“Pejapo vaʼerã entéro mbaʼe pembotuicha hag̃ua Ñandejárape”

ÑANDE ñañemeʼẽma Jehovápe, upévare ñambotuicha vaʼerã chupe entéro mbaʼe jaʼéva ha jajapóvape. Apóstol Pablo omeʼẽ vaʼekue ko konsého: “Pekaru jave, peʼu jave vevída térã pejapóramo oimeraẽ mbaʼe, siémpre pejapo vaʼerã entéro mbaʼe pembotuicha hag̃ua Ñandejárape” (1 Cor. 10:31). Upearã jasegi vaʼerã Jehová leikuéra porãite ha ihústova. Koʼã léi ohechauka haʼe iperfektoha (Col. 3:10). Ñahaʼanga vaʼerã Ñandejárape pórke ñande hína ipuévlo sagrádo (Efes. 5:1, 2).

² Oñeʼẽvo koʼã mbaʼére apóstol Pedro heʼi vaʼekue umi kristiánope: “Peẽ ningo koʼág̃a Ñandejára raʼy iñeʼẽrendúva chupe. Upévare anive pejapo umi mbaʼe vai pejapose vaʼekue yma ndapeikuaáirõ guare chupe. Upéva rangue, peẽ penepotĩ vaʼerã entéro mbaʼe pejapóvape, ipotĩháicha upe penerenói vaʼekue. Ñandejára Ñeʼẽ heʼi voi: ‘Peẽ penepotĩ vaʼerã, pórke che sánto hína’” (1 Ped. 1:14-16). Yma oñemanda vaʼekue umi israelítape ipotĩ hag̃ua, ha upéva avei oñemanda umi kristiáno koʼag̃aguápe. Upéva heʼise ndajahejái vaʼerãha ñanemongyʼa pe pekádo ha umi mbaʼe ivaíva oĩva ko múndope. Ñande ñañemeʼẽ Jehovápe jaservi hag̃ua chupe añoite (Éx. 20:5).

³ Jasegi hag̃ua ñanepotĩ jajapo vaʼerã Jehová léi heʼíva ha jasegi umi prinsípio, umíva jatopa Ñandejára Ñeʼẽme (2 Tim. 3:16). Jastudiávo la Biblia jaikuaave Jehovápe ha umi mbaʼe haʼe oipotáva jajapo, péicha ñañemoag̃uive hese. Avei jahechakuaa Ñandejára volunta iñimportanteveha ñande rekovépe ha tekotevẽha ñamotenonde Irréino (Mat. 6:33; Rom. 12:2). Upearã ñamonde vaʼerã peteĩ aóicha pe kondúkta pyahu (Efes. 4:22-24).

ANÍKENA IKYʼA ÑANE ADORASIÓN NI ÑANDEREKOVAI

⁴ Sapyʼánte ijetuʼu lénto jajapo hag̃ua Jehová léi heʼíva. Satanás ningo ñane enemígo ha haʼe oñehaʼãmbaite ñandegueraha hag̃ua tape vaíre. Avei ko múndo aña oĩ ñane kóntrape, ha ñaneimperfékto rupi ijetuʼu jepi jajapo hag̃ua iporãva. Añetehápe ñañehaʼãmbaite vaʼerã ikatu hag̃uáicha ñakumpli ñane promésa Jehovápe ha ñaneñeʼẽrendu chupe. La Biblia ñandeavisa voi ani hag̃ua ñañesorprende ou vove umi pruéva ha oĩ jave oñemoĩva ñanderehe. Ñande jasufríta jajapo haguére iporãva (2 Tim. 3:12). Ikatu javyʼa jahasa jave umi pruéva, pórke upéva heʼise jajapoha hína Ñandejára volunta (1 Ped. 3:14-16; 4:12, 14-16).

