¿Mbaʼépa ikatu ojejapo sabadokue?

Ótro sábado Jesús oho peteĩ sinagógape, posívlemente oĩva mar de Galilea ypýpe. Upépe oĩ peteĩ kuimbaʼe ipo ypíva (Lucas 6:6). Umi mboʼehára leipegua ha fariseokuéra oñatendejoa ohecha hag̃ua mbaʼépa ojapo Jesús. Ohechávo Jesús omongueraha pe kuimbaʼépe, osẽ heʼi hikuái: “¿Iporãpa oñemonguera umi hasývape sabadokue?” (Mateo 12:10). Péicha haʼekuéra ohechauka mbaʼe intensiónpa oreko.

Umi líder rrelihióso hudío heʼi ikatuha oñemonguera sabadokue peteĩ persóna hasývape, péro sólamente omanombotárõ. Por ehémplo, omboʼe hikuái sábado jave ndovaleiha oñepytyvõ peteĩ persónape osẽramo ikangue ilugárgui, ni noñevendái vaʼerãha peteĩ ipyjerévape, pórke koʼã mbaʼe ndojukamoʼãi chupe ha ikatúnte ohaʼarõ. Umi mboʼehára leipegua ha umi fariséope nointeresái kuri pe kuimbaʼe ipo ypíva. Haʼekuéra ombaʼeporandu Jesúspe ikatu hag̃uáicha oreko álgo oakusa hag̃ua chupe.

Jesús oikuaa pe Léi heʼiha ndovaleiha oñembaʼapo sabadokue, péro ohechakuaa avei umi fariséo ohasamaha la rrája. Haʼekuérantema ijehegui rei omoĩ umi rrégla (Éxodo 20:8-10). Péro ndahaʼéi primera ves oñeñeʼẽ vaíva Jesúsre ojapo haguére iporãva. Upévare ojapo peteĩ mbaʼe ikatu hag̃uáicha enterovéva ohechakuaa mbaʼépa la iñimportantevéva. Heʼi pe kuimbaʼe ipo ypívape: “Epuʼã ha eñemoĩ mbytépe” (Marcos 3:3).

Upéi heʼi umi fariséope ha umi mboʼehára leipeguápe: “¿Mbaʼépa pejapóne peguerekóramo peteĩ ovechamínte, ha hoʼa pendehegui yvykuápe peteĩ sábadope? ¿Napenohẽmoʼãipa pyaʼe porã?” (Mateo 12:11). Haʼekuéra ningo oikuaa oheja reírõ pe ovecha pe yvykuápe al ótro día peve, ikatuha omano, ha upéva operhudikáta chupekuéra ekonómikamente. Hiʼarive Ñandejára Ñeʼẽ heʼi: “Hekojojáva oñangareko hymbakuérare” (Proverbios 12:10).

Upéi Jesús heʼi: “¡Peteĩ kuimbaʼe ningo tuichaiteve mbaʼe hína peteĩ ovechágui! Upéicharõ, ikatu jajapo iporãva sabadokue” (Mateo 12:12). Jahechaháicha, Jesús ndoviolái ni peteĩ Léi oĩva Ñandejára Ñeʼẽme. Hiʼarive ohechauka oiporiahuverekoha umi héntepe. Umi líder rrelihióso katu ndoikuaái mbaʼépa heʼíta. Añetehápe, Jesús ojurumbotyete chupekuéra.

Péro Jesús ipochy opensa haguére hikuái péicha. Upémarõ ojere omaña umi héntere ha heʼi pe kuimbaʼépe: “Eipyso nde po” (Mateo 12:13). Pe kuimbaʼe oipysóvo ipo, okueraite. ¡Ovyʼaiterei anga okuera haguére! Péro, ¿ovyʼápa avei umi ndaijaʼéiva Jesúsre?

Umi fariséope ndogustaiete la oikóva, upévare osẽ ohopa hese. Upéi oñemongeta hikuái “Herodes segidorkuérandi, ohecha hag̃ua mbaʼéichapa ojukáta Jesúspe” (Marcos 3:6). Herodes partído polítikope oĩ heta saduséo. Haʼekuéra ha umi fariséo ningo ndojoguerahaporãi ha pyʼỹinte oiko vai. Péro koʼág̃a oñeuni hikuái ndochaʼéi rupi Jesúsre.