Umi lugár jaadorahápe Ñandejárape

UMI oadorávape Jehovápe oñemanda oñembyaty hag̃ua ikatu hag̃uáicha orresivi instruksión ha oñomokyreʼỹ (Heb. 10:23-25). Pe primer lugár umi israelita ojapo vaʼekue oadora hag̃ua Ñandejárape héra vaʼekue tavernákulo térã lugár de rreunión (Éx. 39:32, 40, nóta). Tiémpo rire, David raʼy, Salomón, omopuʼã peteĩ óga térã témplo ombotuicha hag̃ua Ñandejárape (1 Rey. 9:3). Upéi, pe témplo oñehundi rire áño 607-pe a.C., umi judío oñembyaty oadora hag̃ua Ñandejárape umi lugár héravape sinagóga. Upe rire pe témplo oñemopuʼã jey, péicha umi oservíva Ñandejárape oreko jey peteĩ lugár de adorasión. Jesús oporomboʼe vaʼekue umi sinagogahárupi ha avei pe témplope (Luc. 4:16; Juan 18:20). Una vuéltape katu Jesús oñembyaty umi héntendi peteĩ montáñape (Mat. 5:1–7:29).

² Jesús omano rire, umi kristiáno oñembyaty umi lugár oĩháme heta hénte térã umi ermáno rógape omboʼe hag̃ua Ñandejára Ñeʼẽ ha oñomokyreʼỹ hag̃ua hikuái (Hech. 19:8, 9; Rom. 16:3, 5; Col. 4:15; Filem. 2). Umi kristiáno ypykuépe ojepersegi vaʼekue, upévare sapyʼánte oñembyaty vaʼekue umi lugár oĩvape kañyhápe ani hag̃ua ojepilla chupekuéra. Péicha jahechakuaa umi Ñandejára siérvo ifiélva yma guare oñembyatyse hague umi lugár ojeadorahápe Ñandejárape, ikatu hag̃uáicha ‘Jehová ohekomboʼe’ chupekuéra (Is. 54:13).

³ Koʼág̃a avei ñande ñañembyaty umi rreunionrã umi lugár ikatuhápe oho heta hénte térã ñane ermanokuéra rógape. Avei ñañembyaty umi ermáno rógape ñasẽ hag̃ua japredika. Entéro umi oofreséva hóga ojejapo hag̃ua umi rreunión oikuaa upéva haʼeha peteĩ priviléhio. Heta ermáno ohechakuaa orresivi hague heta vendisión ojapo haguére upéva.

UMI SALÓN DEL REINO

⁴ Pe lugár oñembyatyhápe umi testígo de Jehová héra Salón del Reino. Heta vése ojejogua peteĩ terréno ha upépe oñemopuʼã pe Salón, térã oñembopyahu peteĩ lugár oĩma vaʼekue voi. Ikatu hag̃uáicha ojeaorra ha ojepuru porãve umi Salón, opyta porãrõ ikatu unos kuánto kongregasión oñembyaty el mísmo Salónpe. Oĩ lugár tekotevẽhápe ojealkila peteĩ lugár Salonrã. Oñemopuʼãrõ peteĩ Salón del Reino térã ojearreglárõ ha tuicha voi okambia, ikatu ojejapo peteĩ dedikasión, péro ndatuicháirõ umi mbaʼe oñekambiáva natekotevẽi ojejapo pe dedikasión.

⁵ Umi Salón del Reino ningo isensíllo, ndojejapói jajechauka hag̃ua ótrope. Umi modélo orekóva umi Salón ikatu odepende la lugár rehe, péro siémpre ojejapo ikatu hag̃uáicha ikómodo umi rreunionrã (Hech. 17:24).

