Kapítulo 12
Mbaʼépa heʼise pe vautísmo koʼag̃agua
1. Mbaʼérepa iñimportánte pe vautísmo?
PE ÁÑO 29-pe, Juan el Bautista ovautisavaʼekue Jesúspe omoñapymívo rrío Jordánpe. Ha Jehová ohecha ha oguerohoryvaʼekue Itaʼýra ojapóva (Mateo 3:16, 17). Ojevautisávo, Jesús omoĩ peteĩ ehémplo enterove hemimboʼekuérape g̃uarã. Upéi, ohasa rire mbohapy áño ha seis mése, heʼi chupekuéra ojapo hag̃ua ko mbaʼe: “Oñemeʼẽmba chéve autorida yvágape ha yvýpe. Tapeho aipóramo opa tetãnguéra rupi ha pemoingo ichupekuéra che remimboʼéramo, ha pevautisa ichupekuéra pe Túva ha pe Taʼýra ha pe Espíritu Sánto rérape” (Mateo 28:18, 19, BNP). Ndépa rejevautisáma Jesús heʼihaguéicha? Upeichaʼỹrõ, reñembosakoʼipareína upearã?
2. Mbaʼépa tekotevẽ jaikuaa pe vautísmogui?
2 Opáichante, tekotevẽ opa yvypóra oserviséva Jehovápe ha oikoséva pe múndo pyahúpe oikuaa porã mbaʼépa heʼise pe vautísmo. Upearã tekotevẽ jaikuaa koʼã mbaʼe: Peteĩchantepa pe vautísmo koʼag̃agua ha upe Jesús ojapovaʼekue? Mbaʼépa heʼise jajevautisa “pe Túva ha pe Taʼýra ha pe Espíritu Sánto rérape”? Mbaʼéichapa jaikovaʼerã jajevautisa rire?
Umi vautísmo Juan ojapovaʼekue
3. Mávape g̃uarãpa pe vautísmo Juan ojapovaʼekue?
3 Seis mése rupi Jesús ojevautisa mboyve, Juan el Bautista oñepyrũ opredika Judea desiértope: “Peñearrepentíke, hiʼag̃uímagui pe yvagapegua rréino” (Mateo 3:1, 2, BNP). Umi ohendu ha omombaʼevaʼekue iñeʼẽ omombeʼupaite hembiapo vaikue, oñembyasy ha oho Juan rendápe ojevautisa hag̃ua rrío Jordánpe. Upe vautísmo ojejapovaʼekue umi hudíope g̃uarãnte (Lucas 1:13-16; Hechos 13:23, 24).
4. Mbaʼérepa nohaʼarõivaʼerã oñembyasy hag̃ua umi hudío oikovaʼekue síglo primérope?
4 Umi hudío nohaʼarõivaʼerã oñembyasy hag̃ua. Pe áño 1513-pe Jesús ou mboyve, umi hudío ojapovaʼekue peteĩ pákto, térã kompromíso tuichaitereíva Ñandejára ndive oĩrõ guare hikuái Sinaí montáñape. Péro ojapóvo heta mbaʼe vai, oheja rei hikuái pe kompromíso ojapovaʼekue, ha upéva okondena chupekuéra. Jesús oúrõ guare, pe situasión ivaivéntema. Upérõ hiʼag̃ui Jehová ára, ‘ára ndetuicháva ha ojekyhyjetereiha’, heʼihaguéicha Malaquías. Upe ára og̃uahẽ áño 70-pe, umi soldádo rrománo ohundírõ guare Jerusalén ha itémplo, ha umi hudío omanovaʼekue ohasa un millón. Juan el Bautista oñembouvaʼekue oiko mboyve pe ñehundi guasu, “ombosakoʼi hag̃ua peteĩ tetã Ñandejárape g̃uarã”. Haʼe ombaʼapo mbarete vaʼekue pe adorasión añeteguáre. Umi hudío oñembyasyvaʼerã ndojapoihaguére pe pákto heʼivaʼekue, ha ojeprepara orresivi hag̃ua Jehová remimbou, Itaʼýra Jesúspe (Malaquías 3:22-24 [4:4-6, NM]; Lucas 1:17, BNP; Hechos 19:4).
