Kapítulo 13
Peteĩ aty guasu oĩva Jehová tróno renondépe
1. a) Mbaʼe raẽpa ohasavaʼerã Ñandejára rembiguaikuéra yma guare ha umi 144.000 ohupyty hag̃ua Ñandejára oprometevaʼekue? b) Mbaʼépa ohaʼarõ ‘peteĩ aty guasu’ oĩva koʼág̃a?
ABEL guive Juan el Bautista peve, umi Jehovápe oservíva oñehaʼãvaʼekue omotenonde Ñandejára oipotáva. Upéicharamo jepe, haʼekuéra omano pe esperánsa reheve oñemoingove jeytaha ko Yvy ape ári Ñandejára múndo pyahúpe. Umi 144.000, ogovernátava Cristo ndive yvágape, omano raẽ vaʼerã avei upearã. Upevére, Apocalipsis [Revelación] 7:9 heʼi koʼã ára pahápe oĩvaʼerãha ‘peteĩ aty guasu’ oúva opa tetãnguéragui ha, omanoʼỹre, ikatutaha oiko opa ára g̃uarã ko Yvy ape ári. Ndépa reime avei pe aty guasúpe?
Ojekuaa mávapa pe aty guasu
2. Mbaʼéichapa ojekuaavaʼekue mávapa pe aty guasu oĩva Apocalipsis [Revelación] 7:9-pe?
2 Pe áño 1923-pe, umi oservíva Ñandejárape ohechakuaa umi “ovecha” Jesús imanduʼahague Mateo 25:31-46-pe, ha umi “ambue ovechakuéra” oĩva Juan 10:16-pe peteĩnteha. Koʼãva hína umi tapicha oikótava opa ára g̃uarã ko Yvy ape ári. Ha 1931-pe, ohechakuaa hikuái koʼã “ambue ovechakuéra” haʼeha avei umi tapicha oñemarkáva isyvápe, oĩva Ezequiel 9:1-11-pe. Ha, ipahápe, 1935-pe ohechakuaa hikuái pe ‘aty guasu’ haʼeha umi ‘ambue ovechakuéra’ rehegua. Koʼág̃a oĩma heta millón umíva apytépe.
3. Mbaʼéichapa jaikuaa pe aty guasu “oñemboʼyvahína pe tróno [...] renondépe” noĩriha yvágape?
3 Apocalipsis [Revelación] 7:9-pe [BNP], ndeʼíri pe aty guasu oĩha yvágape. Heʼíramo jepe oñemboʼyha hikuái pe “tróno [...] renondépe”, upéva ndeʼiséi katuete oĩha yvágape, Jehová oguapyha renondépe. Heʼise uvei oĩha Ñandejára ohechahápe (Salmo 11:4). Jaikuaa hag̃ua pe aty guasu noĩriha yvágape, jahechakuaavaʼerã ojeʼeha hesekuéra ‘avave ndaikatuiha oipapa’. Ha ñambojojávo upéva Apocalipsis 7:4-8 ha 14:1-4-pe heʼívare, jatopa yvágape ohoha 144.000 tapichánte.
4. a) Mbaʼépa pe “jehasa asy guasu” ohasáva pe aty guasu? b) Heʼiháicha Apocalipsis [Revelación] 7:11, 12, mávapa omaña pe aty guasúre ha oadora hendivekuéra Ñandejárape?
4 Apocalipsis [Revelación] 7:14-pe [BNP], ojeʼe pe aty guasúre: “Koʼãva niko umi ouvaʼekue pe jehasa asy guasúgui”. Koʼã tapicha ohasa pe ára ijetuʼuvéva yvyporakuérape g̃uarã (Mateo 24:21). Omombaʼévo Ñandejára ha Crístope osalvahaguére chupekuéra, umi ánhel oĩva yvágape avei oadora Jehovápe hendivekuéra, heʼívo: “Amén! Ñemombaʼeguasu ha ñembotuicha, arandu ha techakuaa, terakuãguasu, puʼaka ha mbarete [...] Ñandejárape tapia g̃uarã. Amén” (Apocalipsis [Revelación] 7:11, 12, BNP).
