Jesús ohechauka mbaʼéichapa ñañemboʼe vaʼerã

¿NDÉPA reñeʼẽ jepi Jehová ndive?... Haʼe oipota reñemongeta hendive. Ha reñeʼẽ jave Jehovápe reñemboʼe hína chupe. Jesús pyʼỹi oñemboʼémi Itúvape, ha sapyʼánte oñemohaʼeño upearã. La Biblia heʼi peteĩ díape Jesús ‘ojupi hague haʼeño pe sérrope oñemboʼe hag̃ua. Ha pyharepyte peve opyta upépe’ (Mateo 14:23).

¿Moõpa ikatu reñemboʼe neañoháme?... Ikatu reñemboʼe nde kotýpe reke mboyve. Jesús heʼi vaʼekue: “Reñemboʼéta jave, eike nde kotýpe ha remboty rire ne rokẽ, eñemboʼe nde Ru yvagapeguápe” (Mateo 6:6). ¿Reñemboʼépa káda pyhare reke mboyve?... Rejapo vaʼerã upéva.

Jesús ndahaʼéi oñemboʼéva oĩ jave haʼeñónte. Por ehémplo, iñamígo Lázaro omanórõ guare, haʼe oho pe oñeñotỹ haguépe ha oñemboʼe umi hénte apytépe (Juan 11:41, 42). Jesús oñemboʼe avei oĩ jave idisipulokuéra ndive. Ha nde, ¿rehóva piko umi rreunión oĩháme peteĩ oñemboʼéva Ñandejárape?... Umícha jave peteĩ kakuaa oñemboʼe, ha tekotevẽ rehendu porã pe heʼíva, ¿mbaʼérepa? Oñemboʼe rupi nderehe avei. Ha oñemboʼepa rire ikatúta ere “taupéicha” térã “amén”. ¿Ndépa reikuaa mbaʼérepa jaʼe upéva?... Jahechauka hag̃ua oĩ porãha ñandéve g̃uarã upe ojeʼe vaʼekue.

Jesús oñemboʼe vaʼekue avei okaru mboyve oagradese hag̃ua Jehovápe hembiʼúre. ¿Ndépa reñemboʼe jepi rekaru mboyve?... Iporã jaagradese Jehovápe jareko haguére jaʼumi vaʼerã. Sapyʼánte ikatu oĩ ótro oñemboʼéva pekaru hag̃ua. Péro ¿mbaʼépa rejapóta reĩramo neaño térã umi oĩva nendive noñemboʼéirõ? Upéicha jave ndete reñemboʼe vaʼerã.

¿Ohendúpa Jehová ñañemboʼéramo chupe kirirĩháme, térãpa ñañemboʼe hatãmante vaʼerã?... Jahechami mbaʼépa ojapo vaʼekue Nehemías. Haʼe ningo omombaʼeguasu Jehovápe ha ombaʼapo Pérsiape, rréi Artajerjes palásiope. Peteĩ díape, Nehemías ndovyʼaiete oikuaa rupi hoʼapa hague Jerusalén murálla.

Pe rréi oporandúrõ guare Nehemíaspe mbaʼérepa ndovyʼái, upepete Nehemías oñemboʼe kirirĩháme. Upéi omombeʼu pe rréipe mbaʼépa la oipyʼapýva chupe, ha oporandu ndaikatuichénepa oho Jerusalénpe omopuʼã jey hag̃ua umi murálla hoʼapa vaʼekue. ¿Mbaʼépa oiko upéi?...

Ñandejára ohendu Nehemías ñemboʼe. Pe rréi heʼi Nehemíaspe ikatuha oho, ha omeʼẽ avei chupe heta yvyra oiporu hag̃ua. Upéicha jahecha, Jehová ikatuha ñanerendu ñañemboʼéramo jepe kirirĩháme (Nehemías 1:2, 3; 2:4-8).

¿Tekotevẽpa reñakãity térã reñesũ reñemboʼe jave? ¿Mbaʼépa nde repensa?... Jesús oñemboʼe vaʼekue heta hendáicha: oñesũ, oñemboʼy ha Lázaro omanórõ guare katu omaña yvága gotyo oñemboʼe hag̃ua.

