Kapítulo 1
Mbaʼépa koʼág̃a heʼise ñamombaʼeguasu Ñandejárape peteĩ ñeʼẽme?
1, 2. a) Mbaʼépa pe tuichaiterei mbaʼe oikovahína koʼág̃a? b) Mbaʼe mbaʼe iporãitereívapa ohaʼarõ koʼág̃a umi tapicha ipyʼaporãva?
KO Yvy ape ári oikohína peteĩ mbaʼe tuichaitereíva: oñembyaty hetaiterei tapichápe oúva opa tetã ha trívugui, ha oñeʼẽva opaichagua idióma oadora hag̃ua oñondivepa Ñandejárape. Káda áño hetave hikuái. Ñandejára Ñeʼẽme oñehenói chupekuéra testigos de Jehová, ha heʼi oĩha ‘peteĩ aty guasúpe’ oservíva chupe ára ha pyhare (Isaías 43:10-12; Apocalipsis [Revelación] 7:9-15). Mbaʼérepa ojapo hikuái ko mbaʼe? Oikuaa rupi Jehovápe, Ñandejára añetegua ha peteĩetéva. Upéva omomýi chupekuéra oiko hag̃ua Ñandejára oipotaháicha. Avei, oikuaa hikuái ko múndo aña og̃uahẽmaha ‘hiʼára pahápe’, ha koʼẽrõite Ñandejára ohunditaha omoĩ hag̃ua peteĩ múndo pyahu iporãitereíva (2 Timoteo 3:1-5, 13; 2 Pedro 3:10-13).
2 Ñandejára Ñeʼẽ heʼi: ‘Koʼẽrõite opátama iñañáva. [Heko porãvape] opytáta ko yvy, ha pyʼaguapýpe oikóta hikuái’ (Salmo 37:10, 11). ‘Heko potĩvape opytapáta ko yvy, ha upépe haʼekuéra oikóta opa árape.’ (Salmo 37:29.) “[Ñandejára] omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma niko ndaiporivéima.” (Apocalipsis [Revelación] 21:4.)
3. Mbaʼépa ojejapohína ojeadora hag̃ua Ñandejárape peteĩ ñeʼẽme?
3 Umi oñembyatýva koʼág̃a oadora hag̃ua Ñandejárape peteĩ ñeʼẽme, opytáta omoñepyrũ hag̃ua pe múndo pyahu. Oñemboʼéma chupekuéra Ñandejára oipotáva ha oñehaʼãmbaite ojapo upéicha. Ohechauka hag̃ua tekotevẽha jajapo ko mbaʼe, Jesús heʼivaʼekue: “Ha upe jeikove opaʼỹva niko kóva: Tandekuaa ndéve [Ñandejára] añete ha peteĩetéva, ha Jesucrístope, upe nde rembouvaʼekuépe” (Juan 17:3). Pe apóstol Juan ohaivaʼekue: “Ko múndo niko opavaʼerã, opa koʼã mbaʼe ojehayhúva ipype oĩva reheve, pe ojapóva Ñandejára rembipota katu opytavaʼerã tapia g̃uarã” (1 Juan 2:17, BNP).
Mbaʼépa heʼise ñamombaʼeguasu Ñandejárape peteĩ ñeʼẽme?
4. a) Mbaʼérepa koʼág̃a oñembyaty hetaiterei tapichápe omombaʼeguasu hag̃ua Ñandejárape peteĩ ñeʼẽme? b) Mbaʼéichapa heʼivaʼekue Ñandejára Ñeʼẽ oikotaha ko mbaʼe?
4 Mbaʼérepa oñembyatyhína koʼág̃a hetaiterei tapichápe omombaʼeguasu hag̃ua Ñandejárape peteĩ ñeʼẽme? Ko mbaʼe ohechauka ko múndo aña oñehundipotaitemaha, ha upe rire oĩtaha peteĩ múndo pyahu. Ñande jahecha mbaʼéichapa oñembyatyhína tapichakuérape ojeʼehaguéicha Ñandejára Ñeʼẽme. Umíva apytépe oĩ ko profesía: “Umi ára pahápe [koʼã ára jaikoha] yvyty [térã montáña] opuʼãháme Ñandejára Róga [pe adorasión añetéva] oñemoĩta opa yvyty ári [opaichagua adorasión ári]. Upéva ijyvatevéta opa yvytýgui. Opa tetãmegua hendápe og̃uahẽta. Heta umi tetã oútava heʼívo: ‘Jaha jajupi Ñandejára yvytýpe, Israelgua [Ñandejára] Rógape, ohechaukáta ñandéve hape, ha hape rupi jaguatáta’ ” (Miqueas 4:1, 2; Salmo 37:34).