⁵ Jesús ningo perfékto vaʼekue, upéicharamo jepe haʼe oaprende mbaʼépa heʼise ñaneñeʼẽrendu umi mbaʼe osufri vaʼekuére. Haʼe núnka ndoʼái vaʼekue Satanás ñuhãme ha noñehaʼãi okonsegi mbaʼeve ko múndope (Mat. 4:1-11; Juan 6:15). Jesús ni nopensái vaʼekue omboykévo Ñandejárape. Haʼe siémpre ojapo umi mbaʼe Jehová omandáva, umi hénte ndaijaʼéiramo jepe hese upe haguére. Omano mboyve Jesús heʼi vaʼekue idisipulokuérape umi hénte ndaijaʼemoʼãiha hesekuéra avei. Upe tiémpo guive umi disípulo ohasa heta mbaʼe ijetuʼúva péro haʼekuéra ipyʼaguasu oikuaa rupi Ñandejára Raʼy ‘oganáma hague ko múndope’ (Juan 15:19; 16:33; 17:16).

⁶ Ani hag̃ua jajeheʼa ko múndore tekotevẽ jajapo Jehová omandáva, ojapo haguéicha ñane Mboʼehára Jesús. Upearã ndajaikéi vaʼerã polítikape, ha ndovaléi ñañentremete umi provléma oĩvare umi paíspe. Ha ani jaheja ko múndo kyʼa ñanemongyʼa. Ñande jasegi pe konsého oĩva Santiago 1:21-pe: “Perrechasákena entéro mbaʼe kyʼa ha umi mbaʼe aña, ha peneumíldekena ha peheja Ñandejára toñotỹ iñeʼẽ pende pype, upéva ikatu hína pendesalva”. Jastudiávo la Biblia ha jahávo rreunionhápe jaheja Ñandejára oñotỹ iñeʼẽ ñane akãme ha ñane korasõme, péicha ni ndajaipotamoʼãi umi mbaʼe oofreséva ko múndo. Pe disípulo Santiago oskrivi vaʼekue: “¿Ndapeikuaái piko oikóramo pendehegui ko múndo amígo, oikoha pendehegui Ñandejára enemígo? Upévare, entéro oikoséva ko múndo amígoramo, oiko hína Ñandejára enemígoramo” (Sant. 4:4). Upévare la Biblia heʼi porã tekotevẽha jasegi jajapo Jehová heʼíva ha ñamboyke umi mbaʼe oĩva ko múndope.

⁷ Ñandejára Ñeʼẽ ohechauka ndovaleiha ñanderekovai ni jajapo umi mbaʼe oporombojeguarúva. Heʼi voi: “Aníkena ni mbaʼevéicharõ peñeʼẽ tekovaíre, ni mbaʼeveichagua mbaʼe kyʼáre, ni peipotaitereiha heta mbaʼe, pórke Ñandejára siervokuéra ndojapói vaʼerã koʼã mbaʼe” (Efes. 5:3). Upévare ni nañapensái vaʼerã umi mbaʼe itieʼỹvare, oporomotĩvare ni ikyʼávare. Ni mbaʼevéicharõ ndajaikói vaʼerã ñañeʼẽ koʼã mbaʼére. Péicha jahechauka jajaposeha Ñandejára omandáva, iléi ningo ipotĩ ha ihústo.

ÑANEPOTĨ VAʼERÃ

⁸ Ñande ningo ñañehaʼã ani hag̃ua ikyʼa ñane adorasión ha ñanderekopotĩ hag̃ua, péro jaikuaa iñimportanteha avei ñande voi ñanepotĩ. Yma Ñandejára omanda vaʼekue umi israelítape omopotĩ hag̃ua pe kampaménto. Ñande avei ñanepotĩ vaʼerã ani hag̃ua Jehová ‘ohecha ñanderehe mbaʼeve ikyʼáva’ (Deut. 23:14).

⁹ La Biblia ohechauka tekotevẽha ñanepotĩ ñaĩ porã hag̃ua Ñandejára renondépe. Por ehémplo apóstol Pablo heʼi vaʼekue: “Upéicharõ che ermáno ha che ermanakuéra ahayhuetéva, [...] ñamopotĩ vaʼerã ñande rete ha ñane korasõ. Jahechaukákena jarrespetaha Ñandejárape ha péicha káda día ñanepotĩvéta henondépe” (2 Cor. 7:1). Upévare entéro kristiáno ha kristiána oñehaʼã vaʼerã ipotĩ, ha upearã ojahu ha ojohéi vaʼerã ijao. Káda paíspe idiferénte la situasión, upéicharamo jepe normálmente oĩ jepi y ha havõ ikatu hag̃uáicha ñanepotĩ ñande ha ñane familiakuéra.

