Mbaʼéichapa ikatu rembaʼapove Jehovápe g̃uarã

JESÚS omondótarõ guare idisipulokuérape opredika hag̃ua pe Rréino heʼi chupekuéra: “Hetaiterei oĩ la oñemonoʼõ vaʼerã, péro saʼi travahadór oĩ omonoʼõ hag̃ua”. Oĩ kuri hetaiterei traváho ojejapo hag̃ua, upémarõ haʼe heʼive: “Pejerurékena pe kokue Járape tombou hetave travahadór omonoʼõ vaʼerã” (Mat. 9:37, 38). Jesús heʼi idisipulokuérape mbaʼéichapa ojapo vaʼerã pe tembiapo. Haʼe heʼi vaʼekuére jahechakuaa ndoikói vaʼerãha operde rei itiémpo ojapo hag̃ua pe traváho. Haʼe heʼi chupekuéra: “Ndaikatumoʼãi voínte pepredika kompletoite umi siuda oĩvape Israélpe, che pe Yvypóra Raʼy, ag̃uahẽ mboyve” (Mat. 10:23).

² Koʼág̃a avei oĩ hetaiterei mbaʼe jajapo hag̃ua Ñandejára servísiope. Umi notísia porã oñeʼẽva Ñandejára Rréinore ojepredika vaʼerã ou mboyve pe fin, ha saʼipaitéma la tiémpo (Mar. 13:10). Ñande território ningo ko múndo kompletoite, upévare ñane situasión ojogua Jesús ha idisipulokuéra situasiónpe. Péro ñande jareko hetave traváho pórke oĩ hetaiterei hénte ko múndope, ha ñande saʼieterei ñaime ñañekomparáramo hesekuéra. Péro ikatu ñaĩ segúro Jehová ñanepytyvõtaha. Umi notísia porã katuete ojepredikáta ko yvy tuichakuére, ha pe fin og̃uahẽta kavalete pe tiémpo Jehová omoĩ vaʼekuépe. Ha ñande, ¿ñamotenondétapa Ñandejára Rréino ikatu hag̃uáicha jajapo ikatúva guive Jehová servísiope? ¿Mbaʼe métapa ikatu ñanepytyvõ jajapo hag̃ua upéva?

³ Jesús omombeʼu mbaʼépa Jehová ohaʼarõ isiervokuéra ojevautisávagui. Haʼe heʼi: “Rehayhu vaʼerã Jehová nde Járape nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30). Upéicharõ tekotevẽ jaservi Jehovápe ñande pyʼaite guive. Upéva heʼise ñañemeʼẽmbaite vaʼerãha Jehová servísiope, ha jajapóvo upéva jahechauka jaadoraha chupe añoite ha añetehápe jaserviseha chupe (2 Tim. 2:15). Tahaʼe haʼéva ñane situasión, enterove jareko oportunida ñambaʼapove hag̃ua Jehová servísiope. Jahechamína mbaʼe mbaʼépa ikatu jajapove. Upéi ikatúta jadesidi mbaʼe métapa jahupytyse.

JASERVI KONGREGASIÓNPE DE PUVLIKADÓR

⁴ Enterove persóna oaseptáva la Biblia omboʼéva orresivi peteĩ rresponsavilida iporãitereíva: opredika vaʼerã umi notísia porã. Upéva hína pe traváho prinsipál Jesús omeʼẽ vaʼekue idisipulokuérape (Mat. 24:14; 28:19, 20). Umi orresivíva umi notísia porã ensegída omombeʼu jepi ótrope, péicha ojapo vaʼekue Andrés, Felipe, Cornelio ha hetave (Juan 1:40, 41, 43-45; Hech. 10:1, 2, 24; 16:14, 15, 25-34). ¿Heʼisépa upéva peteĩ persóna ikatuha omombeʼu umi notísia porã ojevautisa mboyve? Si, ikatu omombeʼu. Peteĩ estudiánte okumplíma guive umi rrekisíto oiko hag̃ua chugui puvlikadór no vautisádo, ikatúma osẽ opredika pe kongregasión ndive. Ikatu avei opredika ótro hendáicha, upéva odependéma isituasiónre.