¿Mbaʼépa ohechauka ñandéve upéva?... Ikatuha ñañemboʼe heta hendáicha. Sapyʼánte ikatu ñañakãity ha ñamboty ñande resa. Térã ikatu avei ñañesũ ojapo haguéicha Jesús. Ñanemanduʼa vaʼerã avei ikatuha ñañemboʼe Jehovápe oimeha óra, tahaʼe pyharekue térã de día. Iñimportanteveha katu, jaguerovia vaʼerã haʼe ohendutaha ñane ñemboʼe. ¿Ndépa reguerovia upéva?...

¿Mbaʼépa ikatu jaʼe ñañemboʼe jave?... Eremína chéve, ¿ndépa mbaʼe ere jepi Jehovápe?... Haʼe ningo omeʼẽ ñandéve hetaiterei mbaʼe porã, ¿naiporãmoʼãipa jaagradese chupe umi mbaʼére?... Iporã añete reñemboʼe rekaru mboyve, ¿péro rejepokuaápa reagradese avei Jehovápe ojapo haguére pe yvága hovy asy, umi yvyramáta ha umi yvoty iporã porãva?...

Peteĩ díape, Jesús disipulokuéra oporandu vaʼekue chupe mbaʼéichapa oñemboʼe vaʼerã. Upérõ guare, pe Mboʼehára Guasu heʼi chupekuéra umi mbaʼe iñimportantevéva ikatúva heʼi oñemboʼe jave. ¿Ndépa reikuaa mbaʼépa umíva?... Ikatu reavri nde Biblia, ha eheka Mateo kapítulo 6, versíkulo 9 guive 13 peve. Upépe retopáta pe ñemboʼe oñehenóiva padrenuestro. Jaleemína oñondive.

Ko téxtope jahecha Jesús oipotaha jajerure ñane ñemboʼépe oñemomarangatu hag̃ua Ñandejára réra, térã toñemopotĩ ha tojerrespeta héra. ¿Nemanduʼápa mbaʼéichapa héra Ñandejára?... Jehová, ha ñande jahayhu vaʼerã héra.

Upéi, Jesús heʼi jajerure hag̃ua tou Ñandejára Rréino térã igoviérno. ¿Mbaʼérepa iñimportánte jajerure upéva? Pórke ko Rréino ou vove jaikóta pyʼaguapýpe peteĩ hardínpe ko yvy ape ári.

Pe Mboʼehára Guasu heʼi avei jajerure hag̃ua tojejapo Ñandejára rembipota ko yvy ape ári yvagapeguáicha. Ñande jajeruréramo upéva, koʼág̃ama voi jajapo vaʼerã Ñandejára oipotáva.

Upe rire Jesús heʼi jajerure hag̃ua Jehovápe tomeʼẽ ñandéve jaʼumi vaʼerã káda día. Heʼi avei tekotevẽha ñambyasy jajapóramo mbaʼe vai, ha jajerure Jehovápe tañaneperdona. Péro jaipotáramo Jehová ñaneperdona, ñande raẽve ñaperdona vaʼerã ñande rapichápe. ¿Ijetuʼúpa ndéve reperdona nde rapichápe?...

Ipahaitépe, Jesús heʼi ikatuha jajerure Jehovápe pono jaʼa Satanás poguýpe. Upéicharõ, ñañemboʼe jave ikatu jajerure opa koʼã mbaʼe.

Jaguerovia vaʼerã Jehová ñanerendutaha. Ha iporãramo jepe jajerure ñanepytyvõ hag̃ua, tekotevẽterei avei jaagradese chupe umi mbaʼe omeʼẽvare ñandéve. Jehová ovyʼaiterei ñamombeʼúramo chupe opa mbaʼe ñapensa ha ñañandúva. Ha oĩ porãramo umi mbaʼe jajeruréva chupe, haʼe katuete omeʼẽta ñandéve. ¿Ndépa reguerovia upéva?...