Pe último kastígo Jehová omondo vaʼekue Egíptope

Moisés opromete faraónpe ndohomoʼãveimaha hendápe. Péro oho mboyve heʼi chupe: “Ko pyharépe omanóta entéro umi egipcio raʼy ypykue. Omanóta avei faraón raʼy ypykue”.

Jehová heʼi umi israelítape: “Peprepara vaʼerã peteĩ séna espesiál. Pekarnea vaʼerã peteĩ ovecha raʼy térã peteĩ kavara raʼy de un áño ha pehypýi pende róga rokẽ márko pe huguykuépe. Upéi pembichy vaʼerã pe hoʼokue ha peʼu pan ilevaduraʼỹvare. Peime vaʼerã preparádo pesẽ hag̃uáicha, peñemondepáma vaʼerã ha pemonde pene sandália. Ko pyharépe poguenohẽta Egíptogui”. ¿Mbaʼéichapa nde ere oñeñandúne hague umi israelita ohendúvo upéva?

Upe pyharépe, Jehová ánhel ojukapaite umi egipcio raʼy ypykuépe. Péro pe ánhel ohasa reínte umi óga orekóva hokẽ márkore pe tuguy. Entéro umi egipcio rógape, tahaʼe umi iplátava térã imboriahúva rógape, omano pe taʼýra ypykue. Péro umi israelita apytépe ni peteĩ nomanói.

Faraón raʼy ypykue omano avei. Upévare noaguantavéi sapyʼa ha heʼi Moisés ha Aarónpe: “Koʼag̃aite voi tapeho chéve koʼágui, peẽ ha entéro umi israelita. Tapeho pemombaʼeguasu pende Jára Jehovápe. Pegueraha avei pene rymbakuéra ha tapeho”.

Upe pyharépe lúna lléna kuri. Umi israelita osẽ hag̃ua Egíptogui oñeorganisa kuri en grúpo ha osẽ hikuái en órden. Oĩ vaʼekue 600.000 kuimbaʼe ha hetaiterei kuña ha mitã, ha omoirũ avei chupekuéra heta hénte ndahaʼéiva israelita péro ohoséva avei hendivekuéra oadora hag̃ua Jehovápe. ¡Péicha umi israelita osẽ sapyʼa Egíptogui!

Umi israelita ojapo vaʼekue káda áño peteĩ séna espesiál ogueromanduʼa hag̃ua Jehová oguenohẽ hague chupekuéra Egíptogui. Upe sénape oñehenói vaʼekue Páskua.