Kapítulo 20

Jajesareko meméke Jehová árare

1. Mbaʼéichapa reñeñandurakaʼe reikuaárõ guare opatamaha opa mbaʼe vai ko múndope oikóva?

JASTUDIA ypýrõ guare la Biblia jaikuaa raẽ vaʼekue Jehová oipotaha ko Yvýgui oiko peteĩ paraíso. Upe múndo pyahúpe ndaiporimoʼãvéima gérra, hembiapo vaíva, imboriahúva, hasýva, ohasa asýva térã omanóva. Ha umi omanovaʼekue jepe oñemoingove jeýta. Ajépa iporãite koʼã mbaʼe ñaneraʼarõva! Umi mbaʼe oikovaʼekue ohechauka 1914 guive Jesucristo haʼemaha Rréi ha ogovernamaha yvágape. Avei ohechauka jaikomaha ko múndo ára pahápe ha hiʼag̃uimaha umi mbaʼe porã. Og̃uahẽvo huʼãme koʼã ára paha, Jehová ohundíta ko múndo ha omoĩta pe múndo pyahu oprometevaʼekue.

2. Mbaʼépa pe Jehová ára?

² Ñandejára Ñeʼẽ ohenói ‘Jehová ára’ pe tiémpo oñehunditahápe opa mbaʼe vai ha hiʼag̃uímava koʼág̃a (2 Pedro 3:10). Upéva hína ‘Ñandejára ipochytaha ára’ ha ohundítava Satanás múndo aña (Sofonías 2:3). Ko mbaʼe opáta “Ñandejára ipuʼakapáva ára guasúpe [...] evréo ñeʼẽme héravape Armagedón”. Upe ñorairõme, oñehundipáta “umi mburuvichakuérape” (Apocalipsis [Revelación] 16:14, 16, BNP). Ojehechápa nderehe rehechakuaaha Jehová ára hiʼag̃uimaha? (Sofonías 1:14-18; Jeremías 25:33.)

3. a) Arakaʼépa og̃uahẽta Jehová ára? b) Mbaʼérepa iporã Jehová nomombeʼúi arakaʼépa og̃uahẽta “upe ára ha upe óra”?

³ La Biblia ndeʼíri arakaʼetépa oúta Jesucristo ohundi hag̃ua Jehová oipotaháicha ko múndo oĩva Satanás poguýpe. Jesús heʼivaʼekue: “Upe ára ha upe óra katu avave ndoikuaái, anhelkuéra yvágape oĩva ha [...] Ñandejára raʼy jepe ndoikuaái, Túva añoitémante” (Marcos 13:32, BNP). Umi ndohayhúiva Jehovápe ikatu oñembyesarái Jehová ára guasúgui ha oñemoĩ ombaʼapo ijupe g̃uarãnte. Péro umi ohayhúva Jehovápe oservíta chupe ipyʼaite guive, ndoikuaáiramo jepe arakaʼetépa opáta ko múndo aña (Salmo 37:4, 1 Juan 5:3).

4. Mbaʼépa heʼivaʼekue Jesús?

⁴ Jesús heʼi mbaʼépa ojapovaʼerã umi ohayhúva Jehovápe: “Peikóke pendepáype ha peñeñangarekóke pendejehe, ndapeikuaáigui arakaʼépa og̃uahẽta upe ára” (Marcos 13:33-37). Avei ñanemokyreʼỹ ani hag̃ua jajepyʼapyeterei jaʼuvaʼerãre, térã ñaikotevẽvare ñande rekovépe ha upéicha ñanderesarái hiʼag̃uimaha upe ára (Lucas 21:34-36; Mateo 24:37-42).

5. Pedro heʼihaguéicha, mbaʼépa oguerúta Jehová ára?

⁵ Pe apóstol Pedro heʼi avei jajesareko meme vaʼerãha Jehová árare. Heʼivaʼekue: “upe árape, pe yvága oñehundíta tatápe, ha opa mbaʼe yvagapegua hykúne tata rendýpe”. Opa yvypóra goviérno, oñehenóiva “pe yvága”, oñehundíta. Upéicha avei yvyporakuéra iñañáva oñehenóiva “pe yvy”. Avei oñehundíta “opa mbaʼe” oĩva ko múndo añáme, térã umi mbaʼe ojeʼe ha ojejapóva ipype, umíva apytépe umi oikóva iñakãre, umi heko vaíva ha oikóva pláta rapykuéri. Oñemoĩta koʼã mbaʼe rendaguépe “peteĩ yvága [Ñandejára Rréino yvagapegua] ha yvy ipyahúva [umi yvyporakuéra heko porãva], ha upépe opaite mbaʼe oikóta [Ñandejára] oipotaháicha” (2 Pedro 3:10-13). Koʼã mbaʼe oikótava ko múndope oñepyrũta oñehaʼarõʼỹve jave (Mateo 24:44).

