‘Ani hag̃ua peʼa tentasiónpe’

‘Peñatende porãke peikóvo ha peñemboʼemantéke, ani hag̃ua peʼa tentasiónpe.’ (MATEO 26:41.)

JESUCRISTO, Ñandejára Raʼy, oĩmavaʼekue omano hag̃uáicha. Ha neʼĩrava gueteri oñepresiona upeichaite peve. Haʼe oikuaa ojeguerahapotaitemaha ha oñekondenataha omano hag̃ua peteĩ madéro de torméntore. Oikuaa avei umi mbaʼe ojapóva ha odesidíva guive omopotĩ térã omongyʼataha Itúva réra. Jesús oikuaa avei yvyporakuéra rekove odependeha hese. Mbaʼéichapa ombohovairakaʼe upe presión tuichaitéva?

² Jesús ogueraha idisipulokuérape hardín de Getsemanípe, peteĩ lugár ohoha jepi hikuái. Oĩ rire upépema oho mombyrymi idisipulokuéra oĩhágui, ha haʼeñohápe, oavri ikorasõ Itúva yvagapeguápe ha ojerure omombarete hag̃ua chupe. Ha ndahaʼéi una vés añónte ojerure asýva chupe, síno tres vése. Iperféktoramo jepe, Jesús noimoʼãivaʼekue ikatuha haʼeñónte ombohovái pe jejopy vai (Mateo 26:​36-​44).

³ Koʼág̃a rupi ñande avei jaiko jejopýpe. Ko follétope jahechámakuri mbaʼérepa jaʼe jaikomaha ko sistéma aña ára pahápe. Umi presión ha tentasión omoĩva Satanás múndo imbareteve ohóvo. Ñande jaservíva Ñandejára añeteguápe, jajapóva ha jadesidíva oafekta Héra ha avei ñane esperánsa jaiko hag̃ua Imúndo pyahúpe. Ñande jahayhu Jehovápe ha ñaaguantase ‘og̃uahẽ meve pe fín’, upéva heʼise opa peve ñande rekove térã ko sistéma, tahaʼe haʼéva pe og̃uahẽ raẽvéva (Mateo 24:13). Upéicharõ, mbaʼéichapa ikatu ñamantene pe urhénsia jaguerekóva ha ñañatende porã jaikóvo?

⁴ Jesús oikuaavaʼekue idisipulokuéra ymaguare ha koʼag̃agua avei ohasataha jejopy vaíre. Upévare heʼi: ‘Peñatende porãke peikóvo ha peñemboʼemantéke, ani hag̃ua peʼa tentasiónpe’ (Mateo 26:41). Mbaʼépa heʼise ñandéve koʼã mbaʼe? Mbaʼeichagua tentasiónpa ñambohovái koʼág̃a rupi? Ha mbaʼéichapa ‘ñañatende porãta’ jaikóvo?

Mbaʼeichagua tentasiónpa jahasa koʼág̃a rupi?

⁵ Enterove jahasa káda día pe tentasión ikatúva ñandereity ‘pe Diablo ñuhãme’ (2 Timoteo 2:​26). La Biblia heʼi ñandéve Satanás omaʼẽha prinsipálmente Jehová siervokuérare (1 Pedro 5:8; Revelación 12:12, 17). Mbaʼépa ojapose upéicharõ? Ndahaʼéi ñandejukaséva katuete. Pórke Satanás noganamoʼãi ñamanóramo fiél Ñandejárape. Satanás oikuaa pe ñemoingove jey rupi Jehová oipeʼataha pe ñemano og̃uahẽ vove itiémpo (Lucas 20:​37, 38).

⁶ Satanás oipeʼase ñandehegui peteĩ mbaʼe tuichavéva ñande rekovégui: pe integrida jahechaukáva Ñandejárape. Satanás ipyʼaropu hag̃uáicha ohechaukase ikatuha ñandepeʼa Jehovágui. Upévare, haʼe oganáta ikatúramo ohejauka ñandéve ñande fidelida. Upéva oikóta ndajahavéiramo japredika umi notísia porã térã ñamboykéramo umi nórma kristiána (Efesios 6:​11-13). Upévare ‘pe Tentadór’ omoĩ ñandéve heta tentasión (Mateo 4:3).

