Informasión

Peẽ sy ha túa ningo oiméne katuete peipota pene família ohayhu Jehovápe ha oñemeʼẽ chupe. ¿Mbaʼéichapa ikatu peipytyvõ chupekuéra oĩ hag̃ua preparádo pe vautismorã? ¿Mbaʼéichapa peikuaáta ikatumaha odesidi hikuái ko mbaʼe iñimportantetéva?

Jesús heʼi vaʼekue isegidorkuérape: “Pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra” (Mat. 28:19). Heʼiháicha koʼápe, primero oiko vaʼerã chuguikuéra Jesús disípulo. Péva ndeʼiséi pe mitã ontende ha ogueroviánte vaʼerãha Cristo omboʼe vaʼekue, tekotevẽ avei ojapo haʼe omboʼe vaʼekue. Umi mitã avei ikatu ojapo upéva.

Pemoĩkena ehémplo iporãva pene famíliape ha pemboʼe chupekuéra Jehová enseñánsa (Deut. 6:6-9). Upearã ikatu peipuru pe lívro ¡Jaikóta vyʼápe pára siémpre! Péicha pemboʼéta chupekuéra umi mbaʼe iñimportantevéva oĩva la Bíbliape, ha pepreparáta chupekuéra ojepyʼamongeta hag̃ua la Biblia heʼívare ha siémpre osegi hag̃ua umi konsého oĩva pype. Peipytyvõkena pene famíliape oexplikakuaa hag̃ua ijeheguiete umi mbaʼe ogueroviáva (1 Ped. 3:15). Ikatu hag̃uáicha umi mitã oprogresa ha upéi ojevautisa oikotevẽ peẽ pemboʼe ha pemokyreʼỹ chupekuéra. Avei pejapo vaʼerã pe estúdio de família, ostudia vaʼerã la Biblia haʼeñohápe, oho vaʼerã rreunionhápe ha oiporavo porã vaʼerã iñamigorã. Pehechaukákena chupekuéra mbaʼe métapa ikatu ohupyty Jehová servísiope.

Proverbios 20:11 heʼi: “Umi mitãme jepe ikatu japilla mbaʼeichagua persónapa umi mbaʼe ojapóvare, oimérõ ojeporta porã térã ojeporta vai”. ¿Mbaʼéichapa ikatu pehechakuaa oimépa pene família osegíma Jesúspe ha oĩma preparádo ojevautisa hag̃ua?

Peteĩ mitã oprogresáva ohóvo iñeʼẽrendu vaʼerã itúa ha isýpe (Hech. 5:29; Col. 3:20). La Biblia heʼi Jesús orekórõ guare 12 áño osegi hague iñeʼẽrendu ituakuérape (Luc. 2:51). Upéva ndeʼiséi pene família ndorekomoʼãiha defékto. Péro umi imitãva ojevautisaséva oñehaʼã vaʼerã osegi Jesús ehémplo ha enterove ohechakuaa vaʼerã iñeʼẽrenduha itúa ha isýpe.

Ojehecha vaʼerã pene famíliare oaprendeseha la Biblia omboʼéva (Luc. 2:46). Por ehémplo, ¿ohosépa pene família rreunionhápe ha okomentasépa upépe? (Sal. 122:1). ¿Oleesépa káda día la Biblia ha ostudiasépa haʼeñohápe? (Mat. 4:4).

Pe mitã oprogresáva ohóvo ojevautisa hag̃ua oñehaʼã avei omotenonde Ñandejára Rréino (Mat. 6:33). Orrekonose orekoha pe rresponsavilida oñeʼẽvo ótrondi umi mbaʼe ogueroviávare. Oñehaʼã opredika de diferénte fórma ha notĩri heʼi hag̃ua iprofesór ha ikompañerokuérape haʼeha testígo de Jehová. Haʼe ojagarra ensério ha okumpli porã umi asignasión orekóva pe rreunión héravape Mbaʼéichapa Jaiko ha Japredika vaʼerã.

Haʼe oñehaʼã siémpre ipotĩ Jehová renondépe, upévare omboyke umi júnta vai (Prov. 13:20; 1 Cor. 15:33). Avei oiporavo porã umi músika, pelíkula, prográma de televisión, videohuégo ha umi mbaʼe ohecháva Internétpe.

Heta sy ha túa oñehaʼãmbaite ohekomboʼe porã hag̃ua ifamíliape. Péicha rupi umi mitã osẽ porã, ojerovia Jehováre ha ojevautisa imitã reheve. Roipotaite Jehová ovendesi opaite mbaʼe pejapóva peipytyvõ hag̃ua pene famíliape odesidi hag̃ua ojevautisa.

Peteĩ mensáhe umi puvlikadór no vautisádope g̃uarã:

Oiméramo nde peteĩ puvlikadór no vautisádo, tuichaiterei pe priviléhio reguerekóva. Rovyʼaiterei reprogresa haguére kongregasiónpe. Restudia rupi la Biblia reikuaa Ñandejárape ha rejerovia ipromesakuérare (Juan 17:3; Heb. 11:6).

Oiméne restudia mboyve umi testígo de Jehová ndive, reho raʼe ótro rrelihiónpe, térã ikatu nereiméi raʼe ni peteĩ rrelihiónpe. Ikatu avei rejapo rakaʼe umi mbaʼe la Biblia heʼíva ivaiha. Péro koʼág̃a reñarrepentíma, upéva heʼise rembyasyha nde pyʼaite guive la rejapo vaʼekue. Ha avei rekambiáma, upéva heʼise rehejaitemaha umi mbaʼe vai ha rejedesidi rejapotaha iporãva Ñandejára renondépe (Hech. 3:19).