⁶ Entéro umi ermáno oĩva umi kongregasiónpe oñenkarga umi gásto oĩvare ojepuru ha ojejapo hag̃ua mantenimiénto pe Salón del Réinope. Ndojejapói kolékta ha ndojejeruréi pláta. Oñemoĩ peteĩ káha de kontrivusión ikatu hag̃uáicha umi ohóva rreunionhápe omeʼẽ ikontrivusión ojepaga hag̃ua umi gástore. Haʼekuéra omeʼẽ ikontrivusión ijeheguiete ha ipyʼaite guive (2 Cor. 9:7).

⁷ Enterovéva ovyʼaiterei ikatu haguére omeʼẽ ikontrivusión pe Salónpe g̃uarã ha ikatu rupi oipytyvõ oñemopotĩ ha oñemyatyrõ hag̃ua. Peteĩ ansiáno térã peteĩ siérvo ministeriál oñeasigna jepi oorganisa hag̃ua koʼã traváho. Umi grúpo de predikasión omopotĩ jepi la Salón ha pe superintendénte de grúpo ha pe auxiliár omotenonde vaʼerã upéva. Oñeñatende vaʼerã mbaʼéichapa oĩ pe Salón del Reino ryepy ha okápe pórke pe Salón orrepresenta Jehovápe ha iñorganisasiónpe.

⁸ Oĩ jave mas de una kongregasión oñembyatýva peteĩ Salónpe, umi ansiáno umi kongregasionpegua oorganisa peteĩ komite de mantenimiénto del Salón del Reino. Umi kuérpo de ansiáno oiporavo peteĩ ermánope oservi hag̃ua de koordinadór del komite de mantenimiénto. Ko komite ombaʼapo umi kuérpo de ansiáno poguýpe, ha oorganisa oñemopotĩ hag̃ua pe Salón, ojasegura tojejapo umi traváho de mantenimiénto, ha avei ohecha oĩpa umi mbaʼe tekotevẽva ojejapo hag̃ua limpiésa ha mantenimiénto. Ojejapo hag̃ua entéro koʼã mbaʼe, umi kongregasión oipurúva pe Salón ombaʼapokuaa vaʼerã oñondive.

⁹ Oĩ jave heta kongregasión oñembyatýva peteĩ Salónpe, ikatu oñoturna okambia hag̃ua irreunión óra. Okambiáta jave hikuái pe óra umi ansiáno ohechauka vaʼerã ojepyʼapyha iñermanokuérare ha ohayhuha chupekuéra (Filip. 2:2-4; 1 Ped. 3:8). Ni peteĩ kongregasión ndodesidíri vaʼerã mbaʼeve umi ótra kongregasión rérape. Pe superintendénte de sirkuíto ovisita jave peteĩva umi kongregasión, umi ótra kongregasión oĩva upe Salónpe okambiáta irreunión día oñekotevẽháicha upe semánape.

¹⁰ Pe Salón del Reino ikatu ojepuru ojejapo hag̃ua diskúrso de vóda ha diskúrso de funerál, péro upearã pe komite de servísio upe kongregasionpegua omeʼẽ vaʼerã permíso. Umi ansiáno ohecha porãta káda solisitu, ha odesidi hag̃ua orekóta enkuénta umi instruksión omeʼẽva pe sukursál.

¹¹ Umi oñemeʼẽvape permíso oipuru hag̃ua pe Salón oñekomporta vaʼerã peteĩ kristiáno teéicha. Ndovaléi ojejapo pe Salónpe mbaʼeve ikatúva omoñeñandu vai ha omolesta umi ermáno ha ermánape, térã peteĩ mbaʼe ikatúva omongyʼa Jehová réra térã pe kongregasiónpe (Filip. 2:14, 15). Pe sukursál ikatu avei odesidi oipuru peteĩ Salón del Reino ótra kosarã, por ehémplo ojejapo hag̃ua pe Eskuéla del Ministério del Rréino ha pe Eskuéla de Prekursór.