5. a) Mbaʼérepa Juan ndovautisaseivaʼekue Jesúspe? b) Mbaʼépa ohechaukavaʼekue Jesús ojevautisávo?
5 Heta hénte ohovaʼekue Juan rendápe ojevautisa hag̃ua, ha umíva apytépe oĩvaʼekue Jesús. Mbaʼérepa ojapo upéva? Oikuaágui ndoguerekoiha pekádo omombeʼuvaʼerã, Juan heʼi: “Nde uvei niko pe chéve [chevautisavaʼerã]. Ha piko nde reju che rendápe?”. Upéicharamo jepe, ndahaʼéi upévare ojevautisátava Jesús, ha heʼi chupe: “Marãve ndoikói. Iporã niko jajapopa hekoitépe [Ñandejára] oipotáva” (Mateo 3:13-15). Jesús ndorekoivaʼekue pekádo, upévare ivautísmo ndahaʼeivaʼekue oñembyasýgui umi mbaʼére. Avei, noikotevẽivaʼekue ojededika Jehovápe, onase rupi peteĩ tetãme ojededikamavaʼekue Ñandejárape. Jesús ojevautisavaʼekue oguerekórõ guare 30 áño, ohechauka hag̃ua oñemoĩha Itúva yvagapegua poguýpe ojapopaite hag̃ua Haʼe oipotáva.
6. Mbaʼéichapa jaikuaa iñimportantehague Jesúspe g̃uarã ojapo Ñandejára oipotáva?
6 Ñandejára oipotavaʼekue Cristo ombaʼapo pe Rréino rehehápe (Lucas 8:1). Avei omeʼẽvaʼerã hekove perfékto yvyporakuéra rehehápe ha upéva rupi ojejapo avei peteĩ pákto pyahu (Mateo 20:28; 26:26-28; Hebreos 10:5-10). Jesús omombaʼetereivaʼekue ivautísmo, upévare ndohejái mbaʼeve omboyke chupe hembiapógui. Opredika meme vaʼekue Ñandejára Rréino, ha omano meve ojapo Ñandejára oipotáva (Juan 4:34).
Pe vautísmo ojapóva kristianokuéra
7. Mbaʼeichagua vautísmopa oñepyrũ ojapo umi kristianokuéra áño 33-pe, Pentecostés guive?
7 Juan ovautisavaʼekue umi Jesús disípulo tenondeguarépe ha omokyreʼỹ chupekuéra omoirũ hag̃ua Jesúspe, ikatu hag̃uáicha oĩ hikuái pe Rréino yvagapeguápe (Juan 3:25-30). Jesús disipulokuéra avei oporovautisavaʼekue, Juan ojapohaguéicha (Juan 4:1, 2). Upéicharamo jepe, og̃uahẽrõ guare pe arete hérava Pentecostés, áño 33-pe, oñepyrũ ovautisa hikuái ojeʼehaguéicha chupekuéra “pe Túva ha pe Taʼýra ha pe Espíritu Sánto rérape” (Mateo 28:19, BNP). Katuete ñanepytyvõta jaikuaa mbaʼépa heʼise upéva.
