Umi oskrivíva Jesús istória

¿Rehechápa umi kuimbaʼe ko divúhope?... Koʼãva hína Mateo, Marcos, Lucas, Juan, Pedro, Santiago, Judas ha Pablo. Koʼã kuimbaʼe oiko vaʼekue Jesús tiémpope ha oskrivi Jesús istória. Jahechamína mbaʼépa ñanemboʼe hikuái.

Koʼã kuimbaʼe apytépe, mbohapy haʼe Jesús apóstol, ha opredika vaʼekue hendive. ¿Reikuaápa mávapa raʼe?... Mateo, Juan ha Pedro. Mateo ha Juan oikuaa porã vaʼekue Jesúspe. Upévare káda uno oskrivi peteĩ lívro oñeʼẽva Jesús rehe. Apóstol Juan ohai avei pe lívro hérava Apocalipsis ha mbohapy kárta: Primera, Segunda ha Tercera de Juan. Apóstol Pedro oskrivi avei mokõi kárta: Primera ha Segunda de Pedro. Pe segunda kártape Pedro omombeʼu Jehová oñeʼẽ hague yvága guive ha heʼi Jesús rehe: “Kóva che raʼy. Che ahayhu chupe ha avyʼa heseve”.

Umi ótro kuimbaʼe oĩva pe divúhope oksrivi avei lívro ñanemboʼéva heta mbaʼe Jesúsgui. Peteĩva hína Marcos. Haʼe oĩne raʼe ojejagarrárõ guare préso Jesúspe ha ohechapaite la oikóva. Ótro katu Lucas, haʼe doktór. Jesús omano rire amalisia oiko chugui kristiáno.

Mokõi kuimbaʼe ko divuhopegua haʼe Jesús ermáno imitãvéva. ¿Ndépa reikuaa mbaʼéichapa héra?... Santiago ha Judas. Ñepyrũrã haʼekuéra ndojeroviái Jesús rehe. Heʼi voi hese itavyraiha. Péro upéi ojerovia hese ha oiko chuguikuéra kristiáno.

Ko divúhope oĩ avei peteĩ kuimbaʼe hérava Pablo. Oiko mboyve chugui kristiáno haʼe héra Saulo. Haʼe iñaña vaʼekue ha ndochaʼéi kristianokuérare. ¿Ndépa reikuaa mbaʼéichapa Páblogui oiko kristiáno?... Peteĩ árape Pablo oviaha ohóvo ha peichahágui ohendu oñeʼẽva chupe yvága guive. ¡Jesús la oñeʼẽva! Haʼe oporandu Páblope: “¿Mbaʼére piko nde neñaña che segidorkuérandi?”. Upe rire Pablo okambia ha oiko chugui kristiáno. Pablo ohai catorce lívro oĩva la Bíbliape, Romanos guive Hebreos peve.

Ñande jalee jepi la Biblia káda día, ¿ajépa?... Jaleévo la Biblia ñaaprende hetaiterei mbaʼe Jesúsgui. ¿Ndépa reaprendeseve chugui?...