Mbaʼéichapa oñeorganisa pe kongregasión kristiána

PE PRIMERA kárta oskrivi vaʼekuépe Pablo umi Corintoguápe heʼi peteĩ mbaʼe iñimportánteva ojapóva Ñandejára. Haʼe oskrivi: “Ñandejára ningo peteĩ Dios omoĩva pyʼaguapy ha ndojapóiva mbaʼevete sarambikuépe”. Upéi oñeʼẽvo umi rreuniónre heʼi: “Entéro mbaʼe ojejapo porã vaʼerã ha ani sarambikuépe” (1 Cor. 14:33, 40).

² Oñepyrũre oskrivi upe kárta Pablo omeʼẽ vaʼekue heta konsého pórke oĩ kuri división kongregasión de Coríntope. Upévare omokyreʼỹ chupekuéra oiko hag̃ua “peteĩ ñeʼẽme”, péicha ‘opensáta peteĩchapa ha ndaiporimoʼãi diferénte opinión’ (1 Cor. 1:10, 11). Upéi omeʼẽ chupekuéra konsého osolusiona hag̃ua heta provléma odividíva pe kongregasión. Ha ohechakuaa hag̃ua hikuái iñimportanteha ojeiko peteĩ ñeʼẽme ha oñembaʼapo oñondivepa, okompara pe kongregasión ñande retére. Haʼe heʼi enterovéva, tahaʼe haʼéva la hembiapo kongregasiónpe, ohechauka vaʼerãha ojoayhu ha ojepyʼapyha ojuehe (1 Cor. 12:12-26). Pe kongregasión ombaʼapo hag̃ua peteĩ ñeʼẽme tekotevẽ kuri oñeorganisa porã.

³ Upéicharõ, ¿mbaʼéichapa oñeorganisa vaʼekue yma pe kongregasión kristiána? ¿Mávapa oorganisa vaʼekue? ¿Mbaʼépa ojejapo oñeorganisa porã hag̃ua? ¿Mávapepa oñemoĩ odirihi hag̃ua? Jahejáramo la Biblia ñandegia jatopáta umi rrespuésta (1 Cor. 4:6).

PETEĨ ORGANISASIÓN ÑANDEJÁRA OMOAKÃVA

⁴ Ojapóma 2 mil áñorupi oñepyrũ hague pe kongregasión kristiána, upéva oiko vaʼekue Pentekostés áño 33-pe. ¿Mbaʼépa ikatu ñaaprende pe kongregasión kristiána ypykuégui? Ñandejára voi omoñepyrũ pe kongregasión ha entéro mbaʼe ojejapóva oñeorganisa porã. Pe rreláto jatopáva la Bíbliape omombeʼúva pe oiko vaʼekue Jerusalénpe ojapóma haimete 2 mil áño, ohechauka porã Ñandejára voi omoñepyrũ hague pe kongregasión kristiána unhída (Hech. 2:1-47). La Biblia heʼi haʼekuéra haʼeha Ñandejára família, térã peteĩ óga haʼe omopuʼãva (1 Cor. 3:9; Efes. 2:19). Pe kongregasión kristiána koʼag̃agua oñeorganisa hag̃ua osegi umi kristiáno ypykue ehémplo.

⁵ Pe kongregasión oñepyrũrõ guare oĩ vaʼekue 120 persónarupi. Haʼekuéra orresivi pe espíritu sánto ha péicha oñekumpli pe heʼíva Joel 2:28, 29-pe (Hech. 2:16-18). Upe díape avei 3 mil persónarupi ojevautisa ha oike pe kongregasión kristiánape oĩháme umi unhído. Haʼekuéra ojerovia Crístore ha “osegi oaprende umi apóstol omboʼéva”. Upe rire “Jehová osegi ogueru umi héntepe omoirũ hag̃ua chupekuéra, umíva hína umi ojesalváva” (Hech. 2:41, 42, 47).

⁶ Pe kongregasión tuichaiterei okakuaa, upévare pe súmo saserdóte judío ojekeha ha heʼi umi disípulo omboʼéva ojagarrapaitéma hague pe siuda. Oĩ voi saserdóte oñepyrũ vaʼekue ojerovia ha oike pe kongregasiónpe (Hech. 5:27, 28; 6:7).