8. Mbaʼépa heʼise jajevautisa ‘Túva rérape’?
8 Mbaʼépa heʼise jajevautisa ‘Túva rérape’? Heʼise ñamombaʼeha héra, iposisión, ijautorida, umi mbaʼe ojapótava ha umi léi omoĩva. Ñapensami mbaʼépa heʼise koʼã mbaʼe: 1) Oñeʼẽvo Ñandejára réragui, Salmo 83:18 [NM] heʼi: ‘Nde, nderérava Jehová, nde añoite hína pe Ijyvatevéva ko yvy ape ári’. 2) Pe posisión orekóvare, Jeremías 10:10 heʼi: ‘[Jehová] hína pe Ñandejára añetegua’. 3) Ñandejára autoridáre, Apocalipsis [Revelación] 4:11 heʼi: “Nde, ore Jára [...], ndéve ija reñemombaʼeguasúvo, remimbipávo ha ndepuʼakapávo, nde haʼégui opa mbaʼe apohare, nde reipota rupínte oikovaʼekue”. 4) Avei jahechakuaavaʼerã omeʼẽhague ñandéve ñande rekove, ha upévare, ñandepeʼáta pekádo ha ñemanógui: “Ñandejára, nde, upe orepeʼáva jejopy vaígui” (Salmo 3:9 [3:8, NM]; 36:10 [36:9, NM]). 5) Jahechakuaavaʼerã avei haʼeha pe léi Meʼẽha tuichavéva: ‘Jehová hína ñande Hués, Jehová hína ñande léi Meʼẽha, Jehová hína ñande Rréi; haʼe voi ñandesalváta’ (Isaías 33:22, NM). Jahechakuaágui koʼã mbaʼe, ojeʼe ñandéve: “Ehayhu [Jehová] nde Járape nde pyʼaite guive, ne ánga rugua guive ha opa ne arandukue reheve” (Mateo 22:37).
9. Mbaʼépa heʼise jajevautisa ‘Taʼýra rérape’?
9 Ha mbaʼépa heʼise jajevautisa ‘Taʼýra rérape’? Heʼise ñamombaʼeha Jesucristo réra, posisión ha autorida. Pe téra, Jesús, heʼise “Jehová oporosalva”. Pe posisión oĩha oñemeʼẽ chupe haʼe rupi Ñandejára Raʼy peteĩetéva, pe hembiapo ypykue (Mateo 16:16; Colosenses 1:15, 16). Juan 3:16-pe ojeʼe hese: “[Ñandejára] ohayhuetereígui opa yvypórape, omeʼẽvaʼekue Taʼýra peteĩete, ani hag̃ua omano umi hese ojeroviáva, oikove hag̃ua uvei opa ára”. Jesús omano omboykeʼỹre Jehovápe, upévare Ñandejára omoingove jey ha omeʼẽve chupe autorida. Pe apóstol Pablo heʼi Ñandejára “omoĩ[hague] chupe yvateteve opavavégui”. Jehová añoite oĩ tenonde. “Jesús rérape oñesũmba hag̃ua [...] ha opavave heʼi hag̃ua Jesucristo haʼeha [Karai], oñemombaʼeguasu hag̃ua [...] Ñandejára pe Túvape” (Filipenses 2:9-11, BNP). Upéva ojejapo hag̃ua tekotevẽ jajapo umi mbaʼe Jesús heʼivaʼekue, ha oúva Jehovágui (Juan 15:10).
10. Mbaʼépa heʼise jajevautisa ‘espíritu sánto rérape’?
10 Mbaʼépa heʼise jajevautisa ‘espíritu sánto rérape? Heʼise ñamombaʼeha pe espíritu ojapóva. Ha mbaʼépa pe espíritu sánto? Haʼe pe puʼaka Jehová oiporúva ojapo hag̃ua oipotáva. Jesús heʼivaʼekue hemimboʼekuérape: “Che ajeruréta che Rúpe, ha haʼe omboúta peẽme ambue Pytyvõhára, pe Espíritu añetegua, opyta hag̃ua penendive tapia g̃uarã” (Juan 14:16, 17, BNP). Mbaʼéichapa oipytyvõta chupekuéra ko espíritu? Jesús heʼi: “Pe Espíritu Sánto ou vove pende ári penemombaretéta ha pemoherakuãta che réra Judea ha Samáriape ha opaichagua tetã oĩva yvy ári” (Hechos 1:8, JMP). Pe espíritu sánto rupive, Jehová avei ojapouka la Biblia: “[Umi profetakuéra] niko noñeʼẽivaʼekue ijehegui reínte. Nahániri. [Ñandejára] rérape uvei oñeʼẽ, Espíritu Sánto ohechaukaháicha chupekuéra” (2 Pedro 1:21). Upévare, jastudia vove la Biblia, ñamombaʼeñaína pe espíritu sánto ojapovaʼekue. Ñamombaʼe avei pe espíritu jajerurévo Jehovápe jaguereko hag̃ua umi mbaʼe heñóiva chugui: “Mborayhu, vyʼa, pyʼaguapy, pasiénsia, pyʼaporã, mbaʼeporã, jeroviaha, jejapoʼỹ ha jererekokuaa” (Gálatas 5:22, 23, BNP).