⁷ Satanás oiporu opaichagua ‘ñuhã’ (Efesios 6:​11). Haʼe oiporu jepi pe materialísmo, pe kyhyje, pyʼamokõi térã umi vyʼa rapykuéri jeiko. Péro umi mbaʼe oiporukuaavéva apytépe oĩ pe desánimo. Haʼe oaprovecha jepi upéva pórke oikuaa ñanekangýramo ikatuha jaʼa pyaʼeve (Proverbios 24:10). Upévare, oñehaʼã ñanetenta ‘jajejopy vaive jave’ ikatu hag̃uáicha ñañentrega (Salmo 38:8).

⁸ Jaikevévo jahávo ko ára pahápe, haʼete hetavéva umi mbaʼe oporomokangýva, ha ñandéve avei ikatu ñanderupyty upéva (ehechami pe rrekuádro ‘Umi mbaʼe ñanemokangýva’). Tou ouhágui, umi mbaʼe ñanemokangýva ojapo vai ñanderehe mbeguekatúpe. Oĩramo peteĩ ikangýva físika, mentál ha emosionálmente, ikatu hasyeterei chupe ‘ojogua hag̃ua pe tiémpo ikatúva guive’ okumpli hagua umi ovligasión espirituál, umíva apytépe ostudía hag̃ua la Biblia, oho umi rreunión kristiánape ha osẽ opredika (Efesios 5:​15, 16). Ñanemanduʼavaʼerã pe Tentadór oipotaha ñañentrega. Péro koʼág̃a ndahaʼéi tiémpo jaguata mbegueve hag̃ua térã ñamboyke hag̃ua pe urhénsia oĩva jaikuaágui mbaʼe tiémpopepa jaiko (Lucas 21:​34-​36). Upéicharõ, mbaʼéichapa ikatu ñambohovái umi tentasión ha ñañatende porã jaikóvo? Jahechami cuatro konsého ñanepytyvõtava.

‘Ñañemboʼemantéke’

⁹ Ñañemoĩ Jehová pópe ñañemboʼe rupi chupe. Mbaʼépa ojapovaʼekue Jesús ojejopy vaietérõ guare pe hardín hérava Getsemanípe? Oñemboʼe Jehovápe oipytyvõ hag̃ua chupe. Ojerure asyetereígui, pe ‘hyʼái haʼete tuguy otykýva pe yvýpe’ (Lucas 22:44). Ñapensamína ko mbaʼére: Jesús oikuaa porã vaʼekue Satanáspe, pórke yvága guive haʼe ohechapavaʼekue mbaʼeichagua tentasiónpa oiporu oity hag̃ua Ñandejára siervokuérape. Péro Jesús noimoʼãivaʼekue ikatutaha péichante ombohovái umi tentasión. Pe Ñandejára Raʼy perfékto ohechavaʼekue tekotevẽha ojerure Ñandejárape oipytyvõ ha omombarete hag̃ua chupe, upéicharõ ñande tekotevẽtereive jajapo upéva! (1 Pedro 2:​21.)

¹⁰ Avei, iporã ñanemanduʼa Jesús heʼi rire idisipulokuérape ‘peñemboʼemantéke’, heʼihague: ‘Pórke pe espíritu ikyreʼỹ, péro ñande rete ikangy’ (Mateo 26:41). Máva rete rehépa oñeʼẽ koʼápe? Noñeʼẽi hetére, pórke hete perfektovaʼekue ha naikangýi ni michĩmi (1 Pedro 2:​22). Péro umi idisipulokuéra ndahaʼeivaʼekue upéicha. Haʼekuéra ogueronaséma pe imperfeksión ha pe mbaʼe vai apose. Upévare oikotevẽ oñepytyvõ heta chupekuéra ombohovái hag̃ua umi tentasión (Romanos 7:​21-​24). Upévare, Jesús heʼivaʼekue idisipulokuérape –ha entéro umi haʼétavape upe rire kristiáno añetegua- oñemboʼe hag̃ua ombohovái jave umi tentasión (Mateo 6:​13). Mbaʼéichapa Jehová okontesta umi ñemboʼe? (Salmo 65:2.) Okontesta jepi ñandéve mokõi fórmape.