¹⁰ Japredika meme rupi, umi hénte ñandekuaa porã pe jaikohápe. Upévare oñeñeʼẽ porãta ñane organisasiónre ñande róga ipotĩramo ha oĩramo vién ordenádo hyepýpe ha okápe. Umi famíliape, enterovéva ikatu oipytyvõ upearã. Por ehémplo, kuimbaʼekuéra ikatu oñenkarga pe ógare ha pe korapýre. Haʼekuéra oñatende porãramo pe ógare ha pe pátiore umi hénte oñeʼẽ porãta ñanderehe. Umi ermáno omoakã porãva hogapy omboʼe ifamíliape Jehová rape, péro avei okuida porã hógare (1 Tim. 3:4, 12). Kuñanguéra avei oreko pe rresponsavilida oñatendévo heta mbaʼére, por ehémplo pe óga ryepýre (Tito 2:4, 5). Tuakuéra omboʼe vaʼerã avei umi mitãme ojapo hag̃ua ipárte, por ehémplo omopotĩ ha oarregla hag̃ua ikotykuéra. Jahechaháicha iporã pe família kompletoite ojepokuaa omopotĩ pe oikohápe, pórke péicha ojeikóta hína pe múndo pyahúpe Ñandejára Rréino poguýpe.

¹¹ Heta testígo de Jehová oreko veíkulo térã móto oho hag̃ua rreunionhápe. Heta lugárpe umi ermáno orekómante vaʼerã peteĩ veíkulo opredika hag̃ua. Pe veíkulo térã pe móto oiko porã ha ipotĩ vaʼerã. Ñande róga ha ñande veikulokuéra ohechauka vaʼerã ñande ñaimeha Jehová puévlo ipotĩetévape. Avei ñañatende vaʼerã mbaʼéichapa oĩ ñande Biblia, ha ñande kartéra térã maletín.

¹² Ñane pínta ha ñande ao ohechauka vaʼerã jasegiha umi konsého oĩva la Bíbliape. Ñapensamíntena mbaʼéichapa ñañemondéta jahátaramo peteĩ persóna iñimportánteva rendápe. Ñande ao ningo katuete ipotĩta, nañandekachafamoʼãi síno ñañemonde porãta. Upéicharõ koʼytevéntema ñañatende vaʼerã ñane píntare ñarrepresenta jave Jehovápe predikasiónpe térã pe platafórmape. Umi hénte katuete oñeʼẽ porãta Jehová organisasiónre ñañemonde porãrõ. Ñañemonde lájare jahechauka vaʼerã ñaneakãguapyha ha ani ñaofende ótrope (Miq. 6:8; 1 Cor. 10:31-33; 1 Tim. 2:9, 10). Upéicharõ, jajeprepara jave jaha hag̃ua predikasiónpe, rreunionhápe térã umi aty guasuhápe ñanemanduʼa vaʼerã la Biblia heʼiha tekotevẽha ñanepotĩ ha ñañemonde porã. Ñande ningo siémpre ñambotuichase Jehovápe.

¹³ Koʼã mbaʼe jareko vaʼerã enkuénta avei javisita vove pe sentrál mundiál térã umi sukursál orekóva umi testígo de Jehová. Ñanemanduʼa vaʼerã Betel heʼiseha “Ñandejára róga”. Upévare ñañemonde ha ñañekomporta porã vaʼerã, jajapoháicha umi rreunionhápe Salón del Réinope.

¹⁴ Ha pe jaikohárupi, nañaiméi jave rreunionhápe térã predikasiónpe, lomímonte ñañatende vaʼerã ñañemonde lájare. Ñañeporandu vaʼerã: “¿Atĩtapa apredika hag̃ua pe aikohárupi che pínta káusare?”.