¹² Pe kongregasión siémpre ohechauka vaʼerã orrespetaha pe lugár oñembyatyhápe. Ñande ao, ñane pínta ha jajarregla lája omombaʼeguasu vaʼerã Jehovápe ha ohechauka vaʼerã jaadoraha chupe (Ecl. 5:1; 1 Tim. 2:9, 10). Jajapóvo koʼã mbaʼe jahechauka ñamombaʼeha umi rreunión.

¹³ Iñimportanteterei entéro mbaʼe oĩ en órden rreunión aja. Iporãta umi mitã oguapýrõ ituakuérandi. Umi orekóva mitã michĩva ikatu oguapy umi lugár ifasilvetahápe chupekuéra osẽ hag̃ua okorrehiʼimi ifamíliape térã oñatende hesekuéra. Péicha umi ótro ermáno ikatúta osegi oñatende porã pe rreuniónre.

¹⁴ Ojeporavo jepi umi ermáno ikatupyrývape oservi hag̃ua de akomodadór rreunión aja. Haʼekuéra oñatende vaʼerã la oikóvare pe Salónpe, iñamávle vaʼerã ha omanehakuaa vaʼerã heta situasión. Umi akomodadór oreko koʼã rresponsavilida: orresivi umi oho ramóvape ha oipytyvõ oñeñandu porã hag̃ua, oheka lugár umi og̃uahẽvape tárde, okonta mboýpa oñeime rreunionhápe, ha oñatende vaʼerã noiméipa hakueterei térã roʼyeterei ha tekotevẽpa ojeavri umi ventána. Tekotevẽramo, umi akomodadór oavisáta umi tuakuérape oñatende hag̃ua ifamíliare ani hag̃ua odipara pe Salónpe oñepyrũ mboyve térã opa rire umi rreunión, térã ani hag̃ua ohuga pe platafórmape. Oimérõ peteĩ mitã káusare umi ermáno ndaikatuvéi oñatende porã, pe akomodadór ikatu ojerure pyʼaguapýpe porãnte umi túape oguenohẽ hag̃ua okápe. Umi akomodadór traváho tuichaiterei oipytyvõ enterove odisfruta hag̃ua rreuniónpe. Iporãvéta oñeasignáramo umi ansiáno ha siérvo ministeriálpe oservi hag̃ua de akomodadór.

OÑEMOPUʼÃ UMI SALÓN DEL REINO

¹⁵ Primer síglope, oĩ vaʼekue kristiáno iplatavéva ótrogui, upévare apóstol Pablo heʼi vaʼekue: “Che ningo aipotánte entéro pereko jojapa. Umi mbaʼe hembýva peẽme toñemeʼẽ umi ndorekóivape. Ha umi mbaʼe hembýva chupekuéra ideprovéchota peẽme. Péicha entéro oreko jojapáta” (2 Cor. 8:14). Koʼág̃a avei ojejapo tekotevẽva guive ‘entéro oreko jojapa hag̃ua’. Umi kontrivusión omeʼẽva umi kongregasión oĩva ko yvy tuichakuére ojepuru oĩ jave lugár tekotevẽhápe oñembopyahu térã oñemopuʼã peteĩ Salón del Reino. Jehová organisasión ha umi kongregasión oñevenefisiáva ko arréglogui omombaʼeterei umi kontrivusión ojapóva ipyʼaite guive umi ermáno oĩva ko yvy tuichakuére.

¹⁶ Pe sukursál odesidíta mbaʼe Salónpepa oñembyatýta umi kongregasión oĩva peteĩ territóriope. Pe sukursál avei ohecha moõ ha arakaʼépa oñemopuʼãta térã oñembopyahúta peteĩ Salón del Reino. Oiko jave peteĩ desástre naturál ojehecha avei oñemyatyrõ hag̃ua umi Salón. Sapyʼánte ojearregla avei umi ermáno róga.