⁵ Peteĩ puvlikadór ojevautisa rire katuete ojaposéta ikatúva guive oipytyvõ hag̃ua ótrope oikuaa hag̃ua umi notísia porã. Upe traváho porãite ikatu ojapo tahaʼe kuimbaʼe térã kuñanguéra. Ajépa javyʼaite ikatu haguére ñaipytyvõ michĩmi jepe oñemotenonde hag̃ua Ñandejára Rréino. Enterove oñehaʼãva ojapo hetave mbaʼe Ñandejára servísiope katuete ovyʼáta.

IKATU REVA OÑEKOTEVẼHÁPE AJÚDA

⁶ Ikatu oime ne kongregasión pyʼỹi okuvri porã iterritório de predikasión. Oimérõ upéicha oiméne repensáma iporãtaha reváramo oñekotevẽvehápe opredika vaʼerã (Hech. 16:9). Oiméramo nde reservi de ansiáno térã siérvo ministeriál, ikatu reva ótro kongregasión oñekotevẽhápe ajúda. Pe superintendénte de sirkuíto ikatu omeʼẽ ndéve algúna suherénsia reikuaa hag̃ua mbaʼe kongregasión nde sirkuitopeguápe ikatu reipytyvõ. Ha revaséramo ótro lugár oĩvape nde paíspe, pe sukursál ikatu omeʼẽve ndéve informasión nepytyvõtava.

⁷ Oiméramo revase ótro paíspe, ¿mbaʼépa rejapo vaʼerã? Tekotevẽ repensa porã raẽ. Ikatu reñeʼẽ umi ansiáno ne kongregasionpeguándi. Redesidíramo reva, heta mbaʼe okambiáta ha avei oafektáta umi ohóvape nendive (Luc. 14:28). Péro nereplaneáiramo repyta heta tiémpore, iporãvéta reva peteĩ lugár oĩvape nde paíspente.

⁸ Heta paíspe umi ermáno orekóva rresponsavilida kongregasiónpe ndahetái ojapo ojevautisa hague. Haʼekuéra iñumílde ha oipota jepi odirihi pe kongregasión umi ermáno iñexperiensiavéva ováva upépe. Oiméramo nde peteĩ ansiáno ha repensa hína reva koʼãichagua paíspe, siémpre nemanduʼa vaʼerã nde nderehoiha rembaʼapo hag̃ua ivesekuéra, síno embaʼapo hag̃ua hendivekuéra. Emokyreʼỹ vaʼerã chupekuéra oprogresa ha oasepta hag̃ua umi rresponsavilida kongregasiónpe (1 Tim. 3:1). Oiméramo pe kongregasiónpe heta mbaʼe ndojejapói nde paíspe ojejapoháicha, nepasiénsia vaʼerã. Pe experiénsia nde rerekóva reipuru vaʼerã reipytyvõ hag̃ua umi ermáno upepeguápe. Upéicha, tekotevẽramo upéi reho jey nde paíspe, umi ansiáno oĩtama preparádo okuida hag̃ua pe kongregasiónre.

⁹ Oiméramo nde reservi hína de ansiáno, siérvo ministeriál, prekursór térã puvlikadór, pe komite de servísio ne kongregasiongua ojapo vaʼerã peteĩ kárta de rrekomendasión. Pe kárta nde rejapóva rejerure hag̃ua informasión ha pe kárta de rrekomendasión oñemondo vaʼerã oñondive pe sukursál oñatendévape pe país nde rehosehápe. Ha pe sukursál ndeavisáta umi kongregasión oikotevẽva ajúda.

