Kapítulo 2

Ñamombaʼeguasu oñondivepa Jehovápe, Ñandejára añetegua ha peteĩetéva

1. Mávapa hína Ñandejára añetegua ha peteĩetéva?

LA Biblia heʼi oñemombaʼeha ñandejáraicha heta mbaʼépe. Upéicharamo jepe, “ñandéve g̃uarã peteĩ [Ñandejárante] oĩ” (1 Corintios 8:5, 6). Upéva hína Jehová, opa mbaʼe Apohare (Deuteronomio 6:4; Apocalipsis [Revelación] 4:11). Jesús ohenoivaʼekue chupe ‘che Jára ha pende Jára’ (Juan 20:17, NM). Moisés oñeʼẽvaʼekue avei upéicha heʼívo hese “haʼenteha [Ñandejára] ha ndaiporiha ambue” (Deuteronomio 4:35). Jehová tuichaiteve oimerãe mbaʼe yvyporakuéra omombaʼeguasúvagui, tahaʼe peteĩ taʼanga, peteĩ yvypóra térã Satanás, “ko múndo ruvicha” (2 Corintios 4:3, 4, BNP). Jehová ndahaʼéi haʼekuéraicha, Jesús ohenoivaʼekue chupe Ñandejára “añete ha peteĩetéva” (Juan 17:3).

2. Mbaʼépa jajaposéta jaikuaa porãvévo Ñandejárape?

² Jaikuaa porãvo Ñandejárape ha jaguerohorývo umi mbaʼe ojapovaʼekue ha ojapótava ñanderehe, ñañemoag̃uiseve hese. Ha jahayhuvévo Jehovápe, ñañehaʼã ñamombaʼeguasu chupe ñande pyʼaite guive. Mbaʼéichapa ikatu jajapo upéva? Ñañeʼẽ porãvo hese ñande rapichakuérape. “Ñande juru rupi [...] [japredika] jajesalva hag̃ua”, heʼi Romanos 10:10 [BNP]. Ñamombaʼeguasu avei chupe ñañeʼẽvo ha jajapóvo haʼéicha. “Peñehaʼãkena pejogua [Ñandejárape] itaʼýra teéicha” heʼi Efesios 5:1 [JMP]. Jajapo porãve hag̃ua ko mbaʼe tekotevẽ jaikuaa porã Jehovápe.

3. Mbaʼe mbaʼépepa ndaikatúi oñembojoja Ñandejárape?

³ La Biblia omombeʼu heta hendápe mbaʼeichagua Ñandejárapa haʼe. Omombeʼu ñandéve ndaikatuiha oñembojoja chupe arandu, tekojoja [térã hustísia], puʼaka ha mborayhúpe. Ñandejára haʼe ‘pe iñarandúva’ (Job 12:13). Umi Ñandejára rape “hekojoja” (Deuteronomio 32:4). Haʼe “ipuʼaka mbarete” (Isaías 40:26). ‘Ñandejára niko mborayhu’ (1 Juan 4:8). Péro koʼã cuatro mbaʼe apytépe, mbaʼépa pe tuichavéva ha ojekuaavéva hese?

‘Ñandejára niko mborayhu’

4. Mbaʼérepa ojapo Jehová yvága ha yvy ha opaichagua tekove?

⁴ Ñapensami mbaʼérepa Jehová ojapo pe yvága ha yvy, umi ánhel ha yvyporakuéra. Ojapópa Jehová koʼã mbaʼe iñarandúgui? Térã oiporu hag̃ua ipuʼaka? Nahániri. Oiporúramo jepe iñarandu ha ipuʼaka, ndahaʼéi koʼãva omomyivaʼekue chupe ojapo hag̃ua umi mbaʼe. Ha Ñandejára ihústoramo jepe, natekotevẽivaʼekue ojapo mbaʼeveichagua tekove. Péro imborayhu omomýi chupe ojapo hag̃ua umi ánhel ha yvyporakuéra. Upévare avei oipota yvyporakuéra iñeʼẽrendúva oiko opa ára g̃uarã ko Yvy ape ári (Génesis 1:28; 2:15). Ñanderayhúgui oipeʼáta avei umi mbaʼe vai ñanderupytýva Adán opekahaguére.

5. Mbaʼépa pe tuichave mbaʼe oguerekóva Ñandejára, heʼiháicha la Biblia, ha mbaʼérepa upéva?

⁵ Upéicharõ, pe mborayhu hína pe mbaʼe tuichavéva oguerekóva Ñandejára. Upéva heñói chugui voi. Ha tuicháramo jepe iñarandu, hekojoja ha ipuʼaka, la Biblia ndeʼíri mamove hendápe Jehová haʼeha koʼã mbaʼe, péro heʼi hese: ‘Ñandejára niko mborayhu’. Añetehápe, Jehováre ojehecha mbaʼépa heʼise pe mborayhu. Ñandejára oporohayhu omombaʼégui pe añetegua ha hustísia, ndahaʼéi oñandúguinte pe mborayhu. Kóva hína pe mborayhu iporãvéva, ha ojehecháva Jehováre. Koichagua mborayhu jahechauka ñamotenondévo ñande rapichápe opa mbaʼe jajapóvape.