¹⁷ Pe sukursál oorganisa umi voluntário ojapótavape koʼã traváho: ojoguáva terréno térã propieda, opreparáva umi Salón diséño, okonsegíva umi permíso oñekotevẽva, omopuʼãva umi Salón ha oñenkargáva mantenimiéntore. Oñekotevẽterei umi voluntáriore pórke heta lugárpe ofalta gueteri Salón del Reino. Oñemokyreʼỹ entéro okumplívape umi rrekisíto ha oipytyvõsévape tokompleta pe formulário ha tontrega pe komite de servísio ikongregasionpeguápe. Umi puvlikadór neʼĩrava ojevautisa ikatu oipytyvõ oñemopuʼã térã oñembopyahu hag̃ua pe Salón ohohápe.

SALÓN DE ASAMBLÉA

¹⁸ Umi kristiáno yma guare oñembyatými vaʼekue grúpo michĩvape. Péro sapyʼánte oñembyaty vaʼekue avei ‘hetaiterei hénte’ oñondivepa (Hech. 11:26). Koʼág̃a avei ojejapo umi aty guasu un diagua ha tres diagua ha upépe oñembyaty jepi heta hénte. Upearã ojealkila jepi peteĩ lokál, péro ndaipóri jave ni peteĩ ikatúva ojepuru, oñemopuʼã térã ojejogua peteĩ lugár ojeadora hag̃ua Jehovápe, oñehenóiva Salón de Asambléa.

¹⁹ Sapyʼánte ojejogua peteĩ lokál ha oñembopyahu ojepuru hag̃ua umi asamblearã. Péro hetave vése ojejogua pe terréno ha oñemopuʼã peteĩ Salón de Asambléa pyahu. Umi lokál ikatu tuicha térã michĩ, odepende la oñekotevẽvare upe sónape. Pe sukursál ohecha porã raẽ mboýpa ojegastáta ha mbaʼeichaitépa ojepurúta pe Salón de Asambléa, ha upe rire ae odesidi ojejoguátapa peteĩ lokál térã oñemopuʼãtapa peteĩ.

²⁰ Pe sukursál onombra umi ermáno oñatendétava umi Salón de Asambléa rehe ha oñenkargátava pe mantenimiéntore. Avei oñeorganisa umi kongregasión oñenkarga hag̃ua pe limpiésa pyʼỹive ojejapóvare, pe limpiésa ojejapóvare 2 vése al áño ha avei pe mantenimiéntore. Iporãiterei ningo umi ermáno ojeofreséramo ojapo hag̃ua koʼã mbaʼe, upévare oñemokyreʼỹ umi kongregasiónpe oapoja hag̃ua ipyʼaite guive koʼã traváho (Sal. 110:3; Mal. 1:10).

²¹ Sapyʼánte umi Salón de Asambléa ojepuru ótra kosarã, por ehémplo umi eskuélape g̃uarã, ha irreunión jave umi superintendénte de sirkuíto térã umi ansiáno peteĩ sirkuitopegua. Umi Salón de Asambléa ojededika avei Jehovápe umi Salón del Réinoicha. Upévare ñañembyaty jave umi Salón de Asambléape ñañemonde, jajarregla ha ñañekomporta porã vaʼerã, jajapoháicha jaha jave rreunionhápe Salón del Réinope.

²² Koʼã ára pahápe oĩ hetaiterei hénte oñemoag̃uíva Ñandejára organisasiónre, upéva ohechauka Jehová ovendesiha ipuévlope (Is. 60:8, 10, 11, 22). Upévare jaapojákena umi traváho ojejapóva oñekonsegi hag̃ua umi lugár de adorasión ha ñañehaʼã ñamopotĩ ha jakuida umívare. Péicha jahechaukáta ñamombaʼetereiha umi lugár jahahápe ñañomokyreʼỹ ñane ermanokuérandi, ha upéva koʼytevéntema ñaikotevẽ koʼág̃a pórke Jehová ára guasu hiʼag̃uimbaitéma.