Mbaʼéicha ohechauka hikuái omereseha oikove
5. Mbaʼéichapa ikatu jaikuaa mbaʼépa oñehaʼarõ umi oĩvagui pe aty guasúpe?
5 Pe jehasa asy guasu oiko jave, umi tapicha oĩva pe aty guasúpe nomanomoʼãi. Jehová oñangarekóta hesekuéra, ha ojapóta upéva haʼe oikuaaháicha. La Biblia ohechauka porã mbaʼépa oñehaʼarõ chuguikuéra. Upéicha umi omombaʼéva pe hustísia ikatúta oñehaʼã koʼã mbaʼére ha ohechauka omereseha oikove. Mbaʼépa ojapovaʼerã hikuái?
6. Mbaʼérepa pe aty guasu oñembojoja ovechakuérare?
6 Umi ovechakuéra imánso ha iñeʼẽrendu. Upévare, Jesús heʼírõ guare oguerekoha ambue ovechakuéra ndohomoʼãiva yvágape, oñeʼẽ umi tapicháre oikótava ko Yvy ape ári, ha iñeʼẽrendúva chupe. “Che ovechakuéra niko oikuaa che ñeʼẽ ha ou che rapykuéri”, heʼi Jesús (Juan 10:16, 27). Umi tapicha ojapysaka porã haʼe heʼívare ha iñeʼẽrendu chupe, ha upéicha oiko chuguikuéra hemimboʼe.
7. Mbaʼépa omoheñoivaʼerã hekovépe Jesús remimboʼekuéra?
7 Mbaʼépa avei oñehaʼarõ Jesús remimboʼekuéragui? Ñandejára Ñeʼẽ heʼi: “Pejeheja pende reko tujágui ha anive peiko yma guaréicha [...] ha pemoñepyrũ pende reko pyahu, [Ñandejára] ojapovaʼekue ijoguaháramo”, hustísia ha jeroviápe (Efesios 4:22-24). Oiko porã hag̃ua oñondive, Jesús remimboʼekuéra omoheñoivaʼerã hekovépe koʼã mbaʼe: “Mborayhu, vyʼa, pyʼaguapy, pasiénsia, pyʼaporã, mbaʼeporã, jeroviaha, jejapoʼỹ ha jererekokuaa” (Gálatas 5:22, 23, BNP).
8. Mbaʼépa ohaʼarõ pe aty guasu oipytyvõhaguére umi yvágape ohótavape?
8 Pe aty guasu oipytyvõ ojepredika hag̃ua pe marandu porã omoakãva umi ohótava yvágape (Mateo 24:14; 25:40). Umi ambue ovechakuéra ojapo upéva oikuaáramo jepe oĩtaha oñemoĩva hesekuéra. Oñepyrũvo ko ára paha, Jesucristo ha umi ánhel oĩva hendive omosẽvaʼekue Satanás ha idemoniokuérape yvágagui. Mbaʼépa ogueru upéva? “Ái anga umi yvy arigua [...]! aña oguejy rehe peẽme pochyete reheve, oikuaágui hiʼára mbykymaha.” (Apocalipsis [Revelación] 12:7-12, BNP). Upéicha, hiʼag̃uivévo ko múndo aña opa hag̃ua, Satanás oñemoĩ mbareteve Ñandejára rembiguaikuérare.
9. Mbaʼépa ohupyty Ñandejára siervokuéra ipredikasión rupive, ha mbaʼérepa?
9 Ojepersegi mbaretéramo jepe chupekuéra, osegi opredika hikuái. Pe primera gérra mundiál opárõ guare oĩvaʼekue mbovymi opredikáva, péro koʼág̃a oĩma millones. Jehová voi heʼivaʼekue: ‘Tahaʼe haʼéva pe oñemoĩva nderehe, nosẽporãmoʼãi’ (Isaías 54:17, NM). Peteĩ mburuvicha guasu oĩva pe trivunál hudíope ohechakuaavaʼekue avave ndaikatuiha ojoko pe tembiapo oúva Ñandejáragui. Oñeʼẽvo Jesús remimboʼekuérare, heʼi umi fariséope: “Pejeheja koʼã kuimbaʼégui ha ani pejoko. Ko mbaʼe oúrõ yvypóraguinte opa reíta. [Ñandejáragui] oúramo katu ndapejokoichéne, ha peñeñangarekóke, ani peñemoĩhína [Ñandejára] rehe” (Hechos 5:38, 39).