5, 6. a) Mbaʼérepa ikatu jaʼe umi tetã ouha oadora hag̃ua Jehovápe? b) Mbaʼépa ñañeporanduvaʼerã?
5 Ndoupaitéiramo jepe umi tetã oadora hag̃ua Jehovápe, umi tetãme oĩ hetaiterei tapicha ojapóva upéva. Omombaʼetereígui hikuái Ñandejára ojapótava, ha oikuaa porãgui chupe, oñehaʼã oikuaave mbaʼépa Ñandejára ojerure chuguikuéra. Ha ojapohaguéicha pe salmísta, ojerure hikuái: “Chemboʼékena ajapo hag̃ua ne rembipota” (Salmo 143:10).
6 Reimépa nde avei pe aty guasúpe, oñembyatyvahína oadora hag̃ua Jehovápe oñondivepa? Rehechaukápa remombaʼeha pe reikuaáva Ñandejára Ñeʼẽgui, ouha Jehovágui voi umi mbaʼe? Mbaʼeichaitépa ‘reguatareína hape rupi’?
Mbaʼéichapa jaadora peteĩ ñeʼẽme?
7. a) Máva mávapa oadoráta Ñandejárape peteĩ ñeʼẽme? b) Mbaʼérepa koʼág̃ama voi jaadoravaʼerã Jehovápe, ha mbaʼéichapa ikatu ñaipytyvõ ñande rapichápe ojapo hag̃ua upéva?
7 Jehová oipota opa tekove haʼe ojapovaʼekue, tahaʼe ánhel térã yvypóra oadora chupe peteĩ ñeʼẽme. Ajépa jaipotaite avei og̃uahẽ pe ára enterove omombaʼeguasutaha Ñandejára añetegua ha peteĩetévape! (Salmo 103:19-22.) Péro upéva oiko mboyve, Jehová ohundivaʼerã umi chupe nohenduséivape. Upéicharamo jepe, oiporiahuverekógui tapichakuérape omombeʼu mbaʼépa ojapóta, ikatu hag̃ua opaichagua tapicha ojevy hembiapo vaígui (Isaías 55:6, 7). Upévare koʼág̃a “opa tetãnguéra trívu, ñeʼẽ ha tetãyguápe” ojeʼe ko mbaʼe: “Pekyhyjéke [...] Ñandejáragui ha pemombaʼeguasúke ichupe, og̃uahẽmagui pe oporohusga hag̃ua ára; ha pemombaʼeguasu pe ojapovaʼekuépe yvága ha yvy, pe már ha umi yvukuéra” (Apocalipsis [Revelación] 14:6, 7, BNP). Ndépa rejapóma upéva? Oiméramo upéicha, nde pópe opyta rejapo ko mbaʼeguasu: reipytyvõ nde rapichakuérape oikuaa hag̃ua Ñandejárape ha oadora chupe.
8. Jaikuaa rire Ñandejára Ñeʼẽ heʼíva, mbaʼépa ñañehaʼãvaʼerã avei jahupyty?
8 Jehová ndoipotái umi oadoráva chupe heʼi ojeroviaha hese péro ojapo haʼekuéra oipotávante. Ñandejára oipota ‘jaikuaa porã hembipota’ ha jahechauka upéva pe jajapóvare (Colosenses 1:9, 10). Upéicharõ, pe omombaʼéva Ñandejára Ñeʼẽ heʼíva oñehaʼã oprogresa, oiko peve chugui kristiáno ikatupyrýva. Oikuaa porãseve Jehovápe, ontende porãseve Iñeʼẽ ha ojapo upéva. Oñehaʼã ojogua ñande Ru yvagapeguápe, ha ohecha opa mbaʼe Ñandejára ohechaháicha. Upévare ohecha mbaʼéichapa ikatu ojapo pe tembiapo omoĩva Ñandejára oporosalva hag̃ua ha ojejapóva opárupi. Ndépa rejapose avei upéva? (Marcos 13:10; Hebreos 5:12–6:3.)