Jajesareko porã pe oikóvare

6. a) Mbaʼeichaitépa oñekumplirakaʼe umi hudiokuérare Jesús heʼivaʼekue hemimboʼekuérape? b) Mbaʼe mbaʼe Jesús heʼivaʼekuépa oñepyrũ ojehecha 1914 guive?

⁶ Jaikógui koʼã tiémpope, jaikuaa porã vaʼerã mbaʼe mbaʼépa ohechauka ñaimemaha pe ára pahápe, térã “opatamaha ko múndo, [BNP]”. Mateo 24:3-pe jatopa mbaʼépa oporanduvaʼekue Jesúspe hemimboʼekuéra. Umi mbaʼe Jesús heʼivaʼekue versíkulo 4 guive 22 peve oñekumpli michĩmi umi hudiokuérare pe áño 33 guive 70 peve. Péro upe profesía oñekumpli porãve 1914 guive, oñepyrũvo Jesucristo ogoverna yvágape ha ko múndo oike hiʼára pahápe. Mateo 24:23-28 omombeʼu ñandéve mbaʼépa oikovaʼerã pe áño 70 guive og̃uahẽ meve pe ára Jesucristo ogoverna hag̃ua yvágape. Ha umi mbaʼe ojeʼéva Mateo 24:29 guive 25:46 peve omombeʼu pe oikovaʼerã ko ára pahápe.

7. a) Mbaʼérepa opavave jajesareko porã vaʼerã umi mbaʼe oikóvare ha ohechaukáva jaikomaha pe ára pahápe? b) Embohovái umi porandu oĩva ko párrafo rire rehechauka hag̃ua mbaʼérepa jaʼe 1914 guive ñaimemaha pe ára pahápe.

⁷ Opavave jajesareko porã vaʼerã umi mbaʼe oikóvare ha ohechaukáva jaikomaha pe ára pahápe. Ñambojojáramo koʼã mbaʼe umi profesía Bíbliape oĩvare, ñanepytyvõta jajesareko meme hag̃ua Jehová árare. Upéicha avei ñaime porãvéta jahechauka hag̃ua ñande rapichápe hiʼag̃uimaha upe ára (Isaías 61:1, 2). Jajapo hag̃ua upéva ñañeporandumi koʼã mbaʼe ohechaukáva ñaimemaha pe ára pahápe heʼiháicha Mateo 24:7 ha Lucas 21:10, 11.

Mbaʼéichapa 1914 guive opuʼã ojuehe umi tetãnguéra ojeʼehaguéicha Ñandejára ñeʼẽme? Mbaʼeichagua ñorairõpa oiko avei upe guive?

Mbaʼeichagua mbaʼasýpa 1918-pe oporojuka hetave vaʼekue pe I Guerra Mundial-gui? (Ikatu rehecha folléto Peñatende porãke peikóvo! páhina 4, párrafo 4.) Oikuaáramo jepe heta mbaʼe umi doktór, mbaʼeichagua mbaʼasýpa ojuka gueteri hetaitereípe?

Mbaʼeichaitémapa oñandu ñembyahýi yvyporakuéra, jepe heta mbaʼe ojejapo pe síglo ohasavaʼekuépe?

Mbaʼérepa reguerovia 2 Timoteo 3:1-5, 13 nomombeʼuiha mbaʼéichapa yma ojeikovaʼekue, omombeʼuha uvei mbaʼéichapa ijetuʼuve vaʼerã ohóvo opa mbaʼe og̃uahẽvo huʼãme ko ára paha?

Ojeporavo yvyporakuérape

8. a) Mbaʼépa heʼi avei Jesús oikovaʼerãha ko múndo ára paha jave, oñemombeʼuháicha Mateo 13:24-30, 36-43-pe? b) Mbaʼépa heʼisevaʼekue Jesús?