EAPRENDE ÓTRO IDIÓMA REPREDIKA HAG̃UA

¹⁰ Rejaposevéramo Jehová servísiope repensakuaa ndaikatúipa reaprende peteĩ idióma pyahu, umíva apytépe lenguaje de señas. Reaprendeséramo peteĩ idióma pyahu repredika hag̃ua, ikatu remombeʼu peteĩ ansiánope térã pe superintendénte de sirkuítope. Haʼekuéra omeʼẽta ndéve suherénsia iporãva ha nemokyreʼỹta. Umi sukursál oipytyvõ jepi umi sirkuíto oorganisa hag̃ua kúrso de idióma. Upearã oñeinvita umi prekursór ha puvlikadórpe ikatu hag̃uáicha oaprende peteĩ idióma pyahu.

IKATU RESERVI DE PREKURSÓR

¹¹ Enterove puvlikadór oikuaa vaʼerã umi rrekisíto tekotevẽva okumpli peteĩ ermáno oservi hag̃ua de prekursór auxiliár, rregulár, espesiál térã oservi hag̃ua de ótra fórma pe tiémpo komplétope. Pe oserviséva de prekursór haʼe vaʼerã peteĩ kristiáno vautisádo omoĩva peteĩ ehémplo porã ha ikatu vaʼerã ohupyty umi óra oñehaʼarõva chugui iservísiope. Pe komite de servísio oaprova vaʼerã pe solisitu omyenyhẽva umi ermáno oserviséva de prekursór auxiliár térã rregulár. Umi prekursór espesiálpe katu onombra pe sukursál.

¹² Ikatu reservi de prekursór auxiliár un mes, hetave mésere térã de kontínuo, ikatuha peve. Heta puvlikadór oaprovecha umi fécha espesiál ojapo hag̃ua iprekursorádo auxiliár. Por ehémplo pe konmemorasión tiémpope, térã pe visíta de superintendénte de sirkuíto jave. Ótro katu oaprovecha ivakasión jave. Umi imitãva ikatu ojapo ijauxiliár vakasiónpe avei. Umi ermáno ojapóva iprekursorádo auxiliár konmemorasión tiémpope (marzo ha abril), térã visíta de superintendénte de sirkuíto jave oelehikuaa pe auxiliár ojejapohápe saʼive óra. Oiméramo nde peteĩ puvlikadór ikondúkta porãva ha repensa ikatutaha remboyke ne tiémpo rehupyty hag̃ua umi óra tekotevẽva un méspe, ejerure peteĩ solisitu umi ansiánope. Haʼekuéra vyʼápe ohecháta ikatútapa reservi de prekursór auxiliár.

¹³ Ikatu reservi de prekursór rregulár. Upearã rehupyty vaʼerã umi óra oñehaʼarõva rejapo káda áño. Umi prekursór rregulár ombaʼapo kyreʼỹ oipytyvõ hag̃ua pe kongregasiónpe. Haʼekuéra iguapoiterei ha upéva omokyreʼỹ umi ermánope opredikase hag̃ua ha ojapo hag̃ua avei iprekursorádo. Umi oserviséva de prekursór rregulár haʼe vaʼerã puvlikadór omoĩva ehémplo porã kongregasiónpe, ha ohasáma vaʼerã 6 mése jepe ojevautisa hague.

¹⁴ Umi prekursór rregulár apytégui algúnope oñenombra prekursór espesiál. Ojeelehi umi ohechaukámavape ikatupyryha omboʼévo la héntepe. Haʼekuéra oĩ vaʼerã dispuésto ohóvo pe sukursál heʼihápe chupekuéra. Oñemondo jepi chupekuéra umi lugár mombyryhápe ikatutahápe otopa hénte oikuaaséva la Biblia, ha péicha omoñepyrũ hag̃ua peteĩ kongregasión pyahu. Sapyʼánte oñemondo umi prekursór espesiálpe umi kongregasión oñekotevẽhápe ajúda okuvripa hag̃ua iterritório. Ha umi prekursór espesiál oservíva de ansiáno ikatu oñemondo umi kongregasión michĩvape, noikotevẽiramo jepe hikuái hetave opredika vaʼerã. Umi prekursór espesiálpe oñemeʼẽ ajúda ekonómika. Ndahetáiramo jepe, upéva oipytyvõ chupekuéra oreko hag̃ua oikotevẽmíva. Algúnope oñenombra oservi hag̃ua de prekursór espesiál temporál.