9. Mbaʼéichapa ikatúma ojeiko peteĩ ñeʼẽme?
9 Ñandejára Ñeʼẽ ohechauka umi oservíva Jehovápe oikovaʼerãha peteĩ ñeʼẽme (Efesios 4:1-3). Ko mbaʼe ojejapovaʼerã koʼág̃a, jaikóramo jepe tapichakuéra ndojoahúiva apytépe ha ñaneimperféktoramo jepe. Jesucristo oñemboʼe meme vaʼekue idisipulokuérare, ikatu hag̃ua oiko hikuái peteĩ ñeʼẽme. Mbaʼépa heʼise upéva? Primero, oĩ porã vaʼerãha hikuái Jehová ha Itaʼýra ndive. Segundo, oikovaʼerãha oñondive peteĩ ñeʼẽme (Juan 17:20, 21). Upearã Jehová omoĩ pe kongregasión kristiána omboʼe hag̃ua umi chupe oservívape.
Mbaʼe mbaʼépa ñanepytyvõ jaiko hag̃ua peteĩ ñeʼẽme?
10. a) Mbaʼépepa ñanepytyvõta jaiporúramo Ñandejára Ñeʼẽ ñambohovái hag̃ua umi porandu? b) Rembohováivo umi porandu, ehesaʼỹijo umi mbaʼe oipytyvõva kristianokuérape oiko hag̃ua peteĩ ñeʼẽme.
10 Koʼág̃a jahecháta siete mbaʼe ñanepytyvõva jaadora hag̃ua Ñandejárape peteĩ ñeʼẽme. Rembohovái jave koʼã porandu, ejepyʼamongetami mbaʼéichapa koʼã mbaʼe ñanepytyvõ ñaime porã hag̃ua Jehová ha ñane ermanokuéra ndive. Jajepyʼamongetáramo koʼã mbaʼére ha jaheka umi téysto ndojekopiáiva, ñanepytyvõta jaguereko hag̃ua pe arandu oúva Ñandejáragui; jahecha ha ñapensakuaa hag̃ua. Koʼã mbaʼe enterove ñaikotevẽ (Proverbios 5:1, 2; Filipenses 1:9-11). Jahechami umi mbaʼe peteĩteĩ.
1) Jahechakuaavaʼerã Jehová añoite ikatuha heʼi mbaʼépa iporã ha mbaʼépa ivai. “Ejerovia [Jehováre] nde pyʼaite guive, ha ani ndejehe añónte. Eikuaáke [...] haʼe omyesakãtaha ndéve nde rape.” (Proverbios 3:5, 6.)
Jajapo mboyve peteĩ mbaʼe, mbaʼérepa iporã jahecha raẽ mbaʼépa heʼi Jehová? (Salmo 146:3-5; Isaías 48:17.)
2) Ñandejára Ñeʼẽ ohechauka ñandéve mbaʼéichapa jaikovaʼerã. “Peẽ niko pehendúramo guare [Ñandejára] ñeʼẽ romyasãiva pende apytépe, pemog̃uahẽ pende pyʼapýpe [Ñandejára] marandúramo, ha ndahaʼéi yvypóra marandúramo. Ha añetehápe [Ñandejára] maranduhína, ogueraháva peẽme mbaʼe porã, peẽ [pegueroviávape].” (1 Tesalonicenses 2:13.)
Mbaʼérepa ipeligróso jajapo pe ñandénte ñaimoʼãva iporãha? (Proverbios 14:12; Jeremías 10:23, 24; 17:9.)
Ndajaikuaáiramo Ñandejára Ñeʼẽ heʼíva peteĩ mbaʼére, mbaʼépa iporã jajapo? (Proverbios 2:3-5; 2 Timoteo 3:16, 17.)