⁸ Oĩ avei hetave mbaʼe Jesús heʼivaʼekue oikotaha ko múndo ára pahápe. Umíva apytépe mbaʼéichapa ojeporavo “umi rréino yvagapegua” raʼykuéra ha ‘umi Satanás’ raʼykuéra. Upéva Jesús ombojojavaʼekue peteĩ trígo týre, peteĩ iñañáva oñotỹhaguépe ñana vai pe trígo apytépe. “Pe trígo” hína umi kristiáno añetegua ohótava yvágape. “Pe ñana vai” katu umi heʼínteva ijehe kristianoha péro ojehecháva ouha pe añágui, ndohejaséigui hikuái ko múndo oĩva Satanás poguýpe. Koʼãvape ojepeʼa “umi rréino yvagapegua” raʼykuéra apytégui ha oñemboyke chupekuéra oñehundi hag̃ua (Mateo 13:24-30, 36-43, BNP). Ojeporavopámapa yvyporakuérape?

9. a) Mbaʼeichagua atýpepa oñemoĩ umi heʼívape ijehe kristianoha pe I Guerra Mundial rire? b) Mbaʼéichapa ohechauka umi kristiáno ohótava yvágape añetehápe oserviha pe Rréinope?

⁹ Opa rire pe I Guerra Mundial oñemoĩ mokõi atýpe umi heʼívape ijehe kristianoha: 1) umi omoakãva rrelihionkuéra ha umi oĩva hendivekuéra. Koʼãva oñemoĩ pe Sociedad de Naciones ykére (koʼág̃a Organización de las Naciones Unidas) ha avei osegi ojerovia hetãre, ha 2) umi kristiáno añetegua oikovaʼekue upe gérra rire oñemoĩva Ñandejára Rréino ykére, ndahaʼéi umi tetãnguéra poguýpe (Juan 17:16). Koʼãva ohechauka añetehápe oserviha Ñandejára Rréinope oñepyrũvo oikuaauka “pe marandu porã” Rréino rehegua ko Yvy tuichakuére (Mateo 24:14). Mbaʼépa ojehupyty ojejapohaguére upéva?

10. Mbaʼe raẽpa ojejapo ojepredika rupi pe notísia porã Rréino rehegua?

¹⁰ Ñepyrũrã, oñembyatypa umi Ñandejára oiporavovaʼekue oho hag̃ua yvágape ha oĩva gueteri Yvy ape ári. Haʼekuéra oĩta Jesucristo ndive pe Rréino yvagapeguápe. Isarambíramo jepe hikuái heta tetã rupi, oñembyaty chupekuéra peteĩ organisasiónpe. Hiʼag̃uíma pe ára ojesellapa hag̃ua umi ohótava yvágape (Apocalipsis [Revelación] 7:3, 4).

11. Mbaʼépa ojejapo meme hína oñembyaty hag̃ua yvyporakuérape, ha mbaʼe profesíapa oñeʼẽ upévare?

¹¹ Avei, Jesucristo rupive oñepyrũ oñembyaty “peteĩ aty guasu [...], opa tetã, ha tetãygua, ha trívu, ha ñeʼẽ rehegua”. Umíva hína umi “ambue ovechakuéra” ohasátava “pe jehasa asy guasu” ha oike Ñandejára múndo pyahúpe (Apocalipsis [Revelación] 7:9, 14; Juan 10:16, BNP). Ñandejára Rréino ojepredika meme og̃uahẽ mboyve pe fín. Pe aty guasu tuichaitereímava, ombaʼapo umi yvágape ohótava ndive omosarambi hag̃ua pe notísia iñimportantetéva oñeʼẽva Ñandejára Rréinore. Upe notísia oñehendúma opa tetã rupi.

Mbaʼépa oikovaʼerã gueteri?

12. Hetápa ojepredikavaʼerã gueteri og̃uahẽ hag̃ua Jehová ára?

¹² Koʼã mbaʼe jahechavaʼekue heʼise pe ára paha og̃uahẽtamaha huʼãme ha Jehová ára hiʼag̃uietemaha. Péro, oĩvépa profesía oñekumplivaʼerã og̃uahẽ mboyve upe ára guasu? Oĩve. Umíva apytépe, pe heʼíva ojepredikavaʼerãha opárupi. Ko predikasión rupive ojehecha mávapa omombaʼe Ñandejára Rréino. Heta hendápe, ijetuʼuhaguépe yma ojepredika, koʼág̃a oĩma heta kristiáno. Oĩramo jepe nohenduséiva pe marandu porã, japredikávo jahechaukañaína Jehová oiporiahuverekoha yvyporakuérape. Upévare, jasegíke japredika! Jesús heʼivaʼekue ojejapopávo ko tembiapo og̃uahẽtaha pe fín.

