Barac ha mokõi kuña ipyʼaguasúva

Heta tiémpore Josué omoakã umi israelítape, péro upéi omano orekópe 110 áño. Umi israelita oadora kuri Jehovápe Josué oikove aja. Péro omano rire, oñepyrũ oadora hikuái umi dios fálsope, ojapoháicha umi hénte oikóva Canaánpe. Haʼekuéra naiñeʼẽrenduveiete voi Jehovápe, upévare haʼe oheja ombosufri chupekuéra peteĩ rréi cananeo hérava Jabín. Péro upéi umi israelita ojerure asy Jehovápe oipytyvõmínte hag̃ua chupekuéra. Upémarõ Jehová omoĩ Barácpe omoakã hag̃ua umi israelítape. Barac oipytyvõta umi héntepe oadora jey hag̃ua Jehovápe.

Peteĩ profetísa hérava Débora ohenoika Barácpe ha omombeʼu chupe mbaʼépa heʼika chupe Jehová: “Tereho arrójo Cisónpe ha eraha nendive 10.000 kuimbaʼe ha peñorairõ Jabín ha ijehérsito kóntrape. Upépe reganáta Sísarape, haʼe hína pe omoakãva Jabín ehérsito”. Barac heʼi Déborape: “Aháta, péro nde rehóramo añoite chendive”. Ha Débora heʼi chupe: “Aháta nendive. Péro reikuaa vaʼerã ndahaʼemoʼãiha nde la rejukátava Sísarape, pórke Jehová heʼíma peteĩ kuña ojapotaha upéva”.

Débora ojupi Barac ha ijehérsitondi Sérro Tabórpe ojeprepara hag̃ua hikuái pe ñorairõrã. Sísara oikuaárõ guare upéva, ombyaty avei la ijehérsito, oprepara umi kárro de gérra ha oho hikuái arrójo Cisónpe. Débora katu heʼi Barácpe: “Tereho katu eñorairõ, pórke Jehová nepytyvõta regana hag̃ua”. Upémarõ Barac ha umi 10.000 kuimbaʼe oĩva ijehérsitope oguejy Sérro Tabórgui oataka hag̃ua Sísara ha ijehérsitope.

Upéi, Jehová ojapo peteĩ milágro ha pe arrójo Cisón tuichaiterei ojupi ha pe y osẽmba opárupi. Upéicha rupi Sísara ha ijehérsitogui opaʼãmba tujukuápe umi ikárro de gérra ha ndaikatuvéi oho hikuái moõve. Upémarõ Sísara oguejy ikárrogui ha odipara upégui. Barac ha ijehérsito katu oho oñorairõ Sísara ehérsito kóntrape ha ogana chupekuéra. Péro Sísara oho okañy peteĩ óga kárpape oikohápe peteĩ kuña hérava Jael. Ko kuña omeʼẽ chupe kamby hoʼu hag̃ua ha omoñuã chupe peteĩ mántape. Sísara ikaneʼõiterei ha opyta oke. Upéi Jael mbeguekatu asy oñemoag̃ui hese ha kirirĩhaitépe oklava Sísara akãre peteĩ estáka ha ojukaite voi chupe.

Barac oheka kuri oikóvo Sísarape ha upéi Jael osẽ hendápe pe hóga kárpagui ha heʼi chupe: “Eju koʼápe ha ahechaukáta ndéve moõpa oĩ pe kuimbaʼe rehekáva hína”. Barac oike Jael róga kárpape ha ohecha Sísara reʼõngue ojepysoha hína pe yvýpe. Upémarõ Barac ha Débora opurahéi ha omombaʼeguasu Jehovápe oipytyvõ haguére chupekuéra ogana hag̃ua iñenemigokuérape. Upe rire umi israelita oiko pyʼaguapýpe 40 áñore.