3) Enterove kristianokuéra ñañehekomboʼe peteĩcha. “Che ahekomboʼéta ne membykuérape” heʼi Jehová (Isaías 54:13). “Jaheka mbaʼéichapa ikatu ñañopytyvõ jajoayhuve hag̃ua ha hetave mbaʼe iporãva jajapo hag̃ua. Ani ndajajúi ñande atyhápe, oĩháicha ojapóva, ñañomyakãraku uvei, ha taupeichave koʼág̃a hiʼag̃uímava Ñandejára ára.” (Hebreos 10:24, 25.)
Mbaʼéichapa ñanepytyvõ ñamombaʼéramo Jehová ojapóva ñanehekomboʼe hag̃ua? (Isaías 65:13, 14.)
4) Jesucristo haʼe pe ñanemoakãva, ndahaʼéi peteĩ yvypóra. “Peẽ katu ani peñembohéra mboʼehára [Rabí], peteĩ añóntegui pe pene mboʼehára, ha upéva pe Cristo, ha peẽ [enterove oñoermáno]. Ha ani pembohéra pende ru avavépe ko yvy ári, peteĩ añóntegui pende Ru upe yvágape oĩva. Térã ani peñembohéra mburuvicha, Cristo añóntegui pende ruvicha.” (Mateo 23:8-10, BNP.)
Ikatúpa peteĩ yvypóra heʼi ijehe ovaleveha hapichakuéragui? (Romanos 3:23, 24; 12:3.)
5) Jaguerovia Ñandejára Goviérno añoite oguerutaha opa mbaʼe iporãva yvyporakuérape. “Upéva rehe peñemboʼe peẽ kóicha: ‘Ore Ru reiméva yvágape, toñemomarangatu nde réra. Tou ne rréino, tojejapo ne rembipota yvy ári yvagapeguáicha [’]. Peheka raẽ [...] Ñandejára rréino ha pe teko marangatu haʼe oipotáva.” (Mateo 6:9, 10, 33, BNP.)
Mbaʼéichapa ‘jaheka raẽ ramo Ñandejára rréino [goviérno]’ ñanepytyvõta jaiko hag̃ua peteĩ ñeʼẽme? (Miqueas 4:3; 1 Juan 3:10-12.)
6) Ñandejára espíritu sánto omoheñói kristianokuéra apytépe umi mbaʼe porã ñanepytyvõva jaiko hag̃ua peteĩ ñeʼẽme. “Pe espíritugui katu ou mborayhu, vyʼa, pyʼaguapy, pasiénsia, pyʼaporã, mbaʼeporã, jeroviaha, jejapoʼỹ ha jererekokuaa.” (Gálatas 5:22, 23, BNP.)
Mbaʼépa jajapovaʼerã Ñandejára espíritu omoheñói hag̃ua umi mbaʼe porã ñandepype? (Hechos 5:32.)
Mbaʼéichapa jajogueraha ñane ermanokuérandi jaguerekógui Ñandejára espíritu? (Juan 13:35; 1 Juan 4:8, 20, 21.)
7) Enterove ñamombaʼeguasu añetéva Ñandejárape japredika pe marandu porã oñeʼẽva Igoviérnore. “Ha pe marandu porã [Ñandejára] sãmbyhy rehegua oñemoherakuãta opárupi ko yvy jerekuévo, opa tetãygua ohendu hag̃ua. Upe rire ae, og̃uahẽta pe ára paha.” (Mateo 24:14.)
Mbaʼépa ñanemomyivaʼerã japredikave hag̃ua? (Mateo 22:37-39; Romanos 10:10.)
11. Mbaʼéichapa ñañeñandúta jajapóramo Ñandejára Ñeʼẽ heʼíva?
11 Jaadoráramo Jehovápe peteĩ ñeʼẽme, ñañemoag̃uivéta hese ha javyʼáta ñane ermanokuérandi. Salmo 133:1-pe heʼi: “Ajépa iporãite ha mbaʼe ñanembohorýva jahecháramo umi [Ñandejárare] ojeroviáva oiko porãmbáramo oñondive”. Javyʼaite ikatúgui jajei umi ijehénte ojepyʼapývagui, heko kyʼáva ha iñañávagui, ha jajeheʼa umi Jehovápe ohayhúvare ha ojapóva haʼe heʼíva.