6. Mbaʼérepa ikatu jajapo Ñandejára ojapoháicha, tuichavéramo jepe haʼe ñandehegui?

⁶ Ko mborayhu ijojahaʼỹva rupi ikatu avei jajapo haʼe ojapoháicha. Ikatu ñaimoʼã arakaʼeve ndaikatumoʼãiha jajapo upéva ñaneimperfékto ha jajavy memégui. Péro ko mbaʼépe jahecha avei mbaʼéichapa Jehová ñanderayhu: haʼe ohechakuaa mbaʼépa ikatu jajapo ha ndojeruréi ñandehegui ikatuʼỹva. Oikuaa mombyry ñaimeha perfeksióngui (Salmo 51:5). Pe Salmo 130:3, 4-pe heʼi: “Nemanduʼátarõ ore rembiapo vaikue rehe, piko máva oñemoĩta nerenondépe? Nde katu reheja rei oréve ore rembiapo vaikue”. Upeichaite, Jehová hína pe “oporombyasýva ha oporoporiahuverekóva, ipochykuaaʼỹva, oporohayhuetéva” (Éxodo 34:6). “[Jehová], nde niko nembaʼeporã ha reheja rei oréve ore rembiapo vaikue” (Salmo 86:5). Ajépa ñanembovyʼaite ko mbaʼe. Javyʼaite jaservihaguére ko Ñandejára ijojahaʼỹvape, ha jahechágui mbaʼeichaitépa ñanderayhu ha ñandeporiahuvereko!

7. Mbaʼéichapa jahechakuaa Jehová ñanderayhuha ñamañávo umi mbaʼe ojapovaʼekuére?

⁷ Avei jahechakuaa Jehová ñanderayhuha umi mbaʼe ojapovaʼekuére. Ñapensamíntena umi mbaʼe porã ojapovaʼekue ñandéve g̃uarã, umíva apytépe umi sérro, kaʼaguy, ysyry ha már. Omeʼẽ avei ñandéve opaichagua tembiʼu héva ha ñanemombaretéva. Ojapo avei yvotykuéra, iporã ha hyakuã asýva, ha opaichagua mymba jahecharamóva. Ojapo koʼã mbaʼe ñanembovyʼáva, natekotevẽiramo jepe. Jaikógui koʼág̃a ko múndo añáme ha ñaneimperfékto rupi, ndaikatúi jahechapa umi mbaʼe porã oĩva (Romanos 8:22). Péro, ñapensamíntena mbaʼépa Jehová ojapóta ñandéve g̃uarã pe Paraísope. Pe salmísta heʼi porã: ‘Reavri nde po, ha nembaʼeporãme remohyguatã opa mbaʼe oikovévape’ (Salmo 145:16).

8. Mbaʼépa pe iporãvéva ojapovaʼekue Jehová ñanderayhúgui?

⁸ Mbaʼépa pe iporãvéva ojapovaʼekue Jehová ñanderayhúgui? La Biblia heʼi: “[Ñandejára] ohayhuetereígui opa yvypórape, omeʼẽvaʼekue Taʼýra peteĩete, ani hag̃ua omano umi hese ojeroviáva, oikove hag̃ua uvei opa ára” (Juan 3:16). Ojapópa Jehová ko mbaʼe ñandepyʼaporãgui? Romanos 5:8 heʼi: “[Ñandejára] katu ohechauka ñanderayhuha, Jesucristo omanórõ ñanderehe, tembiapo vai apohárõ [térã pekadór] gueteri hína ñande”. Upeichaite ningo, Ñandejára ombou Itaʼýra perfékto ko Yvy ape ári omano hag̃ua ñanderehehápe ha ñandepeʼa pekádo ha ñemanógui (Mateo 20:28). Upévare yvypóra ohayhúva Ñandejárape ikatu oiko opa ára g̃uarã. Ha javyʼaite Ñandejára ohayhúgui umi hembipota ojaposévape, heʼiháicha Iñeʼẽme: ‘Ñandejárape g̃uarã peteĩchante opavave, ha oimeraẽva tetãmeguápe okyhyjéva ichugui ha hembiapo porãvape oguerohory avei’ (Hechos 10:34, 35, BNP).

