Jaiporavo ñane amigorã umi ohayhúva Jehovápe

ÑANDE ningo javyʼa ñane amigokuérandi. Igústo ñañeʼẽ ha ñaime hendivekuéra. Péro tekotevẽterei jaiporavo porã ñane amigorã. ¿Mávapa ndéverõ g̃uarã pe amígo ñanepytyvõvétava ha ñanderayhuvétava?... Upeichaite. Ñandejára Jehová.

Péro ¿ikatu piko oiko ñandehegui Ñandejára amígo?... La Biblia heʼi peteĩ kuimbaʼe oiko vaʼekue yma hérava Abrahán haʼe hague “Jehová amígo” (Santiago 2:23). ¿Reikuaápa mbaʼérepa?... La Biblia heʼi Abrahán iñeʼẽrendu hague Jehovápe, sapyʼánte ijetuʼúramo jepe chupe. Upéicharõ, jaiko hag̃ua Jehová amígoramo jajapo vaʼerã umi mbaʼe ogustáva chupe, ojapo haguéicha Abrahán ha pe Mboʼehára Guasu (Génesis 22:1-14; Juan 8:28, 29; Hebreos 11:8, 17-19).

Jesús heʼi vaʼekue ijapostolkuérape: “Peẽ hína che amígo, pejapóramo che haʼéva” (Juan 15:14). Jesús ningo omanda chupekuéra umi mbaʼe Itúva oipotávante. Upéicharõ la heʼise vaʼekue haʼe oiporavoha iñamigorã umi ojapóva Ñandejára heʼíva.

Por ehémplo, umi apóstol ningo pe Mboʼehára Guasu amigoite vaʼekue, ikatu rehecha chupekuéra páhina 75-pe. Haʼekuéra ojapo heta mbaʼe Jesús ndive. Oviahámi hendive ha omoirũ chupe omboʼe hag̃ua umi héntepe. Avei okarúmi oñondivepa. Péro Jesús oreko vaʼekue hetave amígo. Sapyʼánte haʼe opyta hogapekuéra ha ovyʼa hikuái oñondivepa.

Jesús heta vése opyta vaʼekue iñamigokuéra rógape oĩva Betániape, ko puévlo opyta namombyryiete Jerusaléngui. ¿Nemanduʼápa máva mávapa oiko vaʼekue upépe?... María, Marta ha iñermáno Lázaro. Jesús heʼi vaʼekue voi Lázaro iñamigoha (Juan 11:1, 5, 11). Haʼe ohayhu vaʼekue Lázaro ha iñermanakuérape ha ovyʼa upépe pórke haʼekuéra ohayhu ha iñeʼẽrendu Jehovápe.

Péro upéva ndeʼiséi Jesús ndotrataporãi hague umi naiñeʼẽrendúivape Ñandejárape. Haʼe ningo ohómi vaʼekue avei hogapekuéra ha okaru upépe. Upévare oĩ heʼíva haʼe “ojeheʼa [hague] umi pekadór ha impuésto kovraháre” (Mateo 11:19). Péro ndohói hendapekuéra ogustágui chupe umi mbaʼe vai ojapóva hikuái. Haʼe ovisita koʼã héntepe omboʼe hag̃ua chupekuéra mbaʼéichapa Ñandejára oipota jaiko. Péicha oipytyvõ umi héntepe okambia hag̃ua.

Peteĩ jey, ohokuévo Jerusalénpe ohasa Jericórupi. Upépe peteĩ kuimbaʼe hérava Zaqueo ohechase Jesúspe, péro ndaikatúi pórke ikarape ha umi hénte omoʼãmba chupe. Upémarõ pyaʼe oho ojupi peteĩ yvyramátare ohecha hag̃ua Jesúspe ohasakuévo.

Jesús oñembojávo pe yvyramáta oĩháme heʼi chupe: ‘Pyaʼe eguejy upégui, koestedía aháta nde rógape’. Zaqueo ningo peteĩ karai ipláta hetáva omonda rupi. ¿Maʼerã piko Jesús ohose peteĩ hembiapo vaíva rógape?...

Jesúspe ndogustái umi mbaʼe Zaqueo ojapóva, péro omboʼese chupe Ñandejára heʼíva. Jesús opilla haʼe oñehaʼãmbaite hague ohecha chupe, péicha ohechakuaa ko kuimbaʼe ohenduseha haʼe omboʼéva. Upévare Jesús oaprovecha omombeʼu hag̃ua Zaquéope mbaʼépa Ñandejára oipota ojapo.

Rehechaháicha ko divúhope, ¿mbaʼépa oiko raʼe upéi?... Zaquéope ogustaiterei Jesús omboʼéva ha ombyasy omonda haguére umi héntepe. Upévare opromete omeʼẽ jeytaha chupekuéra ipláta. Upe rire oiko chugui pe Mboʼehára Guasu disípulo ha upépe ae oiko chugui Jesús amígo (Lucas 19:1-10).

Ha ñande, ¿ikatúpa javisita umi ndahaʼéivape ñane amígo?... Ikatu. Péro ndahaʼéi ñandegustágui oiko lája hikuái ni jajapo hag̃ua umi mbaʼe vai ojapóva. Síno ñamboʼe hag̃ua chupekuéra Ñandejára heʼíva.

Ñande ningo javyʼa ñaime jave ñane amigokuérandi. Péro ñanemanduʼa vaʼerã jaiporavo vaʼerãha ñane amigorã umi ohayhúva Ñandejárape. Ikatu ningo oĩ ni ndoikuaáiva mávapa Jehová, péro oaprendeséramo chugui ñamboʼekuaa chupe. Upéi pe tapicha ohayhúramo Jehovápe ipyʼaite guive, ikatu oiko chugui ñane amígo.

Reikuaa hag̃ua avei reiporavo porãpa hína ne amigorã rehecha vaʼerã mbaʼépa ojapo jepi. ¿Ovyʼápa ojapo jave mbaʼe vai hapicháre? ¿Iporã piko upéva?... ¿Pyʼỹintepa ojeporta vai ha upévare ojekastiga? Ndaigustomoʼãi ñande avei ñaneprovlémarõ ikáusare ¿ajépa?... Térã, ¿ojapópa mbaʼe vai ha upéi heʼi ivaleha avave ndopilláigui chupe? Ndojepilláiramo jepe, Ñandejára ohechapaite hína la ojapóva, ¿ajépa?... ¿Ndépa ere iporãtaha jaiporavo koʼãichaguápe ñane amigorã?...

Jaleemína la Bíbliape peteĩ téxto ohechaukáva mbaʼérepa iñimportánte jaiporavo porã ñane amigorã. Ehekami 1 Corintios, kapítulo 15, versíkulo 33. ¿Retopámapa?... Heʼi péicha: “Aníke peheja ótro penembotavy. Umi júnta vai ohundi umi mbaʼe porã pejepokuaáva pejapo”. Ko téxto ohechauka ñandéve ñanejúnta vaíramo, upéi ñande avei jajapótama haʼekuéra ojapóva. Péro jaiporavo porãramo ñane amigorã ñanepytyvõta jajapo hag̃ua iporãva.

Jehová hína pe amígo iñimportantevéva ñandéve g̃uarã. Ñande ningo jahayhu chupe ha akóinte jaikose iñamígoramo, ¿ajépa?... Upévare ñañehaʼãmbaite vaʼerã jaiporavo ñane amigorã umi iñeʼẽrendúva Ñandejárape.