13. Mbaʼe heʼíva 1 Tesalonicenses 5:2, 3-pe neʼĩra gueteri oiko, ha mbaʼépa heʼiséta ñandéve g̃uarã?

¹³ Avei peteĩ profesía oĩva Ñandejára Ñeʼẽme heʼi: “Heʼi jave hikuái: ‘Ñaime porã ha ndaipóri jajepyʼapy hag̃ua’ upeichahágui ouvaʼerã hiʼarikuéra sarambi guasu og̃uahẽháicha pe kuñáme ohaʼarõʼỹhágui mbaʼasy imemby hag̃ua, ha ndaikatumoʼãi mamove okañy” (1 Tesalonicenses 5:2, 3, BNP). Ndajaikuaái gueteri mbaʼeichaitépa oikóta ko mbaʼe. Péro, upéva ndeʼiséi umi mburuvichakuéra ko mundopegua omyatyrõtaha yvyporakuéra provléma. Umi ojesareko porãva Jehová árare ndohejamoʼãi avave ombotavy chupekuéra, oikuaa rupi ojeʼe rire upéicha oñeimoʼãʼỹve jave og̃uahẽtaha upe ñehundi.

14. Mbaʼe mbaʼépa oikóta pe jehasa asy guasu jave, ha mbaʼéichapa oñepyrũta?

¹⁴ Oñepyrũvo pe jehasa asy guasu, umi mburuvichakuéra opuʼãta ha ohundíta Babilonia Guasu, umi rrelihión japu oĩva (Mateo 24:21; Apocalipsis [Revelación] 17:15, 16). Upe rire, umi tetãnguéra oñehaʼãta ohundi umi tapicha oñemoĩva Jehová goviérno ndive. Upéva ombopochýta Ñandejárape ha ohundietéta opa goviérno ha umi oĩva hendivekuéra. Upépe og̃uahẽta huʼãme pe jehasa asy guasu, Armagedónpe. Ha oñemoĩta yvykua guasúpe Satanás ha idemoniokuérape, anive hag̃ua ojapo ivaíva yvyporakuérare. Upéicha og̃uahẽta huʼãme Jehová ára, ha héra oñemombaʼeguasúta (Ezequiel 38:18, 22, 23; Apocalipsis [Revelación] 19:11-20:3).

15. Mbaʼérepa naiporãi ñapensa Jehová ára nog̃uahẽmoʼãiha gueteri?

¹⁵ Ko múndo oñehundíta Ñandejára heʼihague árape. Ndotardamoʼãi (Habacuc 2:3). Ñanemanduʼavaʼerã Jerusalén oñehundihague umi hudío ohaʼarõʼỹve jave pe áño 70-pe. Haʼekuéra oimoʼãvaʼekue ndoikoveimaha mbaʼeve ivaíva. Ha mbaʼépa ikatu jaʼe Babilonia ymaguarére? Ojeroviáramo jepe hikuái imbarete ha oĩ porãgui umi murálla guasu kupépe, pe táva hoʼa peteĩ pyharépente. Upéicha avei ko múndo aña oñehundíta oñeimoʼãʼỹve jave. Upéva oiko vove, ñamombaʼeguasuvaʼerã jaikóvo oñondivepa Ñandejárape. Upearã jajesareko meme vaʼerã Jehová árare.

Ñanemanduʼa hag̃ua

• Mbaʼérepa tekotevẽ jajesareko meme Jehová árare? Mbaʼéichapa ikatu jajapo upéva?

• Mbaʼéichapa jahechavaʼerã pe tembiapo ojejapóva oñembyaty hag̃ua yvyporakuéra?

• Mbaʼépa oikovaʼerã Jehová ára oñepyrũ mboyve? Upévare, mbaʼépa jajapovaʼerã jaikóvo?

[Nóta oĩva taʼanga ndive páhina 180 ha 181]

Koʼẽrõite og̃uahẽta huʼãme pe ára paha oñehundívo ko múndo oĩva Satanás poguýpe