UMI DIVERSIÓN

¹⁵ Ñañeñandu porã ha ñaneresãi hag̃ua tekotevẽ japytuʼu ha jajediverti. Peteĩ vuéltape Jesús voi heʼi vaʼekue idisipulokuérape oho hag̃ua hendive peteĩ lugár ndaiporihápe avave ‘opytuʼumi hag̃ua’ (Mar. 6:31). Japytuʼúramo ha jaiporavo porãramo umi diversión javyʼáta ha ñanepytyvõta jareko jey hag̃ua fuérsa jasegi hag̃ua jajapo ñane rembiapo.

¹⁶ Koʼág̃arupi oĩ heta mbaʼe oñemoĩva diversionrã, upévare tekotevẽ kristianokuéra ñanearandu jaiporavokuaa hag̃ua. Iporã añete ñamboyke tiémpo jajediverti hag̃ua, péro upéva ndahaʼéi pe iñimportantevéva. La Biblia heʼi porã koʼã “ára pahápe” umi hénte ‘ojapotaha chupekuéra ogustávante ohayhu rangue Ñandejárape’ (2 Tim. 3:1, 4). Ko múndope oĩ heta diversión naiporãiva ha jarrechasa vaʼerã umíva jasegi hag̃ua jaiko Jehová oipotaháicha.

¹⁷ Umi kristiáno yma guare oñehaʼãmbaite vaʼekue ani hag̃ua omongyʼa chupekuéra pe múndo oikóva umi diversión rapykuérinte. Yma umi ohóva pe sírko rrománope ojediverti vaʼekue ohechávo ótro hapicha osufriha. Umi héntepe ogusta vaʼekue umi diversión oĩháme violénsia, hénte huguypáva ha séxo, ha upévare ojeprepara vaʼekue umichagua diversión. Péro umi kristiáno omboykete vaʼekue umi mbaʼe. Koʼág̃a avei ko múndope oĩ heta diversión ivaietereíva, ha ojeprepara voi diversionrã umi mbaʼe ñanembojeguarúva. Upévare tekotevẽterei ‘ñañatende porã’ jaiko lájare ha jajei umi diversión ivaívagui ha ñanemongyʼátavagui (Efes. 5:15, 16; Sal. 11:5). Sapyʼánte ikatu pe diversión ndaivaíri, péro pe lugár ikatu hína naiporãi peteĩ kristiánope g̃uarã (1 Ped. 4:1-4).

¹⁸ Oĩ ningo umi diversión iporãva ha peteĩ kristiáno ikatúva oiporavo. Hetápema oipytyvõ umi konsého oĩva la Bíbliape ha umi suherénsia osẽva ñane puvlikasionkuérape oñeʼẽva ko témare.

¹⁹ Sapyʼánte peteĩ família oinvita heta ermánope hógape ohasa porã hag̃ua oñondivepa. Ikatu avei ñañeinvita jaha hag̃ua peteĩ kasamientohápe térã ótro akontesimiéntope (Juan 2:2). Umi oporoinvitáva ningo oreko pe rresponsavilida oñatendévo la oikóvare. Oĩtaramo heta invitádo ojereko vaʼerã enkuénta hetave detálle. Sapyʼánte oĩ kristiáno ohasáva la rrája ha oñepyrũ oñekomporta vai, okaru rasapa, hoʼu rasa vevída térã ojapo ótra kósa ivaíva. Oikuaa rupi ikatuha oiko koʼã mbaʼe heta kristiáno iñarandúva oorganisa jave álgo oñatende mboýpepa oinvitáta ha omoĩ voi mbaʼe órapa opáta. Oimérõ oĩta vevída, umi oorganisáva oñatende vaʼerã ani hag̃ua ojehasa la rrája (Filip. 4:5). Ñañehaʼãramo jahasa porã oñondivepa ha ñañomokyreʼỹ, pe tembiʼu ha umi vevída ndahaʼemoʼãi la iñimportantevéva.

²⁰ Iporãiterei ningo jarresivi porã ótrope ñande rógape (1 Ped. 4:9). Ñainvitáta jave umi ermáno ha ermánape jaʼu hag̃ua álgo ha ñakomparti hag̃ua oñondive, iporãta ñanemanduʼáramo avei umi ermánore ijetuʼúva isituasión (Luc. 14:12-14). Ha oimérõ ñande la ñañeinvitáva ani ñanderesarái siémpre jaagradese vaʼerãha umi ermánope imbaʼeporã haguére ñanendive. Avei jasegi vaʼerã pe konsého oĩva Marcos 12:31-pe.

