sant. 3:2). Upéicha rupi rejepokuaa vaʼerã reinvestiga porã, ha ani remeʼẽntema peteĩ informasión reikuaa porãʼỹre. Heta ermáno oĩva ko eskuélape oprogresa ha oiko chuguikuéra ansiáno, upéva hína tuicha rresponsavilida ha oñehaʼãrõ okumpli porã hikuái hembiapo. La Biblia heʼi voi: ‘Pe oñemoĩvape ipoguýpe heta mbaʼe, pévandi ojejopyvéta’ (Luc. 12:48). Umi ansiáno opyta vaíta Jehová renondépe omeʼẽramo peteĩ konsého hendapeʼỹ ha ikáusare oĩramo provléma kongregasiónpe (Mat. 12:36, 37). Upévare haʼekuéra “oñakarama hatã vaʼerã pe ñeʼẽ añeteguáre oporomboʼe jave” (Tito 1:9).

Nde diskúrso jave opa mbaʼe eréva oho vaʼerã umi ñeʼẽ porãitére oĩvare la Bíbliape (2 Tim. 1:13). Ani repensa ndaikatumoʼãiha rejapo upéva, oiméramo neʼĩra relee la Biblia kompletoite, reñehaʼã vaʼerã releepa. Ha rerekóta jave párte kongregasiónpe eñehaʼã esegi koʼã suherénsia.

Primero eñeporandu: “¿Oho porãpa la Biblia heʼívandi ko informasión aiporútava? ¿Omokyreʼỹtapa umi ermánope ojeroviave hag̃ua Jehováre? ¿Térãpa omokyreʼỹta chupekuéra ojerovia hag̃ua yvyporakuéra heʼívare?”. Jesús ohechauka vaʼekue mbaʼépa pe iñimportantevéva heʼívo: “Ne ñeʼẽ hína pe añetegua” (Juan 17:17; Deut. 13:1-5; 1 Cor. 1:19-21). Upéi eiporu umi puvlikasión omeʼẽva pe tembiguái jeroviaha, umíva nepytyvõta rentende porã hag̃ua umi téxto vívliko ha remyesakã hag̃ua hekoitépe. Remopyendáramo la Bíbliape ha umi puvlikasiónpe opa mbaʼe eréva, nandejapumoʼãi remeʼẽ jave peteĩ konsého platafórma guive.

Ejasegura siértopa pe informasión reiporútava. Ikatúramo jepe nde diskúrsope reiporu peteĩ experiénsia térã peteĩ notísia, rejasegura vaʼerã siertoha la heʼíva umíva. Iporãta reiporúramo umi informasión ipyahuvéva. Nemanduʼa vaʼerã umi sientífiko ha doktór heʼíva manterei oñembopyahuha, ha avei pyʼỹinte oĩha hetave deskuvrimiénto omyesakãvéva umi istoriadór heʼíva. Epensa porãke avei reiporúta jave peteĩ informasión osẽ vaʼekue Internétpe, téle, rrádio, diário térã oñemondóva korréo elektróniko rupive. Ndareíri la Biblia heʼi: “Ivýrova oguerovia opa mbaʼe ohendúva, iñarandúva katu oñatende moõpa opyrũta” (Prov. 14:15). Upévare iporã rejepyʼamongeta koʼã mbaʼére: ¿Ojekuaápa koʼã persóna térã diário heʼíva siertoha? ¿Ikatúpa reinvestiga ótro hendápe rejasegura hag̃ua siértopa la heʼíva hikuái? Oiméramo nderejeroviaguasúi peteĩ informasiónre, ani reiporu.

Reñatende vaʼerã avei mbaʼéichapa reiporúta pe informasión retopa vaʼekue ha añetehápepa oho ne témare. Ani reexahera ni rekambia pe informasión ndegustaháicha oho hag̃uánte nde diskúrsore. Por ehémplo, heʼíramo “unos kuánto” ani ere “hetaiterei”, térã heʼíramo “heta” ani ere “enterove”, ni rekambia ha ere rangue “sapyʼánte” ere “siémpre”. Reikóramo rekambia umi detalleʼi jepe, amo ipahápe avavetéma nandegueroviamoʼãi.

Rejepokuaáramo siémpre ere siertoguánte, enterove ojeroviáta nderehe oikuaágui nandejapuiha. Péicha oñeñeʼẽ porãta Jehová organisasiónre, ha opa mbaʼe ári rembotuicháta Jehovápe, haʼéva hína “Ñandejára añeteguáva” (Sal. 31:5).