Ana ojerure Jehovápe peteĩ mitã

Peteĩ israelita hérava Elcaná mokõi hembireko vaʼekue. Peteĩva héra Ana ha pe ótra Peniná. Péro Elcaná ohayhuve vaʼekue Ánape. Peniná heta imemby vaʼekue péro Ana ndorekói ni peteĩ, upévare Peniná oñembohorými vaʼerã hese. Káda áño Elcaná orahámi vaʼekue umi mokõi hembireko ha ifamiliakuérape Silópe oadora hag̃ua Jehovápe pe tavernákulope. Peteĩ jey, oĩ aja hikuái upépe, Elcaná ohechakuaa Ánare ndovyʼaietereiha. Upévare heʼi chupe: “Anína nerasẽ Ana. Che ningo rohayhueterei ha aime nendive”.

Upe rire Ana oho haʼeñoháme oñemboʼe hag̃ua. Haʼe hesay hováre ojerure asy Jehovápe oipytyvõmínte hag̃ua chupe. Haʼe opromete voi Jehovápe: “Repermitíramo chéve chememby peteĩ mitãkuimbaʼe, ameʼẽta ndéve upe mitã ndeservi hag̃ua pe tavernákulope oikove aja pukukue”.

Pe súmo saserdóte hérava Elí ohecha mbaʼéichapa Ana hasẽ ha omonguʼe ijuru péro noñeʼẽi, upévare oporandu chupe okaʼúpa. Ana heʼi chupe: “Nahániri karai, che ndaʼúi kuri mbaʼeveichagua vevída. Añembyasyetereínte ningo ha amombeʼupaite hína Jehovápe pe chejopy asýva”. Elí ohechakuaa ojekivokaha ha heʼi Ánape: “Jehová tomeʼẽ ndéve upe rejeruréva chupe”. Upe rire Ana oñeñandu porãvéma ha osẽ upégui. Ni un áño ndohasajepéi ha Ana orekóma peteĩ mitãkuimbaʼe ha ombohéra chupe Samuel. Oiménepa Ana ovyʼaite raʼe imembyʼi reheve.

Ana ndahesaráiri pe opromete vaʼekuégui Jehovápe. Samuel opoʼo riremi, Ana oraha chupe pe tavernákulope oservi hag̃ua Jehovápe upépe. Ana heʼi Elípe: “Che ajerure kuri Jehovápe omeʼẽ hag̃ua chéve peteĩ mitãkuimbaʼe ha koʼág̃a agueru chupe koʼápe oservi hag̃ua Jehovápe oikove aja entéro”. Elcaná ha Ana káda áño ohómi ovisita Samuélpe ha oraha chupe peteĩ ao puku naimángaiva. Upe rire Jehová opermiti Ánape imembyve mbohapy mitãʼi ha mokõi mitãkuñaʼi.