10. a) Mbaʼépa heʼise pe “márka” oguerekóva umi oĩva pe aty guasúpe? b) Mbaʼéichapa umi oservíva Ñandejárape iñeʼẽrendu “pe ñeʼẽ yvágagui” oúvape?
10 La Biblia ohechauka umi oĩva pe aty guasúpe oguerekoha peteĩ márka ojesalva hag̃ua (Ezequiel 9:4-6). Pe “márka” heʼise haʼekuéra oñemeʼẽhague Jehovápe, ojevautisa Jesucristo remimboʼéramo ha oñehaʼã oiko kristiáno teéicha. Umi tapicha ojapo pe “ñeʼẽ yvágagui heʼíva” enterove rrelihión japúre, ha oĩva Satanás poguýpe: “Pesẽ ichugui peẽ che reheguáva, ani hag̃ua pejeheʼa ipekadokuéra rehe, ha penderupyty pe iplága” (Apocalipsis [Revelación] 18:1-5, BNP).
11. Mbaʼéichapa ohechauka oserviha Ñandejárape umi oĩva pe aty guasúpe?
11 Avei, Jesús heʼivaʼekue hemimboʼekuérape: “Peẽ pejoayhúramo, opavave ohechakuaáta peẽ haʼeha che remimboʼe” (Juan 13:35). Umi rrelihionkuérape oĩva katu pyʼỹi ojuka hapichápe haʼégui ambue tetãyguánte. Ñandejára Ñeʼẽ heʼi: “Upéicha ojekuaa mávapa umi [...] Ñandejára raʼýva ha mávapa umi [Satanás] raʼýva, opa umi ndojapóiva pe hekopeteguáva térã ndohayhúiva iñermánope ndahaʼéi [...] Ñandejára raʼy. Pe ñeʼẽ peẽ pehenduvaʼekue iñepyrũha guive niko kóva: tajajoayhu. Ha ani Caíncha, aña mbaʼe vaʼekue haʼe ha ojuka [iñermánope]” (1 Juan 3:10-12, BNP).
12. Mbaʼépa ojapóta Jehová umi ‘yvyra’ hiʼa vaívare og̃uahẽvo pe jehasa asy guasu?
12 Jesús omboʼe: “Ha péicha, opa yvyra iporãva hiʼa porã. Umi yvyra ivaíva katu hiʼa vai. Ndaikatúi pe yvyra iporãva hiʼa vaívo, térã pe yvyra ivaíva hiʼa porãvo. Opa yvyra ndahiʼaporãiva oñekytĩ ha oñemombo tatápe. Ha péicha, hembiapokuére peẽ pehechakuaáta mávapa umi [proféta] japu” (Mateo 7:17-20). Umi rrelihión oĩva ko múndope ndahiʼaporãi, ha upéva ohechauka ‘yvyra vaiha’, ha Jehová koʼẽrõite ohundipáta chupekuéra pe jehasa asy guasúpe (Apocalipsis [Revelación] 17:16).
13. Mbaʼéichapa umi oĩva ko aty guasúpe ohechauka oñemboʼyhahína Jehová tróno renondépe?
13 Apocalipsis [Revelación] 7:9-15-pe [BNP], ojehecha mbaʼérepa ojesalva pe aty guasúpe. Ojehecha chupekuéra ‘oñemboʼyhahína [Jehová] tróno [...] renondépe’, ha omombaʼe oñondivepa Jehová sãmbyhy. “Ojoheivaʼekue ijaokuéra ha omomorotĩ pe Ovecha Raʼy ruguýpe”, heʼiséva ohechakuaaha Jesús sakrifísio omopotĩha chupekuéra (Juan 1:29). Haʼekuéra ojededika térã oñemeʼẽ Ñandejárape ha ohechauka upéva ojevautisávo. Upéicha ipotĩ hikuái Ñandejára renondépe, ojehecháva ijao potĩre, “ha oservi ichupe ára ha pyharépe”. Ikatúpa ñande ñambaʼapove ñaime hag̃ua ko aty guasúpe?
