KAPÍTULO 38

¿Mbaʼépa ahupytyse che rekovépe?

“Che ndajepyʼapýi kuri che renonderãre. Péro atermina potaitérõ guare che koléhio, ahechakuaa oĩha heta mbaʼe okambiátava, pórke tekotevẽtama ambaʼapo, ha arekótama avei heta gásto” (Álex).

EÑEIMAHINAMI rejaposeha peteĩ viáhe mombyryeterei. ¿Mbaʼépa rejapóta primeroite? Katuete remañáta peteĩ mápare, ha upéi replanea pe viáhe. Upéicha avei oiko replaneáta jave mbaʼépa rehupytyse nde rekovépe. Por ehémplo, Michael oservi peteĩ sukursál orekóvape umi testígo de Jehová, ha heʼi: “Oĩ hetaiterei mbaʼe ikatúva redesidi rejapo nde rekovépe. Upévare, redesidi porã hag̃ua iñimportanteterei remoĩ umi méta he reñehaʼã hese”.

Replaneárõ peteĩ viáhe katuete reguereko peteĩ lugár reg̃uahẽseha, ha umi méta ikatu ñambojoja upe lugár rehe. Añetehápe, ndaikatumoʼãi reg̃uahẽ ndereikuaáirõ moõpa rehose. Upévare iporãvéta reguerekórõ peteĩ mápa rehecha hag̃ua mbaʼe tapérupipa reho vaʼerã. Upéicha resegíta hína pe konsého jatopáva Proverbios 4:26-pe: “Eipeʼa nde raperãgui umi mbaʼe ikatúva ndereity”.

Ohasávo pe tiémpo, redesidi vaʼerã heta mbaʼe iñimportánteva, por ehémplo mbaʼéichapa reservíta Ñandejárape, mbaʼépepa rembaʼapóta, remendátapa térã nefamíliatapa. Ifasilve hag̃ua redesidíta vove koʼã mbaʼe, tekotevẽ reikuaa porã mbaʼépa rehupytyse nde rekovépe. Péro replaneávo umi mbaʼe rejapótava, oĩ peteĩ mbaʼe katuete reguereko vaʼerã enkuénta.

‘Nemanduʼa vaʼerã nde Apoharére’

Añetehápe revyʼasérõ, tekotevẽterei resegi ko konsého: “Nemitã aja nemanduʼa vaʼerã nde Apohare Ijojahaʼỹvare” (Eclesiastés 12:1). ¿Mbaʼéichapa rejapokuaa upéva? Redesidíta jave oimeraẽ mbaʼe, siémpre ereko vaʼerã enkuénta umi mbaʼe Ñandejára oipotáva.

¿Mbaʼérepa iñimportánte upéva? La Biblia heʼi: “Ñandejára Jehová, nde rejapo entéro mbaʼe, ha nde reipotágui oexisti ha ojejapo vaʼekue opaite mbaʼe. Upévare nde remerese enterove nemombaʼe ha nembotuicha, remerese avei rerresivi pe podér” (Apocalipsis 4:11). Ñandejára ojapo vaʼekue opa mbaʼe oĩva yvágape ha ko yvy ape ári, upévare enterovéva jaguereko peteĩ déuda hendive. ¿Ndépa reagradese chupe omeʼẽ haguére ndéve ‘pe áire rerrespira hag̃ua ha entéro mbaʼe’ reguerekóva? (Hechos 17:25). Oimérõ upéicha, katuete rejaposéta oimeraẽ mbaʼe rehechauka hag̃ua reagradeseha chupe.

Heta mitãrusu ha mitãkuña haʼéva Testígo ojapo upéva. Ohechauka hag̃ua oagradeseha ñande Apoharépe, odesidi oservitaha chupe de tiémpo kompléto. Emañamína mbaʼe mbaʼépa ikatu hína nde avei rejapo.

Prekursorádo rregulár. Umi prekursór oipuru hetave tiémpo predikasiónpe. Ha oipuru meme rupi la Biblia, oaprende heta mbaʼe ha ikatupyry oporomboʼe hag̃ua.

