Umi 12 espía

Umi israelita oho rire Sérro Sinaígui ohasa hikuái pe desiérto de Paránrupi ha upéi og̃uahẽ hikuái peteĩ lugár héravape Cadés. Upépe Jehová heʼi Moiséspe: “Eiporavo peteĩ kuimbaʼe káda trívugui ha emondo chupekuéra ovichea hag̃ua Canaán yvy, pe yvy apromete vaʼekue ameʼẽtaha umi israelítape”. Upémarõ Moisés oiporavo 12 kuimbaʼépe ha heʼi chupekuéra: “Tapeho Canaánpe ha pehecha oprodusi porãpa pe yvy térãpa nahániri. Pehecha avei oimépa ikangy térãpa imbarete umi hénte oikóva upépe, ha oikópa hikuái óga kárpape térãpa siudahápe”. Umi 12 espía ojapo la Moisés heʼíva chupekuéra ha oho Canaánpe, ijapytepekuéra oĩ vaʼekue Josué ha Caleb.

Umi 12 espía ou jey 40 día haguépe ha ogueru hikuái ígo, granáda ha parrál. Haʼekuéra heʼi Moiséspe: “Iporãiterei ningo la Canaán yvy, péro umi hénte oikóva upépe imbarete, ha umi siuda murálla ijyvate vate”. Péro Caleb heʼi: “Jaha katuna, ñande ningo ñandepuʼakáta hesekuéra”. ¿Reikuaápa mbaʼérepa Caleb heʼi upéicha? Pórke haʼe ha Josué ojerovia vaʼekue Jehováre ipyʼaite guive. Umi ótro 10 espía katu heʼi: “Ndovaléi jaha. Umi hénte oikóva upépe ningo tuichaiterei, higánte memete voi hikuái ha ñande katu tukúicha ñanemichĩ henondepekuéra”.

Upépe umi israelita oñedesanima ha oñepyrũma ojekeha ha heʼi: “Jaiporavo katu ótro ñanemoakã vaʼerã ha jaha jey Egíptope. ¿Maʼerã piko jaháta Canaánpe ñandejukapa hag̃ua ñane enemigokuéra?”. Josué ha Caleb osẽ heʼi chupekuéra: “Iporãvéta ningo jajapónte la Jehová heʼíva, haʼe katuete ñandeprotehéta, ani pekyhyje”. Péro umi israelita ndoikuaaséi mbaʼeve ha ojukase voi katu hikuái Josué ha Calébpe.

¿Mbaʼépa ojapo Jehová? Haʼe heʼi Moiséspe: “Hetaite mbaʼéma ningo ajapo umi israelita rehehápe ha upéicharõ jepe haʼekuéra osegínte idesovediénte. Upévare ahejáta chupekuéra oiko 40 áño ko desiértore omanomba peve hikuái. Umi ifamiliare añoite oikéta pe yvy apromete vaʼekuépe ameʼẽtaha chupekuéra, Josué ha Caleb añoite oikéta hendivekuéra upépe”.