Jehová omondove 6 kastígo Egíptope

Jehová omondo jey Moisés ha Aarónpe heʼi hag̃ua faraónpe: “Nderepoíriramo che puévlogui, amboúta ndéve hetaiterei mbutu”. Upe rire, umi mbutu oñepyrũ ojagarrapaite umi egipcio róga, tahaʼe umi iplátava térã imboriahúva róga. Péro Gosénpe, oikohápe umi israelita, ndaipóri ni peteĩ mbutu. Ko cuarto kastígo omondóva Ñandejára ha entéro umi oúva upe rire oafekta umi egípciopente, péro ndojehúi mbaʼeve umi israelítape. Upéi faraón heʼi jeýma Moiséspe: “Ejeruremíntena Jehovápe oipeʼa hag̃ua koʼã mbutu ha upéi apoíta umi israelítagui”. Péro Jehová oipeʼa rire umi mbutu, pe faraón ndojapói la heʼi vaʼekue ojapotaha. ¿Ndépa ere algún día pe faraón okambiataha?

Upéi Jehová heʼi: “Faraón ndopoíriramo che puévlogui, entéro umi egipcio rymbakuéra hasýta ha omanombáta”. Al día sigiénte oiko Jehová heʼi hagueichaite, péro umi israelita rymbakuérare ndoikói mbaʼevete. Faraón osegínte ojekree ha ndojapói la Jehová heʼíva.

Upévare Jehová omondo jey Moiséspe faraón rendápe ha heʼi chupe opoi hag̃ua yvate un púño tanimbu. Moisés ojapo upéva ha pe tanimbúgui oiko peteĩ yvytimbo ha pe yvytimbo ojagarrapaite Egipto, upéva onohẽmbaite kuru vai umi egípciore ha hymbakuérare. Upéicharõ jepe, faraón heʼi jey ndopoimoʼãiha umi israelítagui.

Jehová omondo jey Moiséspe pe faraón rendápe heʼi hag̃ua chupe: “¿Resegíta piko rejoko che puévlope? Upe haguetére koʼẽrõ hoʼáta hetaiterei amandáu”. Al día sigiénte, Jehová ombou peteĩ torménta vai, oñepyrũ osunu, ha kontinuadoite hoʼa rrájo ha amandáu. Núnka ndoikóiva peichagua torménta Egíptope. Pe torménta ha amandáu ohundipaite umi plánta ha yvyramáta, péro Gosénpe ndoikói mbaʼeve. Upéi faraón heʼi Moiséspe: “Pejerure Jehovápe opa hag̃ua pe tiémpo vai. Upéicharõ añoite apoíta umi israelítagui”. Upéi ohasa pe tiémpo vai ha faraón hesarái jeýma la opromete vaʼekuégui.

Upévare Moisés heʼi faraónpe: “Koʼág̃a umi tuku hoʼupaitéta umi plantasión opyta vaʼekue peẽme pe amandáu rapykuerépe”. Ha upeichaite oiko, hetaiterei tuku ou ha hoʼupaite umi plánta ha yvyramáta rogue opyta vaʼekue. Upéi faraón ojerure asy Moiséspe: “Ejeruremíntena Jehovápe oipeʼapaite hag̃ua koʼágui umi tuku”. Péro Jehová ojapo rire upéva, faraón osegi oñemohatã ha ndopoíri umi israelítagui.

Upéi Jehová heʼi Moiséspe: “Ehupi nde po yvága gotyo”. Moisés ojapo upéva ha pytũete sapyʼa Egíptope. Tres día aja umi egipcio ndaikatúi ohecha mbaʼeve pytũetereígui. Umi israelita oikohápe katu hesakã porã.

Faraón heʼi Moiséspe: “Tapehopaite katu peadora Jehovápe, péro ndapeguerahamoʼãi pene rymbakuéra”. Moisés heʼi chupe: “Rorahámante vaʼerã la ore rymbakuéra ikatu hag̃uáicha rosakrifika umíva Ñandejárape”. Upéva ombopochyeterei faraónpe ha heʼi Moiséspe: “¡Tereho chéve koʼágui! Ág̃a rohecha jeýrõ, rojukáta”.