UMI MISIONÉRO

¹⁵ Pe Komite de Servísio del Kuérpo Governánte onombra umi misionérope. Upéi pe komite de sukursál omondo chupekuéra oservi hag̃ua umi siuda tuichávape. Umi misionéro omombarete umi kongregasiónpe ha oipytyvõ oñemotenondeve hag̃ua pe predikasión. Normálmente oho jepi hikuái pe Eskuéla de Evanhelisadórpe. Umi misionérope oñemeʼẽ peteĩ lugár oiko hag̃ua ha michĩmi ajúda ekonómika.

UMI SUPERINTENDÉNTE DE SIRKUÍTO

¹⁶ Pe Kuérpo Governánte onombra mboyve umi superintendénte de sirkuítope, haʼekuéra oservi raẽ de superintendénte sustitúto ikatu hag̃uáicha orresivi entrenamiénto ha orekove experiénsia upe asignasiónpe. Umi superintendéntepe ogusta pe predikasión ha ohayhu umi ermánope. Haʼekuéra ningo prekursór kyreʼỹ, oinvestiga porã la Biblia omboʼéva, oporomboʼekuaa ha omeʼẽ umi diskúrso igústova. Ojekuaa porãiterei haʼekuéra orekoha umi kualida porã oúva Ñandejára espíritugui, iñakãguapy, noñemohatãi heʼívape ha iñentendído. Oiméramo pe superintendénte omenda, hembireko omoĩ ehémplo iporãva oñekomporta lájape, otrata porã ótrope ha ikatupyry predikasiónpe. Pe ermána oikuaa Jehová oipotaha oñemoĩ iména poguýpe, upévare ndoikói oñeʼẽ iména rérape ha ndojagarrapái oiko jave peteĩ konversasión. Umi superintendénte ha hembireko heta hembiapo, upévare hesãi vaʼerã hikuái. Ndaipóri peteĩ solisitu umi prekursór ikatúva okompleta oserviséramo de superintendénte. Upéva rangue, oĩramo orekóva pe méta ikatu omombeʼu pe superintendéntepe ha haʼe omeʼẽta chupe suherénsia iporãva.

UMI ESKUÉLA BÍBLICA

¹⁷ Eskuéla de Evanhelisadór. Oñekotevẽ ningo hetave opredika vaʼerã umi lugár ndaikatuihápe ojepredika pyʼỹi, ha avei oĩ heta kongregasión oikotevẽva ajúda. Upévare, umi ermána soltéra, ermáno soltéro ha umi matrimónio ikatu okompleta peteĩ solisitu oho hag̃ua pe Eskuéla de Evanhelisadórpe. Otermina rire pe eskuéla algúnope oñemondo oservi hag̃ua de prekursór rregulár oñekotevẽhápe ajúda upe paíspe. Péro umi ojeofreséva ikatu orresivi ótra asignasión ipaíspe térã oservi hag̃ua ótro paíspe. Algúnope avei ikatu oñenombra prekursór espesiál térã prekursór espesiál temporál. Umi prekursór ohoséva ko eskuélape ha oikuaaséva umi rrekisíto ikatu oho pe rreunión ojejapóvape pe aty guasu tres diaguápe.