9. Mbaʼépa jajapovaʼerã jaikuaágui Jehová omeʼẽhague Itaʼýra ñanderehehápe?

⁹ Mbaʼépa jajapovaʼerã jaikuaágui Jehová omeʼẽhague Itaʼýra ñanderehehápe, ikatu hag̃uáicha jaikove opa ára g̃uarã? Jaikuaávo ko mbaʼe ñanepytyvõ jahayhuve hag̃ua Ñandejára añeteguápe, ha ñahenduse hag̃ua hemimbou, Jesucrístope. “Ha Cristo omano opavavére, ikatu hag̃ua umi oikovéva ndoikovevéima ijupe g̃uarã, oikove hag̃ua uvei upe hesehapekuéra omano [...] vaʼekuépe g̃uarã.” (2 Corintios 5:15.) Jesús ohayhu ha oiporiahuverekovaʼekue tapichakuérape Jehová ojapoháicha, upévare javyʼáta jajapóramo avei haʼéicha. Ko mbaʼe jahecha pe Jesús heʼivaʼekuére umi tapicha ndojejapóivape: “Pejupa cherendápe peẽ penekaneʼõ ha pembaʼapo pohýiva, ha che pomombytuʼúta. Peñemoĩ pe júgo che ameʼẽva peẽme guýpe ha peikuaa chehegui, che chepyʼaporãha ha ndajejapoiha, ha pene ánga pytuʼúta. Pe júgo che ameʼẽva peẽme ndahasýi peraha ha ivevúi pe arahaukáva peẽme” (Mateo 11:28-30, BNP).

Jahechauka jahayhuha ñande rapichápe

10. Mbaʼéichapa ikatu jahechauka jahayhuha ñane ermanokuérape?

¹⁰ Mbaʼéichapa ikatu jahechauka jahayhuha ñane ermanokuérape, ñanderayhuháicha Jehová ha Jesús? Jahechami mbaʼéichapa: “Pe mborayhu ipasiensiakuaa, ipyʼaporã, naiñenvidiósoi, ndojejapói térã ndojererovúi. Naitieʼỹi térã ndohekái imbaʼerãvante; ndaipochýi térã ndaipyʼavaíri hapicha ndive. Ndovyʼái pe hekopeguaʼỹva rehe, pe añeteguáva rehe uvei ovyʼa. Opa mbaʼe ogueropuʼaka jerovia, esperánsa ha pasiénsia reheve. Pe mborayhu ndopavaʼerãi arakaʼeve” (1 Corintios 13:4-8, BNP; 1 Juan 3:14-18; 4:7-12).

11. Mávapepa avei jahayhuvaʼerã ha mbaʼéichapa jahechaukáta upéva?

¹¹ Mávapepa avei jahayhuvaʼerã ha mbaʼéichapa? Jesús heʼivaʼekue: “Tapeho aipóramo opa tetã rupi ha pejapo chupekuéra che remimboʼéramo. Pemongarai [térã pevautisa] chupekuéra Túva, Taʼýra ha Espíritu Sánto rérape, ha pemboʼe chupekuéra ojapopa hag̃ua opa umi mbaʼe ahejavaʼekue peẽme” (Mateo 28:19, 20). Upéva heʼise ñamombeʼuvaʼerãha umi oikuaaʼỹvape umi mbaʼe porã oguerútava Ñandejára múndo pyahu, og̃uahẽtava koʼẽrõite. Jesús ohechauka porã vaʼekue ndajahayhuivaʼerãha ñane ermanokuérape añónte: “Peẽ pehayhúramo umi penderayhúvapente, piko mbaʼe oñembuekoviáta peẽme upéva rehe? Ndojapói piko upéicha avei umi impuésto kovrahakuéra? Ha pemomaiteíramo umi pende reheguakuérapente, piko mbaʼe oime iporãvéva pejapóva? Umi [...] Ñandejárape oikuaaʼỹva jepe niko ojapo upéicha” (Mateo 5:46, 47, BNP; 24:14; Gálatas 6:10).

Jaiko Jehová rérape

12. Mbaʼérepa Ñandejára añoite ikatu oiporu pe téra Jehová?

¹² Ñamombaʼeguasu avei Ñandejárape jaikuaávo, jaiporu ha ñamboʼévo ñande rapichápe pe héra tee: Jehová. Pe salmísta oipotaitereivaʼekue ojejapo ko mbaʼe: ‘Yvyporakuéra oikuaa hag̃ua nde, nde rérava Jehová, nde añoite haʼe pe Ijyvatevéva ko yvy ape ári’ (Salmo 83:18, NM). Pe téra Jehová heʼise: Oiko chugui oñekotevẽva. Ha Ñandejára katuete ojapo pe oipotáva. Haʼe añoite ikatu oiporu ko téra ndaipórigui yvypóra oikuaáva osẽ porãtapa chupe umi mbaʼe ojaposéva (Santiago 4:13, 14). Jehová añoite ikatu heʼi “oikopa pe che haʼevaʼekue” (Isaías 55:11). Heta oĩ ovyʼáva ohechávo Ñandejára réra la Bíbliape ha oikuaávo mbaʼépa heʼise (Éxodo 6:3). Péro oikuaánteramo upéva noipytyvõmoʼãi chupekuéra. Tekotevẽ avei oiko Ñandejára rérape opa ára g̃uarã (Miqueas 4:5).