Ñamboyke umi mbaʼe ikatúva ñanembyai
12. Mbaʼérepa tekotevẽ jajei umi ndojaposéivagui Ñandejára léi heʼíva ha oikóva iñakãrente?
12 Jaiko hag̃ua peteĩ ñeʼẽme opa ñane ermanokuéra ndive, ñamboykevaʼerã umi mbaʼe ikatúva ñanembyai. Koʼãva apytépe oĩ: ndajajaposéi Ñandejára léi heʼíva ha jaikosénte ñane akãre. Jehová ñanepytyvõ omombeʼúvo ñandéve mávaguipa ou ko mbaʼe: Satanás el Diablo (2 Corintios 4:4; Apocalipsis [Revelación] 12:9). Satanás ombotavyvaʼekue Adán ha Évape omboyke hag̃ua Jehová heʼivaʼekue chupekuéra ha upéicha oñemoĩ Ñandejárare. Ko mbaʼe ogueruvaʼekue heta mbaʼe vai chupekuéra ha ñandéve avei (Génesis 3:1-6, 17-19). Ko múndo henyhẽ umi ndojaposéivagui Ñandejára léi heʼíva ha oikóva iñakãrente. Upévare ñañehaʼãvaʼerã ani jaikose avei upéicha.
13. Mbaʼéichapa jahechaukáta ñahaʼarõhañaína pe múndo pyahu omoĩtava Ñandejára?
13 Ñapensami Ñandejára promésa porãitére heʼíva oipeʼataha ko múndo aña ha omoĩ hekovia peteĩ yvága ha yvy ipyahúva oĩtahápe hustísia (2 Pedro 3:13). Nañanemokyreʼỹipa upéva jajapo hag̃ua pe oñekotevẽva ñaime hag̃ua pe múndo pyahúpe? Upearã tekotevẽ jajapo ko mbaʼe la Biblia heʼíva: “Ani pehayhu ko múndo, térã umi mbaʼe ipype oĩva. Oiméramo ohayhúva ko múndo, ndohayhúi [...] Ñandejára ñande Rúpe” (1 Juan 2:15, BNP). Upévare ñamboykevaʼerã ñandejehegui umi mbaʼe naiporãiva ko múndope ojejapóva. Umíva apytépe oĩ umi oikóva iñakãrente, ojepyʼapýva ijehénte, umi heko kyʼáva ha oñorairõséva. Jajepokuaavaʼerã ñaneñeʼẽrendu Jehovápe, ijetuʼúramo jepe ñaneimperféktogui. Jahechaukavaʼerã jajaposeha ñande pyʼaite guive Ñandejára rembipota (Salmo 40:8).
14. a) Mbaʼérepa koʼág̃a ñañehaʼãmbaitevaʼerã jaikuaa ha jajapo Jehová heʼíva? b) Mbaʼépa ñanemboʼe umi téysto oĩva ko párrafope?
14 Og̃uahẽ vove Jehová ára ohundi hag̃ua ko múndo aña ha umi upéicha oikosévape, Ñandejára nohaʼarõmoʼãi. Ndojapomoʼãi upéva térã nokambiamoʼãi iléi umi ndoserviporãiva chupe rehehápe, ndohejaséigui hikuái ko múndope ojejapóva. Ndaikatúi oñehaʼarõ upearã (Lucas 13:23, 24; 17:32; 21:34-36). Upévare, ñanemokyreʼỹ jahechávo pe ‘aty guasu’ oñehaʼã meme ojapo Jehová heʼíva Iñeʼẽ ha iñorganisasión rupive, ha oguata oñondivepa og̃uahẽ hag̃ua pe múndo pyahúpe. Ha jaikuaavévo Jehovápe, jahayhuetevéta chupe ha jajaposéta avei pe heʼíva.
Ñanemanduʼa hag̃ua
• Mbaʼéichapa Jehová oipota ojeadora chupe?
• Jaikuaa rire Ñandejára Ñeʼẽ heʼíva, mbaʼépa ñañehaʼãvaʼerã avei jahupyty?
• Mbaʼépa ikatu jajapo jaiko hag̃ua peteĩ ñeʼẽme ñane ermanokuéra ndive?
[Nóta oĩva taʼanga ndive páhina 4]
‘Heko porãvape opytapáta ko yvy, ha pyʼaguapýpe oikóta hikuái’