Rebeca oipota vaʼekue Jehová ovyʼa

Rebeca haʼe vaʼekue peteĩ kuña ohayhúva Jehovápe. Iména héra Isaac ha haʼe ohayhu avei Jehovápe. ¿Mbaʼéichapa ojokuaa rakaʼe Rebeca ha Isaac? ¿Mbaʼéichapa Rebeca ohechauka oipotaha Jehová ovyʼa? Jahechami.

Isaac túva ningo Abrahán ha isy Sara. Haʼekuéra oiko Canaánpe. Umi hénte upepegua ndojapói Jehová oipotáva. Péro Abrahán oipota itaʼýra omenda peteĩ kuña ohayhúvare Jehovápe. Upémarõ omondo Eliezérpe, peteĩ karai ombaʼapóva chupe g̃uarã, oheka hag̃ua Isaácpe hembirekorã. Eliezer oho Haránpe. Upe lugárpe oiko Abrahán hentekuéra.

Eliezer ndive oho ótro kuimbaʼekuéra ombaʼapóva avei Abrahán rógape. Pe viáhe ipuku upévare oho hikuái diez kaméllo reheve, oraháva tembiʼu ha rregalokuéra. ¿Mbaʼéichapa oikuaáta Eliezer mávapepa oiporavóta omenda hag̃ua Isaac rehe? Eliezer ha iñirũnguéra og̃uahẽvo Haránpe, opyta hikuái peteĩ póso ypýpe. Eliezer oikuaa umi hénte oupotaiteha onohẽ y, upévare oñemboʼe Jehovápe kóicha: “Ajeruréta peteĩ kuñataĩme y hayʼu hag̃ua. Haʼe omeʼẽramo chéve y, ha avei omboyʼúramo umi kaméllope, pépe aikuaáta nde reiporavo hague chupe”.

Upévo peteĩ kuñataĩ hérava Rebeca ou onohẽ y. La Biblia heʼi hese iporãiterei hague. Eliezer ojerure chupe ymi, ha haʼe heʼi: “Si karai, anohẽta ndéve y ha amboyʼúta avei ne kamellokuéra”. ¡Epensamíntena! Umi kaméllo ningo hetaiterei hoyʼu ijyuhéi jave. Upévare Rebeca hetaiterei ombaʼapo vaʼerã omboyʼu hag̃ua. ¿Rehechápa pe divúhope mbaʼéichapa heta ombaʼapo?... Eliezer omombaʼeterei ohechávo mbaʼéichapa Jehová ombohovái iñemboʼe.

Upéi Eliezer omeʼẽ Rebécape heta rregálo iporã porãva. Haʼe katu oinvita Eliezer ha iñirũnguérape hógape, oikohápe ihentekuéra ndive. Upépe Eliezer omombeʼu mbaʼérepa Abrahán omondo chupe ha mbaʼéichapa Jehová ombohovái iñemboʼe. Rebeca hentekuéra ovyʼa avei haʼe omendáta haguére Isaac rehe.

Péro, ¿ndépa ere Rebeca omendase hague hese?... Rebeca oikuaa Eliezer otopa hague hese Jehová rupive. Upévare ihentekuéra oporandúvo chupe ohosépa Canaánpe omenda hag̃ua Isaac rehe, haʼe heʼi: “Si, ahase”. Upe riremi ohóma Eliezer ndive. Og̃uahẽvo hikuái Canaánpe, Rebeca ha Isaac omenda.

Rebeca ojapose rupi Jehová oipotáva, haʼe ovendesi chupe. Rebeca upéi imemby ha heta áño upe rire Jesús onase ifamiliarégui. ¿Ndépa rejoguase Rebécape? Upéicharõ rejapo vaʼerã Jehovápe ogustáva, ha haʼe katuete nevendesíta avei.