Kárta omboúva Kuérpo Governánte

Entéro umi opredikávape umi notísia porã:

¡Ajépa javyʼaite jaservi haguére oñondivepa Jehovápe! Haʼe añoite ningo pe Dios verdadéro ha ñande ñambaʼapo hendive. Haʼe onkarga ñandéve japredika ha ñamboʼe hag̃ua oparupiete umi notísia porã oñeʼẽva Ñandejára Rréinore. Ko tembiapo ningo sagrádo ha ikatu osalva heta héntepe (1 Cor. 3:9; Mat. 28:19, 20). Ñakumpli hag̃ua ko traváho ko múndo tuichakuére vyʼápe ha peteĩ ñeʼẽme, tekotevẽ ñaime vién organisádo (1 Cor. 14:40).

Ko lívro nepytyvõta rentende porã hag̃ua mbaʼéichapa ombaʼapo Jehová organisasión ko tiémpope. Omombeʼu avei umi priviléhio ha rresponsavilida orekóva umi oĩva ko organisasiónpe. Remombaʼéramo nde priviléhio ha rejapóramo umi mbaʼe oñehaʼarõva ndehegui kongregasiónpe, katuete ‘rejerovia mbaretevéta’ (Hech. 16:4, 5; Gál. 6:5).

Upévare romokyreʼỹ restudia porã hag̃ua ko lívro ha repensa hag̃ua mbaʼéichapa ikatu rejapo umi mbaʼe reaprendéva. Por ehémplo, oimérõ ramoiténte oiko hague ndehegui puvlikadór, ¿mbaʼépa rejapove vaʼerã ikatu hag̃uáicha rejevautisa? Ha oiméramo rejevautisáma, ¿mbaʼéichapa ikatu esegi eprogresa ha ejapo hetave mbaʼe Jehová servísiope? (1 Tim. 4:15). ¿Mbaʼéichapa ikatu reipytyvõ oĩ hag̃ua pyʼaguapy kongregasiónpe? (2 Cor. 13:11). Ko lívrope retopáta la rrespuésta.

Hetaiterei persóna ningo oike ohóvo Jehová organisasiónpe, upéicha rupi amás día oñekotevẽve ermáno ikatupyrýva oñangareko vaʼerã umi kongregasiónre. Upévare, oiméramo nde peteĩ ermáno vautisádo, ¿mbaʼe mbaʼépa rejapo vaʼerã ikatu hag̃uáicha oiko ndehegui siérvo ministeriál ha upe rire ansiáno? Ko lívro omyesakã porãta ndéve mbaʼépa rejapo vaʼerã rehupyty hag̃ua umi méta (1 Tim. 3:1).

Rojerure asy Jehovápe ko lívro tanepytyvõ ikatu hag̃uáicha reikuaa ha remombaʼe umi priviléhio ha rresponsavilida rerekóva iñorganisasiónpe. Pohayhueterei ningo ha roñemboʼe penderehe peservi hag̃ua vyʼápe ñande Ru Jehovápe pára siémpre (Sal. 37:10, 11; Is. 65:21-25).