¹¹ Primero, Ñandejára ñanepytyvõ jahechakuaa hag̃ua umi tentasión Satanás omoĩva, ojoguáva umi ñuhã okañývape umi tape iñypytũhárupi. Umívape ikatu jaʼa ndajahecháiramo. Ha ani hag̃ua jaʼa umi tentasiónpe Jehová oikuaauka ñandéve, la Biblia ha umi puvlikasión rupive, mbaʼeichaguápa umi ñuhã. Heta áñorema, umi puvlikasión ha asambléape ojeʼe ñandéve ipeligrosoha pe jakyhyje ñande rapicha yvypóragui, pe inmoralida seysuál, pe materialísmo, ha avei umi ambue tentasión oiporúva Satanás (Proverbios 29:25; 1 Corintios 10:​8-​11; 1 Timoteo 6:​9, 10). Katuete ñande jaagradese Jehovápe oikuaaukahaguére ñandéve mbaʼeichagua ñuhãpa oiporu Satanás (2 Corintios 2:​11). Upéicha Ñandejára okontesta ñandéve ñane ñemboʼe, umívape jajerure chupe ñanepytyvõ hag̃ua ñambohovái jave umi tentasión.

¹² Segundo, Jehová okontesta ñane ñemboʼe ñanemombaretévo ñaaguanta hag̃ua. Iñeʼẽme heʼi: ‘Ñandejára [...] ndohejamoʼãi peñetenta ndaikatuveiha peve peaguanta, síno pe tentasión ndive avei omoĩta pe salída ikatu hag̃ua peaguanta’ (1 Corintios 10:13). Ñande ñañemoĩramo Ñandejára poguýpe, haʼe núnka ndohejamoʼãi peteĩ tentasión imbareteterei ikatuʼỹ hag̃uáicha ñandepuʼaka hese espirituálmente. Mbaʼéichapa ohechauka ñandéve ‘pe salída’? Omeʼẽ rupi ‘espíritu sánto umi ojerurévape chupe’ (Lucas 11:​13). Upe espíritu rupive ikatúta ñanemanduʼa umi prinsípio la Bíbliape oĩvare ñanemombaretéva jajapo hag̃ua pe iporãva ha ñanepytyvõtava jadesidi porã hag̃ua (Juan 14:26; Santiago 1:​5, 6). Avei ñanepytyvõ jaguereko hag̃ua umi kualida ñaikotevẽva ñandepuʼaka hag̃ua umi mbaʼe vai jajaposévare (Gálatas 5:​22, 23). Ñandejára espíritu ikatu ojapo ñane ermanokuéragui ‘peteĩ ñepytyvõ imbaretéva’ ñandéve g̃uarã (Colosenses 4:​11). Jaagradesépa Jehovápe okontesta porãiterei haguére ñandéve ñane ñemboʼe?

Ñahaʼarõvaʼerã umi mbaʼe ikatúva jahupytýnte

¹³ Ikatu hag̃ua ñañatende porã jaikóvo, tekotevẽ ñahaʼarõ umi mbaʼe ikatúva jahupytýnte. Enterovépe sapyʼánte ñanemokaneʼõ umi presión jahasáva ñande rekovépe, péro ñanemanduʼavaʼerã Ñandejára noprometeihague ñandéve jaikotaha provlemaʼỹre ko sistéma tujápe. Ñandejára siervokuéra oikovaʼekue umi tiémpo vívlikope jepe ombohovaivaʼekue heta provléma, umíva apytépe persekusión, mboriahu, vyʼaʼỹ ha opaichagua mbaʼasy (Hechos 8:1; 2 Corintios 8:​1, 2; 1 Tesalonicenses 5:​14; 1 Timoteo 5:​23).

¹⁴ Koʼág̃a rupi ñande avei ndaikatúi jajei umi provlémagui: jajepersegi, ñandesogue, jahasa vyʼaʼỹ, ñanderasy katu, ha oĩ hetave mbaʼe ñanembohasa asýva. Ñandeprotehéramo Jehová milagrósamente umi mbaʼégui, Satanás oguerekóta mbaʼérepa oñembohory vai hese (Proverbios 27:11). Péro Jehová oheja isiervokuérape ombohovái umi tentasión ha pruéva, ha sapyʼánte oheja omano voive umi opositorkuéra pópe (Juan 16:2).