Reservi oñekotevẽhápe hetave opredikáva. Oĩ odesidíva ova oñekotevẽhápe hetave puvlikadór. Avei oaprendéva ótro idióma ha oservi peteĩ kongregasión oĩva upe idiómape, térã ova ótro paíspe upearã.a

Servísio de misionéro. Heta prekursór hesãiva ha okumplívape umi rrekisíto, oñembokatupyry oho hag̃ua oservi ótro paíspe. Umi oservíva de misionéro ohasa hetaiterei mbaʼe iporãitereíva, ha heta ovyʼa iservísiope.

Betel. Heta sukursál orekóvape umi testígo de Jehová ojeprepara ha oñeimprimi umi puvlikasión bíblica. Ha heta ermáno oĩva pe família Betélpe oñeasigna oservi hag̃ua koʼã sukursálpe.

Siérvo internasionál. Umi siérvo internasionál de konstruksión oviaha heta paísre ikatu hag̃uáicha oipytyvõ oñemopuʼã hag̃ua Salón del Reino, Salón de Asambléa, ha sukursál.

Eskuéla de Evanhelisadór. Oñeinvita umi prekursór okumplívape umi rrekisíto ha oñembokatupyry chupekuéra omboʼe hag̃ua la Biblia. Oĩ avei umi ohóva oservi ótro paíspe ojegradua rire.

Eplanea porã umi mbaʼe rejapótava

Umi oservíva de tiémpo kompléto ningo ojapo ipyʼaite guive peteĩ traváho iporãitereíva, ha upévare Jehová hetaiterei ovendesi chupekuéra. Upéicharõ jepe, tekotevẽ avei repensa porã rejapo mboyve upéva. Por ehémplo, eñeporandumína: “¿Mbaʼe mbaʼépa tekotevẽ aaprende ajapokuaa ikatu hag̃uáicha añemantene?”.

Peteĩ mitãkuña hérava Kelly oipota vaʼekue oiko chugui prekursóra. Upévare oplanea porã mbaʼeichagua traváhopa oiporavóta. Haʼe heʼi: “Aheka che travahorã peteĩ chepytyvõtava añemantene hag̃ua, péro ohejátava chéve tiémpo ajapo hag̃ua che prekursorádo”.

Upéicha rupi, oĩrõ guare koléhiope Kelly ostudia vaʼekue peteĩ profesión ikatu hag̃uáicha ombaʼapo upévape. Ha upéva oipytyvõ chupe ikatu hag̃ua ohupyty iméta. Haʼe omombeʼu: “Che ningo ajaposeterei kuri che prekursorádo, ha adesidi ambotapykue tekotevẽva guive ahupyty hag̃ua upéva. Ha añetehápe aime segúra adesidi porã hague”.

Ejerure konsého

Epensami rehoha de viáhe peteĩ lugár ndereikuaáivape. Katuete tekotevẽta rejerure álgienpe ndegia hag̃ua. Ha upéva ikatúnte avei rejapo replanea jave mbaʼépa rehupytyse nde rekovépe. Ejerure vaʼerã ótrope tanepytyvõ ha tomeʼẽ ndéve konsého. La Biblia heʼi voi Proverbios 20:18-pe: “Entéro mbaʼe osẽ porãve oĩháme heta persóna omeʼẽva konsého”.

Nde tuakuéra ikatu tuichaiterei nepytyvõ upévape. Avei, ikatu rejerure nepytyvõ hag̃ua umi ermáno iñakãguapýva ha ohechaukávape iñaranduha osegi rupi umi konsého oúva Ñandejáragui. Peteĩ mitãrusu hérava Roberto oservíva Betélpe heʼi: “Esegi pe ehémplo omeʼẽva ndéve umi ermáno iguápova oĩva ne kongregasiónpe ha avei umi ótro kongregasiónpe”.

Oĩ ningo heta nderayhúva ha oipotáva resẽ porã, péro pe nderayhuvéva ha oipotavéva revyʼa haʼe hína Jehová. Ejerurékena chupe tanepytyvõ ikatu hag̃uáicha ‘resegi rehecha mbaʼépa hína la haʼe oipotáva rejapo’ (Efesios 5:17). Opa mbaʼe redesidítavape, esegíkena ko konsého oĩva Proverbios 3:5, 6-pe: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare. Ereko vaʼerã enkuénta Ñandejárape opa mbaʼe rejapóvape, ha haʼe ndegiáta reho hag̃ua tape porãre”.

