Rahab oipytyvõ mokõi espíape okañy hag̃ua

Mokõi espía israelita oho ovichea hag̃ua Jericó ha opyta Rahab rógape. Pe rréi de Jericó oikuaárõ guare upéva, omondo isoldadokuérape Rahab rógape. Upémarõ Rahab heʼi umi mokõi espíape ojupi hag̃ua okañy pe terrásape. Upéi, umi soldádo oúrõ guare hógape, Rahab heʼi chupekuéra umi kuimbaʼe oho jeýma hague hógagui ha omondo chupekuéra ótro ládo oheka hag̃ua umi espíape. Upéi Rahab heʼi umi mokõi israelítape: “Che poipytyvõ pórke aikuaa porã Jehová omeʼẽtaha peẽme ko yvy. Peprometéna chéve ndapejapomoʼãiha mbaʼeve cherehe ni che hentekuérare”.

Umi mokõi espía heʼi Rahábpe: “Ropromete ndéve ndoikomoʼãiha mbaʼeve nderehe ni umi oĩvare nde rógape, péro remosaingo vaʼerã peteĩ pióla pytã nde róga ventánape. Péicha nde ha ne hentekuéra pejesalváta”.

Upéi Rahab omboguejy umi espíape peteĩ piólare ventánarupi ikatu hag̃uáicha osẽ hikuái Jericógui. Umi espía oho okañy 3 día umi sérrore, ha upéi ae oho jey Josué oĩháme. Upe rire umi israelita okrusa pe rrío Jordán ha ojepreparáma oike hag̃ua Canaánpe. Jericó haʼe kuri pe primera siuda oiketahápe hikuái. Jehová heʼi chupekuéra ojere hag̃ua pe siudáre una ves al día. Ha ojapo hikuái upéva 6 díare, péro pe 7 diahápe ojere hikuái pe siudáre 7 vése voi. Upéi umi saserdóte ombopu la ituru ha umi israelita osapukái hatã ha Jericó murálla oho yvýpe. Rahab róga oja kuri pe murállare, upéicharõ jepe ndoʼái la hóga. Péicha Rahab ha ihentekuéra ojesalva haʼe ojerovia rupi Jehováre.