11. a) Mbaʼépa heʼise pe vautísmo koʼag̃agua? b) Mbaʼérepa pe vautísmo oñembojoja ñemano ha ñemoingove jeýre?
11 Pe áño 33 guive, ojejapo ypýrõ guare vautísmo Jesús heʼihaguéicha, oĩvaʼekue upépe hudío ha umi oikevaʼekue irrelihionkuérape. Upe riremi, ojeheja avei umi samaritánope oiko Jesús remimboʼéramo, ha pe áño 36 guive, umi ambue tetãmeguápe. Ojevautisa mboyve, umi samaritáno ha ambue tetãmegua ojededika térã oñemeʼẽvaʼerã Jehovápe oservi hag̃ua Itaʼýra remimboʼéramo. Koʼág̃a peve pe vautísmo ojejapo upearã. Oñemoñapymimbaitévo ýpe pe tapicha ohechauka oñemeʼẽhague Ñandejárape, ha upéicha pe vautísmope haʼete ku oñeñotỹva. Oñemoñapymívo pe tapicha haʼete ku omanóva hekove tujápe, ha oñemopuʼãvo pe ýgui haʼete ku oikove jeýva ojapo hag̃ua Ñandejára oipotáva. “Peteĩ vautísmo” añoite oĩ opavave kristiáno añeteguápe g̃uarã. Ojapóvo upéva, oiko chuguikuéra Jehová testígo, Ñandejára rembijokuái (Efesios 4:5, BNP; 2 Corintios 6:3, 4).
12. Mbaʼérepa oñembojoja pe vautísmo kristiáno, ha mbaʼérepa upéva?
12 Peichagua vautísmo tuicha mbaʼe Ñandejára renondépe jajesalva hag̃ua. Oñeʼẽmba rire apóstol Pedro pe árka ojejapovaʼekuére, ha ojesalvahaguépe Noé ha ifamília pe Dilúviogui, heʼi: ‘Ko mbaʼére oñembojojáva koʼág̃a avei pendesalva, pe vautísmo (ndahaʼéi ñañemopotĩ mbaʼe kyʼágui, heʼise uvei jajerure Ñandejárape taipotĩ ñane konsiénsia), Jesucristo ñemoingove jey rupive’ (1 Pedro 3:21, NM). Pe árka ohechauka Noé ojapohague pe tembiapo Ñandejára omeʼẽvaʼekue chupe. Ojejapopa rire pe árka, pe Diluvio rupive opa mbaʼe “ko yvy ári oĩvaʼekue upéramo oñehundi” (2 Pedro 3:6, BNP). “Óchonte [Noé ha ifamília], ojesalvavaʼekue pe ýgui” (1 Pedro 3:20, BNP).
13. Mbaʼéguipa ojesalva umi kristiáno ojevautisa rupi?
13 Koʼág̃a rupi, umi ojededikáva térã oñemeʼẽva Jehovápe ojerovia rupi Cristo ñemoingove jeýre, ojevautisa ohechauka hag̃ua upéva. Upémaramo ojapo Ñandejára oipotáva ha upéicha ojesalva ko múndo añágui (Gálatas 1:3, 4). Noñehundimoʼãvéima hendive. Ojesalva pe ñehundígui, ha Ñandejára omeʼẽ chupekuéra peteĩ konsiénsia potĩ. Pe apóstol Juan heʼi Ñandejára siervokuérape: “Ko múndo niko opavaʼerã, opa koʼã mbaʼe ojehayhúva ipype oĩva reheve, pe ojapóva [...] Ñandejára rembipota katu opytavaʼerã tapia g̃uarã” (1 Juan 2:17, BNP).