²¹ Ñandejára omeʼẽ ñandéve heta rregálo ñanembovyʼáva. Por ehémplo ikatu “jakaru, jaʼu vevída, ha javyʼa ñambaʼapo pohýivo” (Ecl. 3:12, 13). Umi oporoinvitáva ha umi invitádo oñehaʼãramo ‘ojapo entéro mbaʼe ombotuicha hag̃ua Ñandejárape’, enterove odisfrutáta, oñomokyreʼỹta ha ijerovia mbaretevéta.

ESKUÉLA HA KOLÉHIO

²² Umi testígo de Jehová família oaprovecha pe edukasión oñemeʼẽva eskuélape ikatu hag̃uáicha oaprende olee ha oskrivikuaa. Umi ótra kósa oñemboʼéva upépe ikatu oipytyvõ avei umi mitãme ohupyty hag̃ua umi méta Jehová servísiope. Oĩ aja eskuélape, haʼekuéra oñehaʼãmbaite omotenonde Ñandejára servísio ha péicha imanduʼa Ijapohare Ijojahaʼỹvare (Ecl. 12:1).

²³ Oimérõ nde reĩ eskuéla térã koléhiope eñehaʼã ani rejeheʼaiterei ne kompañerokuéra ndoadoráivare Jehovápe (2 Tim. 3:1, 2). Jehová omeʼẽ ndéve la reikotevẽtava rejeprotehe hag̃ua umi mbaʼe ikatúvagui ndeperhudika (Sal. 23:4; 91:1, 2). Upévare eñatende ndejehe ha eaprovecha umi mbaʼe Jehová nemboʼéva (Sal. 23:5).

²⁴ Umi eskuéla ha koléhiope oñeorganisa jepi heta mbaʼe pe óra de kláse rire, péro heta Testígo imitãva odesidi ndopartisipái umívape ani hag̃ua ojeheʼa ko múndore. Sapyʼánte umi ikompañéro ha iprofesorkuéra nontendéi upéva. Péro koʼã Testígo imitãva oikuaa iñimportanteveha ombovyʼa Ñandejárape. ¿Mbaʼéichapa nde ikatu rejapo upéva? Tekotevẽterei reheja ndegia ne konsiénsia rehekomboʼéva la Biblia rupive. Avei rejedesidi vaʼerã remboyke umi kompeténsia ha umi mbaʼe ojejapóva oñemombaʼeguasu hag̃ua pe paíspe (Gál. 5:19, 26). Umi mitãrusu ha mitãkuña ohendu vaʼerã umi konsého bíblico omeʼẽva ituakuéra, avei oheka vaʼerã iñamigorã umi oĩ porãva kongregasiónpe. Upéicharõ añoite ikatúta osegi ojapo Jehová omandáva.

TRAVAHOHÁPE

²⁵ La Biblia ningo heʼi umi tuakuérape omantene vaʼerãha ifamíliape (1 Tim. 5:8). Upéicharamo jepe haʼekuéra oikuaa pe traváho ndahaʼeiha la iñimportantevéva síno omotenonde vaʼerãha Ñandejára servísio (Mat. 6:33; Rom. 11:13). Umi omoakãva peteĩ família siémpre omotenonde Ñandejára Rréino ha ovyʼa ifamília orekóma guive hoʼu vaʼerã ha ijaorã. Péicha ojei umi provléma oguerúvagui pe platarayhu ha ndoikói oñekevrantaiterei (1 Tim. 6:6-10).

²⁶ Entéro kristiáno siémpre oreko vaʼerã enkuénta umi konsého oĩva la Bíbliape itravahohápe. Ñaneonrrádo vaʼerã ha upearã ndajajapói vaʼerã mbaʼeve ohóva Ñandejára léi ni pe goviérno léi kóntrape (Rom. 13:1, 2; 1 Cor. 6:9, 10). Avei ndovaléi ñanderesarái umi júnta vai ikatuha ñandeperhudika. Ñande ningo Cristo soldádo, upévare ndajajapói negósio jaikuaáva ivaiha Jehovápe g̃uarã, oipytyvõtava oñemombaʼeguasu hag̃ua peteĩ tetãme térã ñandereja vaítava Ñandejára renondépe (Is. 2:4; 2 Tim. 2:4). Ha nañañentremetéi ni michĩmi Babilonia Guasúre, pe rrelihión japu haʼéva hína Ñandejára enemígo (Apoc. 18:2, 4; 2 Cor. 6:14-17).