¹⁸ Eskuéla Bíblica de Galaad. Umi ermána soltéra, ermáno soltéro ha umi matrimónio ojeelehíva oho hag̃ua ko eskuélape oñeʼẽkuaa vaʼerã inglés ha oĩma vaʼerã pe servísio espesiál de tiémpo komplétope. Ojehechakuaa haʼekuéra ikatuha oipytyvõ ojejapo porãve hag̃ua pe predikasión térã umi mbaʼe ojejapóva pe sukursálpe. Haʼekuéra ohechaukáma vyʼápe oserviha umi ermánope, mborayhúpe oipytyvõha chupekuéra osegi hag̃ua umi enseñánsa oĩva la Bíbliape térã umi instruksión omeʼẽva pe organisasión. Pe komite de sukursál omokyreʼỹ umi ermáno ikatúvape oho, okompleta hag̃ua pe solisitu. Umi oterminávape ko eskuéla ikatu oñemondo peteĩ kongregasiónpe térã pe sukursálpe, ipaíspe térã ótro paíspe.

BETEL

¹⁹ Pe servísio ojejapóva Betélpe ningo peteĩ asignasión iporãitereíva. Betel heʼise “Ñandejára Róga”, ha opyta porã hese upe téra pórke upe guive oñepytyvõ oñemotenonde hag̃ua Ñandejára volunta. Umi ermáno ha ermána ombaʼapóva upépe oipytyvõ ojejapo, ojetradusi ha ojerreparti hag̃ua umi puvlikasión. Pe Kuérpo Governánte, ogiáva umi kongregasión oĩva ko yvy tuichakuére, omombaʼeterei pe servísio ojapóva umi betelita. Heta betelita ombaʼapóva traduksiónpe oiko umi lugár oñeñeʼẽhápe pe idióma otradusívape. Péicha ikatu ohendu hikuái mbaʼéichapa umi hénte oñeʼẽ. Ha avei haʼekuéra ikatu ohecha añetehápepa oñentende umi puvlikasión ojetradusi lája.

²⁰ Betélpe ojejapo heta traváho ipohýiva, upévare oñeinvita prinsipálmente umi ermáno vautisádo imitãva, hesãiva ha ikatúvape ombaʼapo pohýi. Nde rehoséramo rembaʼapo Betélpe ikatu reporandu mbaʼépa hína umi rrekisíto umi ansiáno ne kongregasionguápe.

KONSTRUKSIÓN

²¹ Umi omopuʼãva umi lugár oipurútava Ñandejára organisasión ojapo hína peteĩ traváho sagrádo, ojapo haguéicha Salomón omopuʼãrõ guare pe témplo (1 Rey. 8:13-18). Heta ermáno ha ermána ojeofrese kyreʼỹme oipuru hag̃ua itiémpo ha umi mbaʼe orekóva oapoja hag̃ua ko tembiapo.

²² ¿Ndépa ikatu reipytyvõ avei umi konstruksiónpe? Oiméramo nde rejevautisáma ha ikatu reipytyvõ ko traváhope, umi ermáno konstruksionpegua ovyʼaitereíta rejeofreséramo reipytyvõ hag̃ua. Ha oimérõ nderejapokuaái algúna kósa, haʼekuéra nepytyvõta ndekatupyry hag̃ua. Emombeʼúna umi ansiánope nde reipytyvõseha pe grúpo de konstruksiónpe. Oĩ algúno ermáno vautisádo okumplíva umi rrekisíto oho hag̃ua oservi ótro paíspe.

