Gedeón ogana umi madianítape

Kon el tiémpo umi israelita oñemomombyry jey Jehovágui ha oadora umi dios fálsope. Siete áñore umi madianita omondapa chuguikuéra hymbakuéra ha ohundipa chuguikuéra umi plantasión orekóva. Umi israelita ojeprotehe hag̃ua umi madianítagui oho okañy umi kuévape ha umi sérrore. Upéi umi israelita ojerure asy Jehovápe osalvami hag̃ua chupekuéra. Upévare Jehová omondo peteĩ ánhelpe peteĩ mitãrusu rendápe. Ko mitãrusu héra Gedeón ha pe ánhel heʼi chupe: “Jehová ndeporavo oiko hag̃ua ndehegui peteĩ gerréro mbarete”. Gedeón heʼi pe ánhelpe: “Chéngo ndahaʼéi mbaʼeve. ¿Mbaʼéicha piko asalváta umi israelítape?”.

Gedeón ojasegurase kuri siértopa la Jehová oiporavo hague chupe. ¿Mbaʼépa ojapo upearã? Haʼe omoĩ peteĩ ovecha lána pedáso pe yvýpe ha heʼi Jehovápe: “Koʼẽrõ pyhareve ikoʼẽramo ijysapypa pe ovecha lána ha ijerére katu iséko pe yvy, upéicharõ aikuaáta nde rejevaletaha cherehe resalva hag̃ua umi israelítape”. Al día sigiénte, pe ovecha lána hykue sópa ha pe yvy katu iséko. Upémarõ Gedeón ojerure Jehovápe: “Koʼẽrõ pyhareve taikoʼẽ iséko pe ovecha lána péro pe yvy tahykuepa”. Jehová ojapo jey la Gedeón ojerure vaʼekue chupe. Upépe Gedeón oikuaáma Jehová oiporavo hague chupe, upévare ombyaty isoldadokuérape oho hag̃ua oñorairõ umi madianita kóntrape.

Jehová heʼi Gedeónpe: “Che poipytyvõta pegana hag̃ua. Péro hetaiterei soldádoma oĩ nendive, upéi haʼekuéra ikatu opensa ijeheguínte ogana hague pe gérra. Upévare ere entéro umi ipyʼajúvape oho jeýnte hag̃ua hógape”. Upéicha rupi 22.000 soldádo oho jey hógape ha opyta 10.000. Jehová heʼi jey Gedeónpe: “Heta gueteri oĩ hikuái. Eraha chupekuéra pe arrójope ha ere chupekuéra toyʼu, ha eiporavo oñorairõ hag̃ua nendive umi hoyʼukuévo oñatendévape ohecha hag̃ua ndoúipa umi madianita”. Umi 10.000 apytégui 300 kuimbaʼénte oñatende hoyʼukuévo. Ha Jehová opromete umi 300 kuimbaʼe oganataha umi 135.000 soldádo madianítape.

Upe pyharépe Jehová heʼi Gedeónpe: “Peho katu peataka koʼág̃a umi madianítape”. Gedeón omeʼẽ káda uno umi 300 kuimbaʼépe peteĩ turu, peteĩ kambuchi ha peteĩ antórcha ha heʼi chupekuéra: “Pejesareko cherehe ha pejapo che ajapohaichaite”. Gedeón ombopu la ituru, ojoka pe ikambuchi, omonguʼe yvate iñantórcha ha osapukái: “¡Jehová ha Gedeón espáda!”, ha umi 300 kuimbaʼe oĩva hendive ojapo avei upéicha. Umi madianita katu nontendéi mbaʼépa la oikóva, odiparapa hikuái opárupi ha oñepyrũ ojoataka ha ojojukapa haʼekuéra voi. Péicha Jehová oipytyvõ jey umi israelítape ogana hag̃ua iñenemigokuérape.