¹⁵ Upéicharamo, mbaʼépa oprometerakaʼe Ñandejára? Jahechamahaguéicha, jajeroviáramo hese ñande pyʼaite guive, Haʼe ñanemombaretéta ñandepuʼaka hag̃ua oimehaichagua tentasiónre  (Proverbios 3:​5, 6). Iñeʼẽ, ijespíritu ha iñorganisasión rupive oñangareko ñanderehe espirituálmente ha ñanepytyvõ ñanerakateʼỹ hag̃ua pe rrelasión jaguerekóvare hendive. Jajapóramo upéicha, ñaganáta ñamanóramo jepe. Ndaipóri mbaʼeve, ni ñemano, ikatúva ojoko Ñandejárape omeʼẽ hag̃ua mbaʼe porã isiervokuéra ifiélvape (Hebreos 11:6). Ha pe múndo pyahu hiʼag̃uímavape Jehová katuete okumplipáta ipromésa porãite ha ovendesíta umi chupe ohayhúvape (Salmo 145:16).

Ñanemanduʼavaʼerã umi kuestión oĩvare

¹⁶ Ñaaguantaséramo pe fín peve, ñanemanduʼavaʼerã umi kuestión guasu oĩvare Ñandejára ohejárõ guare oiko pe ivaíva. Haʼetéramo ñandéve ijetuʼuetereíva umi provléma jahasáva ha ñañandu nañameʼẽveimaha, ñanemanduʼavaʼerã Satanás omoĩhague én dúda pe derécho oguerekóva Jehová ñanesãmbyhy hag̃ua, ha avei Ñandejára siervokuéra mborayhu ha integrida (Job 1:​8-​11; 2:​3, 4). Umi kuestión ha mbaʼéichapa Jehová odesidi osolusiona umi mbaʼe, iñimportanteve jey ñande rekovégui. Mbaʼérepa?

¹⁷ Ohejágui Ñandejára oĩ gueteri umi provléma, hetave ñande rapicha koʼág̃a oikuaa pe añetegua. Jajepyʼamongetami ko mbaʼére: Jesús hetaiterei ohasa asy vaʼekue ñandesalva hag̃ua (Juan 3:​16). Ajépa ñande jaagradese ojapohaguére upéva? Ñañeporandumi upéicharõ: “Ñaimépa dispuésto jahasa asyvévo michĩmínte jepe ikatu hag̃ua hetave ñande rapichakuéra ojesalva?”. Ñaaguanta hag̃ua pe fín peve, jahechakuaavaʼerã Jehová tuichaiterei iñaranduveha ñandehegui (Isaías 55:9). Ñandejára ohundíta pe ivaíva, upéva ojapóta oĩ porãve jave oñesolusiona hag̃ua umi kuestión oĩva, ha omeʼẽ hag̃ua ñandéve umi mbaʼe porã opa ára g̃uarã. Ndaikatúi ñahaʼarõ Ñandejáragui ótra kósa, pórke hendive ndaipóri inhustísia! (Romanos 9:​14-​24.)

‘Ñañemoʼag̃ui Ñandejárare’

¹⁸ Ñamantene hag̃ua pe urhénsia jaguerekóva, jasegivaʼerã Jehová ykére. Aníke ñanderesarái Satanás opáicha rei oñehaʼãha ohundi ñandehegui pe rrelasión porãite jaguerekóva Jehová ndive. Oipota jaguerovia pe fín nog̃uahẽmoʼãiha ha natekotevẽiha japredika umi notísia porã térã jaiko la Biblia heʼiháicha. Péro Satanás ‘ijapu ha haʼe pe japu túva voi’ (Juan 8:​44). Jajerresolvevaʼerã ‘ñañemoĩvo Satanás rehe’ ha ñañangareko pe rrelasión jaguerekóvare Jehová ndive. La Biblia heʼi ñandéve mborayhúpe: ‘Peñemoʼag̃ui Ñandejárare, ha haʼe oñemoʼag̃uíta penderehe’ (Santiago 4:​7, 8). Ha mbaʼéichapa ñande ñañemoʼag̃ui Jehováre?

