Jesús omombaʼeterei Itúva róga

Opa rire pe kasamiénto Canápe, Jesús oho Capernáumpe. Upérõ omoirũ chupe isy ha iñermanokuéra hérava Santiago, José, Simón ha Judas.

Péro, ¿mbaʼérepa Jesús oho Capernáumpe? Ko siuda ningo iñimportanteve Nazaret ha Canágui, ha amalisia tuichave voi. Hiʼarive umi disípulo pyahu apytépe oĩ heta oikóva Capernáumpe térã ijerérente. Upéicharõ, Jesús oĩramo upérupinte, ikatúta oaprovecha ombokatupyry hag̃ua chupekuéra tekotevẽʼỹre oho hikuái mombyry hógagui.

Oĩ aja Capernáumpe, Jesús ojapo heta mbaʼe tuicháva. Upéicha rupi, heta hénte upe siudapegua ha avei umi oĩva ijerére, ohendu umi mbaʼe Jesús ojapóva. Péro upe riremínte Jesús ha umi omoirũva chupe oviaha jeýma. Haʼekuéra ningo hudío okumpli porãva pe Léi ha oho hikuái Jerusalénpe pe Paskuarã áño 30-pe.

Oĩ aja hikuái pe témplope Jerusalénpe, umi disípulo ohecha Jesús ojapoha peteĩ mbaʼe haʼekuéra noimoʼãietéva.

Ñandejára Léi heʼi umi isrraelíta osakrifika vaʼerãha animál pe témplope, upévare opáguio ojeju Jerusalénpe. Péro umi oúva mombyrýgui oikotevẽ hoʼu vaʼerã oĩ aja upe siudápe. Upéicha rupi pe Léi opermiti chupekuéra ogueru ipláta ikatu hag̃uáicha ojogua oikotevẽmíva guive oĩ aja hikuái upépe. Ha oikotevẽramo, ikatu avei ojogua ‘vaka, ovecha ha kavara’ pe sakrifisiorã (Deuteronomio 14:24-26, NM). Upémarõ, umi komersiánte Jerusalengua ou ovende animál ha guyra peteĩ korapy guasúpe pe témplope. Ha hiʼarive oĩ jey ijapytepekuéra ojaprovecháva umi héntere ha hepyeterei okovra chupekuéra.

Jesús ipochyeterei ohechávo koʼã mbaʼe, ha omosarambipa umi kambísta monedakuéra, oipetepa yvýre umi mesa ha omosẽ chupekuéra. Ha heʼi: “¡Peipeʼa koʼã mbaʼe koʼágui! ¡Che Ru róga ndahaʼéi merkádo!” (Juan 2:16).

Idisipulokuéra ohechávo upéva, imanduʼa peteĩ profesía oñeʼẽva Ñandejára Raʼýre. Pe profesía heʼi: “Nde róga ahayhuetereígui tatáicha okaru cherehe”. Umi hudío katu heʼi chupe: “¡Ejapóna peteĩ milágro rehechauka hag̃ua Ñandejára omeʼẽha ndéve autorida rejapo hag̃ua koʼã mbaʼe!”. Jesús ombohovái chupekuéra: “Peitýna ko témplo ha che amopuʼã jeýta tres díape” (Juan 2:17-19; Salmo 69:9).

Umi hudío oimoʼã Jesús oñeʼẽha Jerusalén témplore ha upévare heʼi: “Ko témplo ningo oñemopuʼã kuri cuarenta y seis áñope, ¿ha piko nde remopuʼãta tres díapente?” (Juan 2:20). Péro Jesús heʼívo “témplo” oñeʼẽ hína kuri ikuérpore. ¿Mbaʼéichapa jaikuaa upéva? Pórke ohasa rire tres áño, ojejuka Jesúspe, ha tres día haguépe oñemoingove jey chupe. Ha upérõ idisipulokuéra imanduʼa koʼã mbaʼe haʼe heʼi vaʼekuére.