²³ Oĩ hetaiterei mbaʼe ikatúva jajapo ñaipytyvõ hag̃ua pe konstruksiónpe. Umi ermáno vautisádo omoĩva ehémplo iporãva ha ivaléva peteĩ mbaʼe oñekotevẽvape pe konstruksiónpe, oĩ jave projékto ag̃ui hógagui ikatu ojeofrese oservi hag̃ua de voluntário pe Departamento Local de Diseño y Construcciónpe. Ótro ermáno ikatu avei oservi mombyryve hógagui peteĩ tiémpore ha pe sukursál onombra chupekuéra oservi hag̃ua de voluntário de konstruksión, ha upéva ikatu ipuku 2 semána guive 3 mése peve. Umi oñenombráva oservi hag̃ua hetave tiémpore oservi de siérvo de konstruksión. Ijapyteguikuéra oĩramo oñemondóva oservi hag̃ua ótro paíspe, umívape oñenombra siérvo de konstruksión expatriádo. Peteĩ grúpo de konstruksiónpe oĩ umi voluntário de konstruksión ha umi siérvo de konstruksión. Haʼekuéra odirihi umi projékto ha oipytyvõ chupekuéra umi voluntário del Departamento Local de Diseño y Construcción, ha avei umi voluntário oĩva pe kongregasión ojejapohápe pe projékto. Opávo peteĩ projékto pe grúpo de konstruksión ova ohóvo pe território oĩvape pe sukursál kárgope omoñepyrũ hag̃ua ótro projékto.

¿MBAʼE MÉTAPA REHUPYTYSE?

²⁴ Oiméramo nde reñemeʼẽma Jehovápe katuete reservise chupe pára siémpre. Péro, ¿mbaʼe métapa reguereko? Nde remoĩramo peteĩ méta, upéva nepytyvõta reipuru porã hag̃ua ne mbaretekue ha entéro mbaʼe rerekóva (1 Cor. 9:26). Umi méta nepytyvõta rejapo hag̃ua umi mbaʼe iñimportantevéva ha imbaretevéta nde jerovia, péicha ikatúta rehupyty hetave rresponsavilida Jehová organisasiónpe (Filip. 1:10; 1 Tim. 4:15, 16).

²⁵ Apóstol Pablo omoĩ ehémplo iporãva ikatúva jasegi jaservívo Ñandejárape (1 Cor. 11:1). Haʼe oñemeʼẽmbaite vaʼekue Jehová servísiope. Apóstol Pablo orrekonose Jehová omoĩ hague henondépe heta oportunida ojapove hag̃ua iservísiope. Haʼe oskrivi umi Corintoguápe: “Peteĩ oportunida tuichaitereíva oñepresenta chéve ajapo hag̃ua hetave mbaʼe ñande Ruvicha servísiope”. Ha ñande, ¿jarekópa avei ñane renondépe heta oportunida? Si, jareko hetaiterei oportunida jaservi porãve hag̃ua Jehovápe kongregasiónpe, por ehémplo japredikávo umi notísia porã. Péro Pablo rehe oiko haguéicha, oñemeʼẽ rupi ñandéve “peteĩ oportunida tuichaitereíva” “oĩ heta oñemoĩva” ñanderehe (1 Cor. 16:9). Pablo ojekorrehi vaʼekue ijupe voi, upévare heʼi: ‘Che akastiga che rete ha areko che esklávoramo’ (1 Cor. 9:24-27, nóta). ¿Ñapensápa ñande avei upéicha?

²⁶ Oñemokyreʼỹ enterovépe opensa hag̃ua isituasión rehe ha omoĩ hag̃ua méta ikatúva ohupyty. Heta ermáno koʼág̃a oservíva de tiémpo kompléto, imitãite guive orekóma kuri upe méta. Algúnope ituakuéra voi omokyreʼỹ ojapo hag̃ua upéva. Koʼã ermáno odisfruta ha ovyʼaiterei oservívo Jehovápe ha nombyasýi ni michĩmi (Prov. 10:22). Péro oĩve hína umi méta ikatúva ñamoĩ, por ehémplo: ñasẽ predikasiónpe káda semána, ñamoñepyrũ peteĩ estúdio bíblico, térã jajeprepara porãve rreunionrã. La iñimportánteva hína jasegi jajerovia mbarete ha ñakumpli porã ñane rembiapo. Jajapóramo upéva ñambotuicháta Jehovápe ha jahupytýta pe méta ijojahaʼỹva, upéva hína jaservi Jehovápe pára siémpre (Luc. 13:24; 1 Tim. 4:7b, 8).