Jajapo umi mbaʼe oñehaʼarõva ñandehegui
14. Mbaʼérepa pe vautísmo añónte ndaikatúi ñandesalva?
14 Jajavýta jaʼéramo jajevautisávo jajesalvamaha. Pe vautísmo ovale hag̃ua ñañemeʼẽvaʼerã Jehovápe ñande pyʼaite guive. Upéva jajapovaʼerã Jesucristo rupive, ha upéi jajapopaite Ñandejára ojeruréva ñandehegui. “Pe oñemohatãva ijeroviápe ipaha peve katu, oikovéta.” (Mateo 24:13.)
15. a) Mbaʼépa Ñandejára oipota ojapo umi kristiáno ojevautisámava? b) Mbaʼépa ñañehaʼãmbaitevaʼerã jajapo?
15 Ñandejára oipotavaʼekue avei Jesús oiporu hekove Haʼe oipotaháicha. Upéva heʼise omeʼẽvaʼerãha hekove peteĩ sakrifísioramo. Ñande katu jaiporuvaʼerã ñande rekove jajapo hag̃ua Ñandejára oipotáva, ha jajapovaʼerã upéva jahasa asýramo jepe (Romanos 12:1, 2). Jaikóramo ko múndo oikoháicha, sapyʼapyʼa jepe, ndajajapomoʼãi Ñandejára oipotáva. Upéicha avei, jaikóramo ñandejupe g̃uarãnte ha jaservi Ñandejárape jajehechauka hag̃uánte (1 Pedro 4:1-3; 1 Juan 2:15, 16). Peteĩ hudío oporanduvaʼekue Jesúspe mbaʼépa ojapovaʼerã ohupyty hag̃ua tekove opaveʼỹva. Jesús ohechakuaa iporãha ñande reko potĩ, péro imanduʼa peteĩ mbaʼe iñimportantevévare: jasegivaʼerãha chupe, hemimboʼéramo. Ko mbaʼe ñande avei ñañehaʼãmbaitevaʼerã jajapo. Ndaikatúi ñambotapykue upéva ha ñamotenonde umi mbaʼerepy (Mateo 19:16-21).
16. a) Mbaʼépa jajapovaʼerã enterove kristianokuéra pe Rréinore? b) Mbaʼéichapa japredikakuaa pe Rréino, jahechaháicha páhina 116 ha 117-pe? c) Japredikávo ñande pyʼaite guive, mbaʼépa jahechaukañaína?
16 Iporã ñanemanduʼa jey Ñandejára oipotahague Jesús ombaʼapo meme pe Rréino rehehápe. Jesúspe ojeporavovaʼekue ogoverna hag̃ua Ñandejára Rréino. Avei, oĩrõ guare ko Yvy ape ári opredika kyreʼỹ vaʼekue pe Rréino. Ñande avei jajapovaʼerã upéva, ha heta mbaʼe oĩ ñanemokyreʼỹva jajapo hag̃ua ñande pyʼaite guive. Upéicha jahechauka jaguerohoryha pe derécho Jehová oguerekóva ñanegoverna hag̃ua ha jahayhuha avei ñande rapichápe (Mateo 22:36-40). Jahechauka avei entéro jaadoráva Jehovápe ñambaʼapoha peteĩcha, japredikávo pe Rréino. Ha oñondivepa ñañehaʼã jahupyty pe tekove opaveʼỹva, oĩtava Ñandejára Rréino ogoverna vove ko Yvy.
Ñanemanduʼa hag̃ua
• Mbaʼépepa ojojogua ha mbaʼépepa ojoavy Jesús vautísmo ha pe vautísmo koʼag̃agua?
• Mbaʼépa heʼise pe vautísmo ‘Túva ha Taʼýra ha espíritu sánto rérape’?
• Mbaʼépa oñehaʼarõ ñandehegui jajevautisa rire?
[Nóta oĩva taʼanga ndive páhina 116 ha 117]
MBAʼÉICHAPA IKATU JAPREDIKA PE RRÉINO
Opa ogaha rupi
Ñande rogayguápe
Umi ñanendive ombaʼapóvape
Ñane irũnguéra eskuelapeguápe
Jaguataha rupi
Javisita jeývo umi oikuaasevévape
Jastudiávo umi óga jára ndive