Umi mbaʼe porã ohupytýmava hikuái
14. Mbaʼe iporãvapa ohupytýma koʼág̃a voi umi Ñandejárape oservíva?
14 Oiméne nde rehecha mbaʼéichapa koʼág̃a voi Jehová omeʼẽ heta mbaʼe porã umi chupe oservívape. Pór ehémplo, reikuaa ypýrõ guare Ñandejára ojapótava, rehechavaʼekue oĩha peteĩ esperánsa ijojahaʼỹva ne renonderãme. Upévare, koʼág̃a reguerekóma peteĩ mbaʼe iporã añetéva rejapo hag̃ua: reservi Ñandejárape ha upéicha ikatúta reikove opa ára g̃uarã ko Yvy ape ári peteĩ paraísope. Upeichaite, pe Rréi Jesucristo ogueraháta pe ‘aty guasúpe’ umi “yvu oporomoingovéva” oĩhápe (Apocalipsis [Revelación] 7:17, BNP).
15. Mbaʼe venefísiopa ohupytýma Jehová testigokuéra ndojeheʼaihaguére polítika ha teko kyʼáre haʼe ojerureháicha?
15 Umi oĩva pe aty guasúpe ohupytýma ko mbaʼe iporãitereíva: ojoayhu ha oiko porãmba hikuái oñondive. Ñañehekomboʼégui enterove peteĩcha ha jaikógui Ñandejára Ñeʼẽ heʼiháicha, ndajajoavýi polítikare térã umi tetã provlemakuérare. Avei, ñande reko potĩ Ñandejára ojerureháicha isiervokuérape (1 Corintios 6:9-11). Upévare, jaikorangue jajeheʼa umi joavy ha teko kyʼa ko múndope oĩvare, Jehová puévlo oiko peteĩ paraíso espirituálpe. Jahechami mbaʼéichapa ohechauka upéva Isaías 65:13, 14.
16. Oñandúramo jepe umi provléma oĩva ko múndope, mbaʼe esperánsapa oguereko pe aty guasu?
16 Añete, umi tapicha oservíva Ñandejárape ndahaʼéi perfékto. Avei, haʼekuéra oñandu umi provléma ohasáva opaichagua tapicha, ha ohasa asy umi tetãnguéra oñorairõ jave. Avei, ikatu hasy ha omano. Upéicharamo jepe, ojerovia pe múndo pyahúpe Ñandejára “omokãta[ha] hesaykuéra, ndaiporimoʼãveima[ha] ñemano, tasẽ, jaheʼo ha temimbyasy” (Apocalipsis [Revelación] 21:4).
17. Ikatúramo jepe koʼág̃a ojehu ñandéve heta mbaʼe ivaíva, mbaʼépa ñaneraʼarõ jaadoráramo Ñandejára añeteguápe?
17 Ñamanóramo jepe tujágui, mbaʼasýgui, aksidénte térã jajepersegi rupi, Jehová ñanemoingove jeýta pe Paraísope (Hechos 24:15). Upéicha, Cristo oisãmbyhy aja pe Rréino mil áño pukukuére, jaguerekóta hetaiterei mbaʼe porã omombaretétava ñande jerovia. Jahayhuvéta Ñandejárape jahechávo mbaʼéichapa ojejapo haʼe oipotáva. Ha jahupytývo umi mbaʼe porãita omeʼẽtava yvyporakuérape, jahayhuetevéta chupe (Isaías 25:6-9). Añetehápe hetaiterei mbaʼe porã ohaʼarõ Ñandejára siervokuérape!
Ñanemanduʼa hag̃ua
• Mbaʼépa heʼi la Biblia ohasataha pe “aty guasu”?
• Ñaimeséramo pe “aty guasúpe”, mbaʼépa jajapovaʼerã koʼág̃a?
• Mbaʼéichapa nde rehecha umi mbaʼe porã ohupytýmava pe “aty guasu” ha umi oñemeʼẽtava chupekuéra Ñandejára múndo pyahúpe?
[Nóta oĩva taʼanga ndive páhina 123]
Hetaiterei tapicha oĩva pe aty guasúpe oadora peteĩ ñeʼẽme Ñandejára añeteguápe