Pe organisasión ojapóva Jehová volunta

KO MÚNDO tuichakuére oĩ heta organisasión. Oĩ organisasión rrelihiósa, polítika, komersiál ha sosiál. Koʼã organisasión odesidi mbaʼéichapa ombaʼapóta, mbaʼépa ohupytyse, oreko rreglaménto ha umi idéa omomýiva chupekuéra. Péro oĩ peteĩ organisasión idiferénteva chuguikuéra, pórke ojapo entéro mbaʼe la Biblia heʼiháicha. Koʼãva hína umi testígo de Jehová.

² Rovyʼaiterei ningo nde avei reime haguére Jehová organisasiónpe. Nde reikuaáma mbaʼépa Jehová ohaʼarõ ndehegui ha rejapo upéva (Sal. 143:10; Rom. 12:2). Nde reservi hína Ñandejárape umi ermáno oĩvandi ko múndo tuichakuére (2 Cor. 6:4; 1 Ped. 2:17; 5:9). Upéicha rupi revyʼa ha rehecha mbaʼéicha Jehová nevendesi opromete haguéicha Iñeʼẽme (Prov. 10:22; Mar. 10:30). Rejapo rupi Jehová volunta, rejepreparáma hína reiko hag̃ua pára siémpre pe múndo pyahúpe (1 Tim. 6:18, 19; 1 Juan 2:17).

³ Ñande Apohare oreko peteĩ organisasión mundiál ndaijojaháiva. ¿Mbaʼérepa? Pórke haʼe voi omoakã ha odirihi ko organisasión. Ñande ningo jajerovia hese ñande pyʼaite guive. Jehová hína ñande Hués, ñande Rréi ha pe omeʼẽva ñandéve umi léi (Is. 33:22). Jehová haʼe avei peteĩ Dios iñordenádova, upévare haʼe voi oorganisa porã ipuévlope ombaʼapo hag̃ua hendive ha péicha ojejapo hag̃ua ivolunta (2 Cor. 6:1, 2).

⁴ Ko múndo aña oñehundi potaitéma, upévare tekotevẽterei jajapo Jesús heʼíva ñandéve, Jehová omoĩ chupe ñanegoverna hag̃ua (Is. 55:4; Apoc. 6:2; 11:15). Jesús heʼi vaʼekue idisipulokuéra ojapotaha umi traváho tuichavéva haʼe ojapo vaʼekuégui (Juan 14:12). ¿Mbaʼérepa heʼi upéva? Pórke idisipulokuéra opredikáta kuri hetave tiémpore, hetave lugárpe ha hetave persónape. Omog̃uahẽta hikuái oparupiete pe notísia porã oñeʼẽva Ñandejára Rréinore (Mat. 24:14; 28:19, 20; Hech. 1:8).

⁵ Pe notísia porã oñemombeʼúma hína ko yvy tuichakuére. Péro ko tembiapo ndojejapomoʼãi pára siémpre, Jesús heʼi vaʼekue ojesegitaha ojepredika Jehová heʼi peve ovalemaha. Umi profesía oĩva la Bíbliape ohechauka “Jehová ára tuichaite ha oporomongyhyjéva” og̃uahẽ mbotaitemaha (Joel 2:31; Sof. 1:14-18; 2:2, 3; 1 Ped. 4:7).

⁶ Ñande ningo jaikuaáma mbaʼépa Jehová oipota jajapo koʼã ára pahápe, upévare káda día ñañehaʼãve vaʼerã jajapo ivolunta. Upearã tekotevẽ jaikuaa porã mbaʼéichapa ombaʼapo Jehová organisasión ha jaapoja ñande pyʼaite guive umi mbaʼe ojejapóva. Ko organisasiónpe ningo ojejapo opa mbaʼe la Biblia heʼiháicha, ojesegi umi konsého, léi, mandamiénto ha opaite mbaʼe la Biblia omboʼéva (Sal. 19:7-9).

⁷ Jehová puévlo osegívo umi instruksión omeʼẽva la Biblia, umi ermanokuéra ombaʼapo pyʼaguapýpe ha iñunído (Sal. 133:1; Is. 60:17; Rom. 14:19). ¿Mbaʼépa ñanepytyvõta ñañemoag̃ui hag̃ua ermanokuérare ha ñaneunído hag̃ua? Pe mborayhu. Pe mborayhu ojekuaa vaʼerã opa mbaʼe jaʼe ha jajapóvape (Juan 13:34, 35; Col. 3:14). Jehová ñanepytyvõ rupi ñande jaiko peteĩ ñeʼẽme ha jaha Jehová organisasión ykére, pe párte yvagapegua ndive.

