Mbaʼéichapa umi ojejavykýva ohejakuaa upéva

Umi ojejavykýva tahaʼe kuña térã kuimbaʼe ojapo peteĩ mbaʼe ndogustáiva Ñandejárape. Haʼekuéra opensa ijehénte ha itieʼỹvante oĩ iñakãme.a Upévare ikatu avei nomombaʼevéi hapichakuérape, ha opensa natekotevẽiha peteĩ kuña ha kuimbaʼe ojoayhu oĩ hag̃ua oñondive, síno ovyʼa hag̃uánte sapyʼaite ha péicha oñembopiroʼy. Péro upéva ningo sapyʼaiténte ombovyʼa chupekuéra. Umi ojejavykýva oñemoakãrakuve rei hekovai hag̃ua ha hasyve chupekuéra ojejokokuaa hag̃ua (Colosenses 3:5).

Apóstol Pablo heʼi: ‘Che rayhupára, ñañemopotĩ opaichagua mbaʼe vaígui omongyʼáva ñande rete ha ñande espíritu, ñañembohekopotĩve jahávo Ñandejára kyhyjepópe’ (2 Corintios 7:1, ÑÑB). Oiméramo reñehaʼãreína rejapo koʼápe heʼíva aníke nekaneʼõ. Nemanduʼáke Jehová ñaneperdonase ha ñanepytyvõtaha (Salmo 86:5; Lucas 11:9-13). Ikatu sapyʼánte jaʼa jey ivaívape, upéicharamo jepe iporã ñañehaʼã meme ñakambia ha ñambyasy pe mbaʼe vai jajapóva. Aníke ñanderesarái ‘Ñandejára tuichaveha ñande pyʼapýgui, ha oikuaaha opa mbaʼe’ (1 Juan 3:20). Haʼe ningo nomañái umi mbaʼe vai jajapóvare, ohecha guei oĩva ñande pyʼapýpe. Ñandekuaa porãite rupi ñandeporiahuvereko ha ñanerendu jajerure jave chupe ñaneperdona hag̃ua. Upévare ñañemboʼe meméke chupe ñande pyʼaite guive, peteĩ mitã ojerureháicha itúvape oipytyvõ hag̃ua chupe. Jehová ñanepytyvõta ñandepyʼaguapy hag̃ua (Salmo 51:1-12, 17; Isaías 1:18). Péro ndahaʼéi ñañemboʼentevaʼerã, tekotevẽ avei ñañehaʼã jahupyty umi mbaʼe jajeruréva. Pór ehémplo ndajahechaivaʼerã mbaʼeveichagua taʼanga tieʼỹ ha jahejavaʼerã umi júnta vai.b

Ijetuʼúramo ndéve reheja ko mbaʼe vai, reñeʼẽvaʼerã nde sy térã nde túvandi, ỹrõ peteĩ ermáno térã ermánandi ikatúva nepytyvõ (Proverbios 1:8, 9; 1 Tesalonicenses 5:14; Tito 2:3-5).c