⁷ Jesús oho mboyve yvágape heʼi idisipulokuérape: “Oikóta pendehegui che testígo Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8). Ha upeichaite oiko Estébanpe ojejuka rire. Upérõ oñepyrũ ojepersegi vaipaite umi kristiánope Jerusalénpe, upévare umi oikóva upépe ova Judea ha Samaria tuichakuére. Péro oho ohohápe haʼekuéra osegi opredika ha hetaiterei persóna oñepyrũ ojerovia, umíva apytépe unos kuánto samaritano (Hech. 8:1-13). Upe rire ojepredikáma umi ótro tetãyguápe térã umi ndahaʼéivape judío, ha oasepta porã hikuái (Hech. 10:1-48). Peichaite ojepredika rupi, heta héntegui oiko avei kristiáno ha oñemoñepyrũ heta kongregasión ótra siudápe (Hech. 11:19-21; 14:21-23).

⁸ ¿Mbaʼépa Jehová ojapo oĩ hag̃ua organisádo umi kongregasión pyahu ha ojejapo hag̃ua opa mbaʼe haʼe oipotaháicha? Ñandejára espíritu sánto rupive umi kongregasión orresivi peteĩ rregálo, umi kuimbaʼe okuidátava umi ovecháre. Por ehémplo, Pablo ha Bernabé onombra kuri unos kuánto ansiáno pe primer viáhe ojapo vaʼekuépe opredika hag̃ua (Hech. 14:23). Lucas omombeʼu Pablo oñerreuni hague umi ansiáno oĩvandi Éfesope ha heʼi chupekuéra: “Peñatendéke pendejehe ha pe ovecha aty kompletoitére, pe espíritu sánto penenombra rupi ansiáno peñangareko hag̃ua Ñandejára kongregasiónre ojapoháicha peteĩ pastór. Upéva haʼe ojogua vaʼekue Itaʼýra tee ruguykuére” (Hech. 20:17, 28). Koʼã kristiáno oñenombráva okumplipa kuri umi rrekisíto Ñandejára Ñeʼẽme oĩva peteĩ ansiánope g̃uarã (1 Tim. 3:1-7). Tito ningo omoirũ vaʼekue Páblope iviáhepe ha chupe ojeʼe vaʼekue onombra hag̃ua ansiáno kongregasión de Crétape (Tito 1:5).

⁹ Umi kongregasión amás día hetave kuri ohóvo, ha umi apóstol ha ansiáno oĩva Jerusalénpe haʼe vaʼekue umi ansiáno prinsipál odirihíva chupekuéra. Haʼekuéra haʼe vaʼekue pe kuérpo governánte.

¹⁰ Apóstol Pablo oskrivírõ guare umi Efesoguápe, omombeʼu chupekuéra mbaʼépa ojapo vaʼerã ikatu hag̃uáicha ojeiko peteĩ ñeʼẽme kongregasiónpe. Oñehaʼã vaʼerã hikuái osegi Jesucrístope, pe omoakãva pe kongregasión ha avei pe gía omeʼẽva pe espíritu sánto. Avei heʼi chupekuéra tekotevẽha iñumílde, oñehaʼã siémpre oiko “peteĩ ñeʼẽme” ha ojogueraha porã enterovévandi kongregasiónpe (Efes. 4:1-6). Upéi Pablo osita avei pe heʼíva Salmo 68:18-pe, ha omombeʼu Jehová onombra hague umi kuimbaʼe ikatútavape oñatende pe kongregasiónre. Heʼi unos kuánto oservitaha “apóstolramo, unos kuánto profétaramo, unos kuánto opredika hag̃ua umi notísia porã, ótro katu pastór ha mboʼehára”. Koʼã kuimbaʼe ningo haʼe kuri peteĩ rregálo oúva Ñandejáragui omombaretétava pe kongregasión, ha oipytyvõtava umi ermánope ojapo hag̃ua opa mbaʼe ombovyʼáva Jehovápe (Efes. 4:7-16).