ÑANDEJÁRA ORGANISASIÓN, PE PÁRTE OĨVA YVÁGAPE

⁸ Umi proféta Isaías, Ezequiel ha Daniel ohecha kuri visiónpe Jehová organisasión, pe párte oĩva yvágape (Is., kap. 6; Ezeq., kap. 1; Dan. 7:9, 10). Apóstol Juan ohecha kuri avei upéva ha omombeʼu ñandéve lívro de Apocalípsispe. Umíva ñanepytyvõ ñañeimahina hag̃ua mbaʼéichapa hína upe organisasión. Haʼe ohecha Jehovápe itrónope ha hetaiterei ánhel heʼíva: “Ñandejára Todopoderóso Jehová ipotĩ, ipotĩ, ipotĩ, haʼe oexisti vaʼekue yma, oexisti koʼág̃a ha ou hína” (Apoc. 4:8). Juan ohecha avei “peteĩ Ovecha Raʼýpe” oñemboʼyha pe tróno renondépe, upéva hína Jesucristo, Ñandejára Ovecha Raʼy (Apoc. 5:6, 13, 14; Juan 1:29).

⁹ Ko visiónpe ojehecha kuri Jehovápe oguapyha hína peteĩ trónope, upéva heʼise haʼe omoakãha ko organisasión. La Biblia oñeʼẽvo pe puésto Jehová orekóvare heʼi: “Jehová, nde ningo ndetuicha ha ndepoderóso, opa mbaʼe iporãva nembaʼe hína. Nde ningo remimbipa ha nandejojahái, pórke entéro mbaʼe oĩva yvágape ha ko yvy ape ári nembaʼepaite hína. Nembaʼe hína Jehová pe goviérno, ha nde hína upe Omoakãva opa mbaʼe. Umi rrikésa ha ñemombaʼeguasu ou ndehegui, ha nde regoverna hína entéro mbaʼe, ndepoderosoiterei, nandejojahái ha nde ikatu rembotuicha ha remombarete enterovépe” (1 Crón. 29:11, 12).

¹⁰ Jesús avei oreko peteĩ puésto tuicháva yvágape. Haʼe ombaʼapo Jehovándi, ha Jehová omeʼẽ chupe tuicha autorida. Ñandejára “omoĩ avei Cristo py guýpe entéro mbaʼe, ha omoĩ chupe omoakã hag̃ua entéro mbaʼe kongregasiónpe” (Efes. 1:22). Apóstol Pablo heʼi Jesús rehe: “Ñandejára ombotuicha Jesúspe ha omeʼẽ chupe peteĩ puésto ijyvatevéva, avei pyʼaporãme omeʼẽ chupe pe téra iporãvéva entéro umi ótro téragui. Ha péicha, Jesús rérape oñesũta enterovéva (entéro umi oĩva yvágape, umi oĩva yvy ape ári ha umi oĩva yvyguýpe), ha enterovéva ohechakuaáta Jesucristo haʼeha ñande Ruvicha, ha péicha oñemombaʼeguasúta Ñandejárape, haʼéva hína pe Túa” (Filip. 2:9-11). Ñande ni michĩmi ndajadudái Jesús haʼeha ñande líder.

¹¹ Peteĩ visiónpe proféta Daniel ohecha pe Karai Ijedaitéva ymaite guive oikovéva, oguapyha hína itrónope yvágape. Ohecha avei upépe umi ánhelpe, “un millón oĩ oservíva chupe, ha cien millón oĩ henondépe” (Dan. 7:10). La Biblia oñeʼẽvo umi ehérsito de ánhel rehe heʼi: “Entéro umi ánhel ningo espíritu ha oservi hikuái Ñandejárape, [...] Ñandejára omanda chupekuéra oipytyvõ hag̃ua umi ojesalvátavape” (Heb. 1:14). Entéro koʼã ánhelpe Jehová oorganisa ha omeʼẽ chupekuéra peteĩ puésto ha autorida (Col. 1:16).