Retopavéta informasión oñeʼẽva ko témare pe pelíkula héravape Los jóvenes preguntan... ¿Qué haré con mi vida?, oĩva mas de 30 idiómape

[Nóta]

TÉXTO OĨVA LA BÍBLIAPE

“‘Pechetanteána ko mbaʼépe’, heʼi Jehová, umi ehérsito yvagapegua ruvicha, ‘jahecha ndaavríripa peẽme pe yvága rokẽ ha ahykuavo pende ári peteĩ vendisión, ndofaltavéi peve peẽme mbaʼeve’” (Malaquías 3:10).

PETEĨ KONSÉHO

Eñemongeta peteĩ ermáno térã ermána oservímavandi heta áñore de tiémpo kompléto. Eporandu chupe mbaʼérepa odesidi vaʼekue ojapo upéva, ha mbaʼe vendisiónpa ohupyty upéva rupive.

¿REIKUAÁPA RAʼE?

Umi aparáto eléktriko ningo oikotevẽ pe elektrisida ombaʼapo hag̃ua. Upéicha avei, ñande ñaikotevẽ pe espíritu sánto jaservi porã hag̃ua Ñandejárape (Hechos 1:8).

UMI MBAʼE AJAPÓTAVA

¿Mávapepa ikatu ajerure tachepytyvõ avyʼave hag̃ua che servísiope? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼe mbaʼépepa ndekatupyry?

● ¿Mbaʼéichapa ikatu reipuru umi mbaʼe rejapokuaáva rembotuicha hag̃ua Jehovápe?

● Ko kapítulope oñeñeʼẽ kuri heta mbaʼe ojapóvare umi oservíva de tiémpo kompléto, ¿mávapa ndéve ndegustave?

[Komentário oĩva páhina 313-pe]

“Amombaʼeterei ningo che tuakuérape. Haʼekuéra ohasáma heta mbaʼe ijetuʼúva, por ehémplo heta vése isogueterei hikuái. Upéicharõ jepe, haʼekuéra siémpre iguapoiterei predikasiónpe, ha chemokyreʼỹ meme aservi hag̃ua de tiémpo kompléto. Añetehápe tuichaiterei chepytyvõ iñehemplokuéra” (Carlos).

[Rrekuádro oĩva páhina 314-pe]

Rekompleta hag̃ua

Che metakuéra

Emarka mbaʼe métapa rehupytyse. Eipuru umi espásio oĩva ikatu hag̃uáicha reskrivi upépe mbaʼéichapa ikatu readapta koʼã méta ne situasiónre.

Méta predikasiónpe g̃uarã

□ ¿Mboy órapa ikatu ajapove káda mes? ․․․․․

□ ¿Mboy puvlikasiónpa ikatu akoloka káda mes? ․․․․․

□ Aipuru meme la Biblia apredika hag̃ua

□ ¿Mboy rrevisítapa ikatu ajapo káda mes? ․․․․․

□ Amoñepyrũ peteĩ estúdio bíblico

Ótro méta ikatúva remoĩ: ․․․․․

Méta astudia porãve hag̃ua

□ ¿Mboy páhinapa ikatu alee la Biblia káda día? ․․․․․

□ Astudia porã káda rreuniónpe g̃uarã

□ Ahekáta informasión oñeʼẽva koʼã témare: ․․․․․

Méta kongregasiónpe g̃uarã

□ Akomenta una ves jepe káda rreuniónpe

□ Añemongeta peteĩ ermáno térã ermána ijedávandi aikuaa porãve hag̃ua chupe

□ Avisita peteĩ ermáno ijedáva térã hasykatúvape

Ótro méta ikatúva remoĩ: ․․․․․

Arakaʼépa rekompleta ko rrekuádro: ․․․․․

Emaña jey ko rrekuádrore 6 mése haguépe rehecha hag̃ua mbaʼetekópa reho hese. Ehecha avei tekotevẽpa rekambiaʼimi umi méta, térã remoĩ ótro ipyahúva.

[Taʼanga oĩva páhina 312-pe]

Umi méta nepytyvõta ani hag̃ua redesperdisia ne tiémpo ha ne mbaretekue