Ikatu avei “nemitã guive” reikuaa la Biblia omboʼéva, ha upéva nepytyvõ reiko hag̃ua peteĩ kristiánoicha ha ani hag̃ua rejapo peteĩ mbaʼe ivaietereíva (2 Tim. 3:15). Reaprendéma mbaʼéichapa rejehekýita umi tentasióngui ha nerepenái oĩramo nemboligáva rejapo hag̃ua peteĩ mbaʼe ivaíva Jehovápe g̃uarã. Rehechaukáma rejeroviaha redefendévo pe adorasión Jehová oguerohorýva ha reñeʼẽvo umi mbaʼe regueroviávare. Avei ndekatupyrýma repredika hag̃ua ha redesidi reserviseha Jehovápe kómo puvlikadór no vautisádo.

Oiméramo reaprende raʼe pe añetegua nemitã guive térã upe riréma, koʼág̃a repensa hína rejapóvo mokõi mbaʼe iñimportantetereíva: reñemeʼẽ Jehovápe ha rejevautisa. ¿Mbaʼéichapa rejapo upéva? Reñemeʼẽ Jehovápe rejapóvo peteĩ orasión ha ere chupe redesidimaha reservitaha chupe añoite pára siémpre (Mat. 16:24). Ha upéi rejevautisa vaʼerã rehechauka hag̃ua enterove renondépe reñemeʼẽma hague Ñandejárape (Mat. 28:19, 20). Reñemeʼẽvo Jehovápe ha rejevautisávo oikóma ndehegui Ñandejára siérvo oadoráva chupe iñorganisasión ndive. ¡Ajépa tuichaite upe priviléhio!

Péro rehecha haguéicha nde estúdiope, ikatu hína rembohovái heta mbaʼe ijetuʼúva. Nemanduʼákena mbaʼépa oiko Jesús rehe ojevautisa riremínte. La Biblia heʼi: “Ñandejára espíritu ogueraha Jesúspe desiértope ha pe Diablo ou omoñuhã hag̃ua chupe” (Mat. 4:1). Nde avei ikatu rehasa pruéva rejevautisa rire (Juan 15:20). Umi pruéva ikatu oñepresenta heta hendáicha. Ikatu ne hentekuéra oñemoĩ nderehe (Mat. 10:36). Térã oñembohory nderehe ne kompañéro de koléhio, de traváho ha umi ne amigokuéra yma guare. Péro nemanduʼákena Jesús heʼi vaʼekuére Marcos 10:29, 30-pe: “Añetehápe haʼe peẽme: umi cherehehápe, ha pe notísia porã rehehápe oheja vaʼekue hóga, iñermáno ha iñermanakuéra, isy ha itúa, itaʼyrakuérape térã ijyvy, umívape ojepersegíta, péro ko tiémpope voi oñemeʼẽta 100 vése mas upe oheja vaʼekuégui, tahaʼe óga, ermáno, ermána, sy, taʼyrakuéra ha yvy. Ha amo gotyove katu ohupytýta jeikove opaveʼỹva”. Upévare, esegíkena Jehová ykére ha eiko haʼe omandaháicha.

Rejevautisase vove, reñeʼẽ vaʼerã pe koordinadór del kuérpo de ansiánondi. Umi ansiáno oipurúta umi pregúnta oĩva ko lívrope oñemongeta hag̃ua nendive ha ohecha hag̃ua reimémapa preparádo rejevautisa hag̃ua. Ikatu nde voi reñepyrũ reanalisa umi pregúnta restudia jave neañohápe. Koʼã pregúnta oĩ hína ko párte rire.

Rejeprepara jave, elee entéro umi téxto de la Biblia oĩva pe pártepe ha ejepyʼamongeta umívare. Oiméramo reanotase álgo ko lívrope térã peteĩ kuadérnope, ikatu reanota. Ha ág̃a reñemongeta vove umi ansiánondi ikatu reipuru umi mbaʼe reanota vaʼekue ha nde lívro avei. Hasýramo ndéve rentende hag̃ua peteĩ pregúnta, ani rekyhyje rejerure hag̃ua ajúda pe nembostudiávape la Biblia térã umi ansiánope.

Reñemongeta vove umi ansiánondi natekotevẽi rekontesta pukueterei ni rejereterei. Iporãvéta rekontestáramo ndejeheguiete ha sensillomi. Heta vése iporãta avei emensionáramo peteĩ térã mokõi téxto ohechaukáva mbaʼépa heʼi la Biblia upe témare.

Umi ansiáno ohechakuaáramo ofaltaha gueteri ndéve rentende porãve umi mbaʼe iñimportantevéva oĩva la Bíbliape, ohecháta oĩ hag̃ua nepytyvõva rentende hag̃ua. Ha péicha ikatúta reexplika ne ñeʼẽtépe umi mbaʼe reaprendéva la Bíbliagui, ikatu hag̃uáicha amo gotyove rejevautisa.

[Nóta ansianokuérape g̃uarã: Páhina 208-212-pe petopáta informasión peikuaa hag̃ua mbaʼéichapa peanalisa vaʼerã koʼã pregúnta umi ojevautisaséva ndive].