KOʼÁG̃A OJESEGI PE KONGREGASIÓN YPYKUE EHÉMPLO

¹¹ Umi testígo de Jehová kongregasionkuéra oñeorganisa avei ojejapo haguéicha síglo primérope. Umi kongregasión oĩva ko múndo tuichakuére haʼete oĩva peteĩ kongregasión guasúpente, pórke oiko peteĩ ñeʼẽme. Upépe umi oikótava ko yvy ape ári oipytyvõ umi ermáno ha ermána unhídope (Zac. 8:23). Upéva ikatu ojehupyty Jesús oipytyvõ rupínte chupekuéra. Haʼe opromete vaʼekue voi idisipulokuéra unhídope oĩtaha hendivekuéra “káda día, og̃uahẽ meve pe fin”. Koʼág̃arupi hetaiterei persóna oike pe kongregasión kristiánape, oasepta umi notísia porã oúva Ñandejáragui, oñemeʼẽ Jehovápe ha ojevautisa oiko hag̃ua chuguikuéra Jesús disípulo (Mat. 28:19, 20; Mar. 1:14; Hech. 2:41). Koʼãva haʼe hína umi “ótro ovechakuéra”, ha umi unhídondi oĩ oñondive peteĩ ovecha atýpe ha oñemoĩ hikuái Cristo poguýpe, haʼéva hína pe “pastór imbaʼeporãva” (Juan 10:14, 16; Efes. 1:22, 23). Ko ovecha aty Jesús omoakãva iñeʼẽrendu chupe ha oñemoĩ pe “esklávo de konfiánsa ha iñarandúva” poguýpe, upévare oiko hikuái peteĩ ñeʼẽme. Jasegíkena jajerovia ko esklávore, Jesús voi omoĩ vaʼekue oñangareko hag̃ua idisipulokuérare ha ñandedirihi hag̃ua koʼág̃a peve (Mat. 24:45).

MBAʼERÃPA OĨ UMI ASOSIASIÓN LEGÁL

¹² Umi asosiasión térã entida legál oñemoñepyrũ ikatu hag̃uáicha oñemeʼẽ hiʼoraitépe pe aliménto oúva Ñandejáragui, ha ikatu hag̃uáicha ojepredika umi notísia porã og̃uahẽ mboyve pe fin. Koʼã asosiasión ombaʼapo oñondivepa ha oñerrekonose de fórma legál heta paíspe. Koʼã mbaʼe ojejapo rupi umi notísia porã ikatu ojepredika ko múndo tuichakuére.

MBAʼÉICHA OÑEORGANISA UMI SUKURSÁL

¹³ Oĩhápe peteĩ sukursál oĩ peteĩ komite de sukursál odirihíva pe traváho ojejapóva umi território oĩvape ikárgope. Káda komitépe oĩ 3 térã hetave ansiáno ha peteĩva haʼe pe koordinadór del komite.

¹⁴ Káda sukursál oagrupa umi kongregasiónpe por sirkuíto. Umi sirkuíto tuicha térã michĩ hag̃ua odepende pe territóriore, mbaʼe idiómapa oñeñeʼẽ ha mboy kongregasiónpa oĩ peteĩ sónape. Oñenombra peteĩ superintendénte de sirkuíto oñeñatende hag̃ua káda sirkuítore. Pe sukursál omeʼẽ chupe instruksión okumpli porã hag̃ua umi rresponsavilida orekóva.

¹⁵ Umi kongregasión orrespeta ha oasepta mbaʼéichapa Jehová oorganisa ipuévlope, upéva ideprovechoiterei chupekuéra. Pe kongregasiónpe ojevyʼa oñenombra jave umi ansiánope, tahaʼe umi oĩtava komitépe, oñatendétava peteĩ sirkuítore térã oservítava peteĩ kongregasiónpe. Umi kongregasión kyreʼỹme ohaʼarõ pe aliménto espirituál omeʼẽva hiʼoraitépe pe esklávo de konfiánsa ha iñarandúva. Ko esklávo avei ohechauka orrespetaitereiha Crístope, siémpre osegi umi konsého bíblico ha oheja pe espíritu sánto ogia chupekuéra. Enterovéva jaservi rupi Ñandejárape oñondivepa peteĩ ñeʼẽme, jarresivi hetaiterei vendisión, oiko haguéicha umi kongregasiónre síglo primérope. Haʼekuéra osegi kuri “ojerovia mbareteve ha káda día heta hetave hikuái” (Hech. 16:5).