13. Mbaʼépa heʼise jaikuaa ha jaiko Jehová rérape?

¹³ Pe Salmo 9:11-pe [9:10, NM] heʼi Ñandejárare: “Upe ndekuaáva [nde réra rupive] nderehe ojerovia”. Péro jaikuaánte Ñandejára réra, ndeʼiséi jajeroviamaha hese. Jaikuaa héra heʼise ñamombaʼeha chupe, ijautorida, jajapo haʼe heʼíva ha jajerovia hese opa mbaʼépe (Proverbios 3:5, 6). Upéicha avei, jaiko Ñandejára rérape heʼise ñañemeʼẽ, térã jajededika ha jaadora chupe jajapóvo haʼe oipotáva (Lucas 10:27). Rejapopareína upéva?

14. Jaserviséramo Jehovápe opa ára g̃uarã, jajapovaʼerãpa upéva ojeʼégui rei ñandéve?

¹⁴ Jaserviséramo Jehovápe opa ára g̃uarã, ndajajapoivaʼerã upéva ojeʼégui rei ñandéve. Heta oservi riréma Timoteo Jehovápe, pe apóstol Pablo heʼivaʼekue chupe omombarete hag̃ua ohóvo imborayhu Ñandejárare (1 Timoteo 4:7). Peteĩ tapicha ohayhu añetéva Ñandejárape omombaʼéta chupe ipyʼaite guive. Koichagua mborayhu ñanemomýita ñaipytyvõ hag̃ua ñande rapichápe omombaʼe hag̃ua avei Ñandejára réra. Jaikoséramo Ñandejára rérape opa ára g̃uarã jahayhuvaʼerã chupe ñande pyʼaite guive (Salmo 37:4; 2 Pedro 3:11).

15. Mbaʼéichapa jahechauka jaserviha Ñandejárape añoite?

¹⁵ Jaservi hag̃ua Ñandejárape, ñamombaʼeguasuvaʼerã chupe añoite, haʼe ‘ndoipotáigui ijykére ambue ñandejára’ (Éxodo 20:5). Ndaikatúi jahayhu Ñandejárape ha jahayhu avei ko múndo añáme, oĩva Satanás poguýpe (Santiago 4:4; 1 Juan 2:15-17). Jehová ñandekuaa porãiterei, ha chugui nañamokañýi mbaʼeve (Jeremías 17:10). Jahayhúramo añetehápe pe hustísia, Ñandejára ohecháta ha ñanepytyvõta koʼẽ koʼẽre ñaaguanta hag̃ua umi mbaʼe vai jahasáva. Ñanemombaretéta ijespíritu sánto rupive, ha upéicha ñandepuʼakáta ko múndo añáre (2 Corintios 4:7). Ñanepytyvõta avei ñahaʼarõ meme hag̃ua pe jeikove opaʼỹva ko Yvy iporãitereítavape. Ajépa iporãite ko mbaʼe ñahaʼarõva! Ñamombaʼevaʼerã ko esperánsa ha kyreʼỹme jaservi Jehovápe, Ñandejára añetegua, omeʼẽtava ñandéve pe tekove opaveʼỹva.

16. Mbaʼépa iporãta rejapo, ojapoháicha hetaiterei tapicha?

¹⁶ Hetaiterei yvyporakuéra kyreʼỹme ojapóma pe salmísta ohaivaʼekue: “Oñondive ñamombaʼeguasu [Jehovápe], héra jaropurahéi oñondivepa” (Salmo 34:4 [34:3, NM]). Jehová oipota avei reime umi tapichakuéra apytépe, heta hetavéva ha oúva opa tetãnguéragui.

Ñanemanduʼa hag̃ua

• Mbaʼeichagua Ñandejárapa Jehová? Mbaʼéichapa ñanepytyvõ jaikuaa porãramo chupe?

• Mbaʼéichapa ikatu jahechauka jahayhuha ñande rapichápe?

• Mbaʼépa heʼise jaikuaa ha jaiko Jehová rérape?

[Nóta oĩva taʼanga ndive páhina 14]

Ñanderayhúgui Jehová ipojera ha ‘imbaʼeporãme omohyguatãta opa mbaʼe oikovévape’