²⁷ Jajegiáramo Ñandejára léire ndajaikomoʼãi jajapo negósio ni ótra kósa ñandévente okonvenítava umi rreunión ha asambleahápe. Umícha jave ñande ñañembyaty ñane ermanokuéra ndive jaadora hag̃ua Jehovápe, jarresivi hag̃ua pe aliménto haʼe omeʼẽva, ha “ñañomokyreʼỹ” hag̃ua ñane ermanokuérandi (Rom. 1:11, 12; Heb. 10:24, 25). Upévare ndajaikói vaʼerã jajapo ótra kósa rreunionhápe.

JAIKO PETEĨ ÑEʼẼME

²⁸ Jaiko hag̃ua Jehová heʼiháicha tekotevẽ avei jaiko pyʼaguapýpe oñondivepa ha peteĩ ñeʼẽme (Efes. 4:1-3). Jaiko rangue jajapo umi mbaʼe ñandévente ñandegustáva, ñañehaʼã vaʼerã jajapo iporãva ótro rehehápe (1 Tes. 5:15). Katuete rehecháma péicha ojeikoha kongregasiónpe. Enterovéva jajegia Ñandejára léire, tahaʼe haʼéva ñande pire kolór ha ñane retã, umi iplátava térã imboriahúva, umi ijestudioʼíva ha ijestúdio hetáva. Umi hénte ndahaʼéiva Testígo jepe ohechakuaa enterovéva jarrespetaha Ñandejára omandáva (1 Ped. 2:12).

²⁹ Apóstol Pablo ohechauka vaʼekue mbaʼéicha rupípa ñaneunído. Haʼe heʼi: “Oĩ peteĩ kongregasión añónte, ha peteĩ espíritunte, oĩháicha avei peteĩ prémionte ñahaʼarõva, ha Ñandejára ñaneinvita vaʼekue jarresivi hag̃ua upéva. Peteĩnte ñande Ruvicha, peteĩnte ñande jerovia, ha peteĩnte pe vautísmo. Peteĩnte Ñandejára, haʼéva enterove Túa, oĩva opa mbaʼe ári, haʼe ojevale opavavére ha ipodér omomýi enterovépe” (Efes. 4:4-6). Ko téxto heʼíva ñanemomýi ñaĩ hag̃ua peteĩ ñeʼẽme umi mbaʼe jagueroviávape, tahaʼe umi enseñánsa primeroite voi ñaaprendéva térã umi hypyʼũvéva. Péicha jahechauka jaaseptaha Jehová autorida. Añetehápe haʼe omeʼẽ ipuévlope peteĩ idióma ipotĩva ñanepytyvõva jaservi hag̃ua chupe peteĩ ñeʼẽme (Sof. 3:9).

³⁰ Kongregasiónpe ningo ñaneunído ha ñaime pyʼaguapýpe, ha upéva omokyreʼỹ ha omombarete enterove oservívape Jehovápe. Ñande jahecháma mbaʼéichapa oñekumpli Jehová promésa heʼíva: “Pombyatýta oñondivepa peteĩ ovecha atýicha peteĩ korápe” (Miq. 2:12). Ñande ñañehaʼã vaʼerã jasegi Ñandejára léi, péicha jaikóta pyʼaguapýpe oñondivepa.

³¹ Javyʼaiterei ñaime haguére Jehová organisasión ipotĩetévape. Ñande jagueraha Jehová réra, ha upéva ovaleve oimeraẽ sakrifísio ikatúvagui jajapo. Javaloraiterei ñane amista Jehová ndive, upévare ñañehaʼãmbaitékena jaiko haʼe oipotaháicha ha ñamboʼe ótrope ojapo hag̃ua avei upéicha (2 Cor. 3:18).