¹⁹ Tuichaiterei mbaʼe pe ñañemboʼe ha jajepyʼamongeta. Upévare nañaaguantavéi vove umi mbaʼe ñandejopýva ñande rekovépe, jaavri ñane korasõ Jehovápe. Ñamombeʼu porãramo chupe, ikatúta jahecha porãve pe rrespuésta omeʼẽva ñane ñemboʼépe. Ikatu nameméi omeʼẽ ñandéve pe rrespuésta ñahaʼarõva, péro ñamombaʼeguasuséramo Ñandejárape ha jahechaukaséramo chupe fidelida, haʼe ñanepytyvõta ñaikotevẽhápe ñaaguanta hag̃ua (1 Juan 5:​14). Ha jahechakuaávo jahávo mbaʼéichapa ñanepytyvõ ñande rekovépe, ñañandúta ñañemoʼag̃uiveha hese. Avei iñimportanterei jalee ha jajepyʼamongeta umi Jehová kualidáre ha avei hapére, jatopaháicha la Bíbliape. Jajepyʼamongetárõ upéicha ikatu jaikuaa porãve Jehovápe, pórke upéva opoko ñane korasõre ha jahayhuetereive chupe (Salmo 19:14). Ha ndaipóri pe mborayhúicha ñanepytyvõtava ñandepuʼaka hag̃ua umi tentasiónre ha ñañatende porã hag̃ua jaikóvo (1 Juan 5:3).

²⁰ Ñañemantene hag̃ua Jehová ypýpe iñimportánte avei ñañemantene ñane ermanokuéra kristiáno apytépe. Pe última seksión oguerekóva ko folléto oanalisáta upéva.

PORANDUKUÉRA JASTUDIA HAG̃UA

• Mbaʼépa ojapovaʼekue Jesús ojejopy vaietérõ guare omano mboyvemi, ha mbaʼépa heʼi idisipulokuérape ojapo hag̃ua? (Párr. 1- 4)

• Mbaʼérepa Satanás oataka Jehová siervokuérape, ha mbaʼéichapa ñanetenta? (Párr. 5 - 8)

• Ñambohovái hag̃ua umi tentasión, mbaʼérepa tekotevẽ ñañemboʼemante (párr. 9 - 12), ñahaʼarõ umi mbaʼe ikatúva jahupytýnte (párr. 13 - 15), ñanemanduʼa umi kuestión oĩvare (párr. 16, 17) ha ‘ñañemoʼag̃ui Ñandejárare’ (párr. 18 - 20)?

[Rrekuádro oĩva páhina 25-pe]

Umi mbaʼe ñanemokangýva

Ñanderasy térã ñandetujáma. Ikatu ndajavyʼavéi jahechávo ndaikatuiha jajapove Ñandejára servísiope, pórke ndaikatúi jakuera peteĩ mbaʼasýgui térã ñandetujáma (Hebreos 6:​10).

Ndoikói umi mbaʼe ñahaʼarõva. Ikatu ñanemokangy ndajahecháiramo rresultádo umi esfuérso jajapóvape japredikávo Ñandejára Ñeʼẽ (Proverbios 13:12).

Ñaimoʼã ndajavaleiha. Ikatu peteĩ tapicha heta áñoma oñemaltratáva oimoʼã avave ndohayhuiha chupe, ni Jehová jepe (1 Juan 3:​19, 20).

Ñañeofende. Ikatu peteĩ ermáno ñaneofende tuichaiterei, ha ñañeñandu vaietereígui ndajahasevéi umi rreunión kristiánape térã predikasiónpe (Lucas 17:1).

Jajepersegi. Ikatu umi ndogueroviáiva pe ñande jagueroviáva oñembohory ñanderehe, oñemoĩ ñane kóntrape ha ñandepersegi (2 Timoteo 3:​12; 2 Pedro 3:​3, 4).

[Nóta oĩva taʼanga ndive páhina 26]

Jesús heʼivaʼekue ñandéve tekotevẽha ‘ñañemboʼemante’ ha jajerure Ñandejárape ñanepytyvõ hag̃ua ñambohovái jave umi tentasión