¹² Ñañemotiémporamo jajepyʼamongeta hag̃ua Jehová organisasión rehe, pe párte oĩvare yvágape, ñantendéta mbaʼéichapa oñeñandu vaʼekue Isaías. Haʼe ohecha vaʼekue “Jehová oguapyha itrónope oĩva yvatete” ha ‘ijerére oĩha umi serafín’. Upépe Isaías heʼi: “¡Aichejáranga che! Che katuete amanóta, pórke che ningo pekadór ha umi mbaʼe osẽva che jurúgui ikyʼa, ha aiko umi hénte heʼívandi umi mbaʼe ikyʼáva, che ahecha pe Rréipe, Jehová haʼéva umi ehérsito yvagapegua ruvicha”. Ko visión oipytyvõ chupe iñumildeve hag̃ua ha ohechakuaa hag̃ua mbaʼeichaitépa tuicha ha ipoderóso ko organisasión. Upe ohecha vaʼekue opokoiterei Isaías rehe, upéicha rupi Jehová oporandúrõ guare mávapepa ikatu omondo omeʼẽ hag̃ua peteĩ mensáhe de kondéna, haʼe heʼi: “¡Ápe ningo aĩ che! ¡Chemondóna chéve!” (Is. 6:1-5, 8).

¹³ Ñande avei jahechávo mbaʼéichapa ombaʼapo Jehová organisasión, ñarresponde kyreʼỹme Isaías ojapo haguéicha. Upévare ñañehaʼã avei jaha Jehová organisasión ykére ha jahechauka jajeroviaha hese.

JEHOVÁ ORGANISASIÓN SIÉMPRE OKUʼE

¹⁴ Ezequiel kapítulo 1 omombeʼu ojehecha hague peteĩ visiónpe Jehová omanehaha peteĩ kárro tuichaitereíva yvágape. Upe kárro orrepresenta Jehová organisasión, pe párte oĩva yvágape. Jehová mborayhúpe omaneha ko kárro ha oipuru ojapo hag̃ua ivolunta (Sal. 103:20).

¹⁵ Káda rruéda oreko pype ótro rruéda, orekógui la mísma medída oike voi ojokuápe. Upéicha rupi pe kárro ikatu oho “oimeha gotyo umi 4 direksiónpe” (Ezeq. 1:17). Umi rruéda pyaʼeterei ikatu okambia de direksión, péro upéva ndeʼiséi ohoha oimeha gotyo rei ha ndorekoiha avave odirihíva chupe. Jehová odirihi iñorganisasión ha ndohejái oho ijehegui rei moõve. Ezequiel 1:20 heʼi koʼã rruéda ohoha “pe espíritu omomyiha gotyo chupekuéra”. Upéva heʼise Jehová ojevaleha ijespíritu sántore heʼi hag̃ua moõ gotyopa oho vaʼerã iñorganisasión. Upévare iporã ñañeporandu: “¿Ahápa che avei Jehová organisasión ohoha gotyo?”.

¹⁶ Jaha hag̃ua Jehová organisasión ykére, ndahaʼéi japredika ha jahánte vaʼerã rreunionhápe, síno jasegi vaʼerã japrogresa espirituálmente. Upearã ‘jahechakuaa vaʼerã mbaʼépa pe iñimportantevéva’, ha jaaprovechapaite umi aliménto espirituál Jehová omeʼẽva ñandéve (Filip. 1:10; 4:8, 9; Juan 17:3). Peteĩ organisasión oho porã hag̃ua, iñimportánte umi oĩva pype ombaʼapo peteĩ ñeʼẽme ha oñopytyvõ. Upévare jajapo hag̃ua Jehová volunta, jaipuru porã vaʼerã ñane tiémpo, ñane mbaretekue, ñande katupyrykue ha entéro mbaʼe jarekóva. Iñimportánte avei jaapoja ha ñaipytyvõ Jehová organisasiónpe. Añetehápe, jaha hag̃ua Jehová kárro ohoha gotyo jajapo vaʼerã umi mbaʼe japredikáva.

¹⁷ Jehová organisasión ñanepytyvõ rupi ikatu jasegi jajapo ivolunta. Aníkena ñanderesarái Jehová voi omanehaha pe kárro yvagapegua, ha jaháramo upe kárro ykére, jahechaukáta hína jarrespetaha chupe ha ñakonfiaha hese (Sal. 18:31). La Biblia heʼi: “Jehová omombaretéta ipuévlope. Haʼekuéra oikóta pyʼaguapýpe pórke Jehová ovendesíta chupekuéra” (Sal. 29:11). Jehová omeʼẽ iñorganisasiónpe podér ha pyʼaguapy, ha ñande ñaime rupi iñorganisasiónpe jadisfruta umi mbaʼégui. Ñande ndajadudái ni michĩmi, jasegíramo jajapo Jehová volunta haʼe katuete ñanevendesíta.